Simson ug ei minu ndig Gaza
16
1 Mpe di gom bu ne Simson ug ei minu ndig Gaza ei mben Filistin ide minu leu api um sop sundal gom bicut tut. 2 Tirigi mben Gaza ikan tut Simson nikweisi tu lene tentara di ide nya igyon ttai minu dima bimem kep ser nimbutti mem mmun dima kikau bipek njap tekti ei dimbou hui di itu ei ngug tig. Yoni iku yok nyahan kikau mem mmun jei dima bikan <<Ibet ingon mem njap tekti leu api igya ser noni bihwen ug.>> 3 Noro Simson kiju mem mmun mau ba, ug ei dimbou hui pima bitiba dimbou ningat kin nidihim nya kin binggam mbou titut yam bikon ei ninghat dip lene mbut tut kikau bikui ug ei mbigdip ei Hebron nite hi.Simson kin Delila
4 Gima ngwig lene Simson mpig bou kep Delila di bong ei Mbang Briep Sorek. 5 Lene nibou ndig mben Filistin ibou muhwi induk yam ba, yuug ngat Delila bipai binoni <<Ma aba ahyet mmau bidip huk Simson leu binhyepo noni mimbot kep tut nide nisindemti nibousi kin nisinati mem gima nikat ba, ningot noni leu binhyepo noni sindem bu bi. Bikwop nyeni nibou muhwi nahagom miniba mitiei perak ningat sribu gom sratus gom binibingot kep na.>>
6 Gima rino Delila hig ser Simson <<Gino ajoi sut da lene ma ambot kep bida tut ade nisindemti nibousi. Notou tungwatu nya mingot amig-anda bibindei ba, asindem bu bi i?>>
7 Lene Simson ris bak <<Gino tungwatu nya iba biyap di ngun-ngau nimig muhwindacan bingot dimig-dinda lene midinghuisi jet dem kep nok tungwatu nindigsi nya.>>
8 Gima rino nibou ndig mben Filistin pima ikkin biyap di ngun-ngau nimig muhwindacan kwei ba, igyai bak Delila. Lene noni ngot Simson nimig kin ninda bingkiem. 9 Noro Delila kuk mben Filistin nyahan ei nghim nsi hi ter nipou su. Gima rino tirigi noni ngot Simson tu lene ba nihyet nindig bicuk noni bipai <<Simson e, mben Filistin ikwei su!>> Noro Simson bindei ba, biyap hagom tun bingwig dem kep nok mong mbrei di hum yem ba, ningwes ngun. Nimimun tut nide nisindemti nibousi jo nding leu yok.
10 Lene Delila lua bak bipai binoni bu <<Abicum! Aba da bikek. Gino ajoi sut da lene ma ambot kep bida tut notou tungwatu nya mingot amig-anda.>>
11 Lene noni ris bak <<Gino iba kuk mbrei di nijep-jau bingot dimig-dinda lene dinghuisi jet dem kep nok tungwatu nindigsi nya.>>
12 Gima rino Delila ug yai kuk mbrei di nijep-jau bibingot Simson nimig-ninda leu api mbrua cuk noni bipai <<Simson e, mben Filistin ikwei su!>> Mpe dima cem mben Filistin nya iku yok ei nghim nsi gi ter. Noro Simson bindei ba, kuk mbrei bitun bingwig dem kep nok mong mbrei he.
13 Lene Delila lua bak mbigom kin bu bipai binoni <<Abicum! Aba da bikek nindig bibor! Gino ajoi sut da lene ma ambot kep bida tut notou tungwatu nya mingot amig-anda.>>
Lene noni ris bak bu <<Gino aba dibou nta di jei dini bibien kin kuk di ibingot kin hat mbrei nindig gom leu api iba keu gom bisibui hagom bingkiem-kiau lene midinghuisi jet dem kep nok tungwatu nindigsi nya.>>
14 Lene Delila bindei ba, Simson bong mai leu api bien Simson nibou nta di jei bibor kin kuk di ibingot kin hat mbrei leu api ba keu gom bisibui hagom bingkiem-kiau. Lene Delila win noni bipai <<Simson e, mben Filistin ikwei su!>> Noro Simson kiju biya lene brim nibou nta ba, hagom kus kwei leu hat mbrei dima.
15 Gima rino Delila hig ser noni <<Apai ei ahui him bipia angon ngakei da noro angon hou ser da tirigi aba da bikek mbiningai su. Lewo ambot kep tut ade nisindemti nibousi bida bigyo.>> 16 Lo bi lene noni bidip huk Simson bikwop njap ngwa hagom bibindei ba, Simson nibou ngwak sibui nindig bibor. 17 Apino Simson mbot kep brei binoni tut nide nisindemti nibousi bipai <<Dibet dibou nta jei ba, hi kos bi sren. Dicig dipmem idimig da ei mem Allah habiei dimien nok no di coi bit nimpung nazir. Gino hi kos dibou nta lene gima mibindei ba, dinghuisi jet dem kep nok tungwatu nindigsi nya.>>
18 Tirigi jo nibreisi mem Delila bipia Simson mbot kep binoni tut nide nisindemti nibousi tu lene noni sok nihyet bak nibou ndig mben Filistin pima bipai biyok <<Ma jikwei ngat da mbigom kin bu lewo Simson mbot kep tut hagom bida tu.>> Gima rino nibou ndig nya induk yam bipwoi mitiei pima kwei. 19 Lene Delila bindei ba, Simson bong mai hanyen bu. Lene noni hig tungwagom kwei kos Simson nibou nta hagom leu. Delila nok nikinei sut nijjep Simson apino nide nisindemti pror hak leu noni. 20 Lene Delila ba nihyet nindig bicuk noni mbigom kin bu bipai <<Simson e, mben Filistin ikwei su!>> Lene Simson kiju biya lene kan <<Misingwes ngun leu mun di kat sa nok gi nipou pima ug ri.>> Lewo kan bigya TUHAN ningat rin bit noni noro bi. 21 Lene mben Filistin ikat noni bitak niyai. Lene ibuwak noni ug ei Gaza leu api iba lante ngkimom-tembaga biteu nimig-ninda ei ide ig bui nsi. Ei sirima lene noni yai kep midyai gi sibui tig huk mbrei di nindig bibor. 22 Noni yai kep midyai dini mem nijam di jei apino nibou nta hei bijei hanyen.
Simson niyaijo ningwig honti
23 Jei bi lene nibou ndig mben Filistin nya induk yam leu binhyepo ibon pesta nindig bibor bibui mindhe-ndhe nya bak ide kwar Dagon. Yahagom imbos-hi-mbos bipai <<Kwar dima bindei ba, ide siceu Simson cut bak nyeni tu!>> 24 Tirigi nibou ndig dima yok ingon llei bibor ba, ingon nggan-triot cem lene icuk yam <<Jikwei ba, ihig nibou ig bui bicen Simson kwei biya ei nyeni yoho bei leu binhyepo iba noni bikek.>> Gima rino hi cen Simson kwei leu api yahagom iba noni bikek. 25 Tirigi mben Filistin ingat Simson ningat lene yahagom imbos-hi-mbos bipai <<Kwar Dagon bindei ide siceu di nggek ide minu lene biyai nimai bak ide mben