Tungwagom di ntun keret Lewi him kin nitnem mien
19
1 Mpe di po mben Israel ibon ide nibou ndig hi bigyo pima lene tungwagom di ntun keret Lewi him bong ei nungug him ei keret Efraim de dihyei hanjop nsi. Mpe di gom lene noni ug buwak sop timiei Betlehem ei keret Yehuda de dihyei hanjop nsi gom nok nitnem mien. 2 Noro niabiati bu lene misop dima gga nonie apino ngkwei hanyen ug ei nicig de ig bei ei Betlehem. Tirigi noni bong ei nitimieisi mem bed bitai su, 3 lene nijjep dima bram noni leu binhyepo pai-hi-paisi ba, ngkwei hanyen bibong bit noni. Lene awak nide gom bit noni ba, jem keledai ningut can kwei. Tirigi yuug krau Betlehem lene misop dima buwak nijjep biyuug ngat nicig. Tirigi nicig ngat noni lene ba ningon di llei bibor bicigit kui igya. 4 Lene bidip huk noni leu binhyepo ngkwei hanyen au. Gima rino gwam ei sirima biyem njita ba, bibong bit nitnem mien dima mem mmun-njap ningai. 5 Ug bipek njap gi nibitai lene ikiju mem njap tekti ba, inyohou dimig ide ndigban bipi bimbut ri. Noro nitnem mien nicig pai <<Ma jiyem njita ndia hi bibou jinghuisi sindem ug e. Leu api jinyohou mbut ug.>>6-7 Leu api no di ntun Lewi him dima gwam bit misop dima nicig ba, igyem njita. Noro tirigi noni kiju bimbut ug rin lene misop dima nicig pai-hi-pai yokti ser nhyema yuug au e. Noni pai <<Handei kon ba, angon nggei-hi-nggei nipou ug e. Gima rino ma abong bit nye mem mmun gom kin bu. Leu api no di ntun Lewi him dima gwam bibong mem mmun gom kin bu.>>
8 Ei njap gi nimuhwi njap tekti pinyo tirigi noni joi sut kiju bimbut lene misop dima nicig pai binoni hanyen bipai <<Yo, jiyem njita ndini bibou ariman ug e leu api jimbut.>> Leu api yo cin igyem njita bit yam lene ibindin-ndin nyen kikau ba, son dideu mmunti tu.
9 Leu api tirigi no dima kin nitnem mien kin nide awak ikiju bimbut ug rin lene misop dima nicig bidip huk bipai <<Son dideu mmunti tu ba, jei bi lene mmun nggai kep je ug ri. Nna ba jibong hak ei sirini leu binhyepo jingon nggei-hi-nggei. Njap di hyep bu lene ma jikiju mem njap tekti ba, jimbut bijingkwei hanyen ug.>>
10-11 Noro no dima kou sut gi bong hanyen bu ei sirima. Noni kin nitnem mien ikiju lene ibri bigwam ei ide keledai cin dip bimbut ba, awak dima cem bit yok. Tirigi mpia mmun ser yok tu lene yuug krau minu ndig Yebus (Yebus dima ne minu ndig Yerusalem ri). Leu api awak dima pai bak nide andigpoi <<Andigpoi e, jikwei ba, igwam ei sirini bibong bit mben Yebus hak ug.>>
12-13 Noro andigpoi buhup <<E bi! Nyeni mibong ei mpia di nye di mben Israel inyeng tak kep bi kan bi. Jikwei ba, imbut nut mbigom kin bu ug ei Gibea. Gino gi mbun ibong ei sirima kan bi lene ma imbut ug ei minu ndig Rama bibong ei sirima mem mmun dini.>> 14 Gima rino imbut kikau binjiriek Yebus. Tirigi yuug krau Gibea ei keret Benyamin de dihyei hanjop nsi lene mpia cut tu. 15 Lene igya hon Gibea bibong ei sirima. Leu api icoi ug ei minu ndig dima bigwam hak ei biyati. Noro hi di cigit yok kui nide ig mem gima ibong bit bi.
16 Tirigi igwam hak ei biyati dima lene andig-ndau gom di sindi kwei leu niyai midyai ei miaisi kwei. Nitimieisi leu nungug him Efraim rin lo, kwei bong timiei ei Gibea. (Timiei Gibea nindigsi nya intun keret Benyamin him.) 17 Tirigi andig-ndau ndima ngat no di ntun Lewi him di gwam ei mpia di jo bas hak dima lene hig ser <<Disut na e, akwei leu hantou ba, aug ei hantou i?>>
18 Lene no dima buhup <<Nyeni sindi nikwei leu Betlehem ei keret Yehuda ide dihyei hanjop nsi ba, ningkwei hanyen ug ei nyende igf di jo ting bibor ei nungug him Efraim. Mpia dima ne ditimieisi ri. Timiei minu ndig dini hi di cigit nye kui nide ig mem gima nibong bit mem mmun dini bi. 19 Nyeni nisuar mun nyeng hi-hi bi. Lewo nyende mun di nitin ei mem nimbutti dini dem mem nye. Gandum ntam kin njita di mem nyende keledai nya no jo a. Roti kin ba anggur ngei mem dani kin ditnem kin ditde awak cem no jo a.>>
20 Leu api andig-ndau ndima pai <<Ma jingon ku je tut au. Midicigit je kui ditde ig leu binhyepo jibong hak ei mpia di jo bas hak dini bi.>> 21 Leu api buwak yok ug ei nide ig bei biyai njita bak keledai di ide nya. Tirigi no dima kin nitnem mien ipiap yonti imig leu su lene igyem njita.
22 Noro tirigi igwam ba, ingon nggei-hi-nggei lene pinai timiei minu ndig dima di icut tut yam igkei nya ikwei binjei ttai ig dima. Itug-tug nyen dimbou lene ibipai bak andig-ndau ndima <<Akes no di pinai di acigit kui ade ig dima kwei binye lewo nijoi sut niyem njita tut noni!>>
23 Noro andig-ndau ndima hei ug ei nisai bitte tut yok <<Disut bat jen, dahara ser je pia ma jiyai nok gima au! Ma jibon mun di kinei bibor di dem mem tungwatu ibon biyamti bi dima au. Lewo dicigit no dima kui ditde ig bibong bit da. 24 Midikes nitnem mien kin dipmisop di gwam nitta pilei ei jinda nsi ba, jicut tut yoni sindam bit leu jingon kanti. Noro ma jibon mun di kinei bibor tut no di kwei bong bit da dima au!>> 25 Noro yo di ibon munti kinei bibor dima ingkek ndok kikau bibou no di ntun Lewi him dima rok nitnem mien dima ug ei nisai mem yok ug e. Leu api ikat misop dima ba, icut tut noni sindam bijo kikau bipek njap tekti.
26 Njap tekti di misop dima ngkwei hanyen rino tti bimai bihigom kui andig-ndau dima nide dimbou hui ei mpia di nijjep bong pima. Mpia pri tu lo, ningut jo ei nitti eisi dima. 27 Tirigi nijjep kiju mem njap tekti bikau dimbou bimbut rin lene ngat lo, nitnem mien no rino tti di bong njiti kui dimbou hui lene su ninda bikrau dimbou a. 28 Lene nijjep win bipai bak <<Akiju ba, imbut ri.>> Noro misop dima buhup bi lewo mai su. Leu api noni kon ningut bikes ei nide keledai dip leu api kiju bimbut ba, ngkwei hanyen ug ei nide ig bei. 29 Ug krau nide ig tu lene coi biyai singau leu api digo nitnem mien ningut dima ninggriet simnaibrimigcanti. Gima leu lene pinak ninggriet di kos dima yok bak keret mben Israel simnaibrimigcan. Lene ba ninggriet dima gom-gom bibikwop keret gom-gom. 30 Lene yo di ingat ninggriet dima bou igyai him yahagom ipai biyam <<Nipou yo mpe di nye di mben Israel yehei leu minu Mesir kikau kwei bipek ammani kep lene mun di bindei di igyai kou nok gini hi cut igkep nye bi sren! Gima rino ma igwam tut ei bi! Ma imbrap tut leu binhyepo ikiju tut mun di buhun dini!>>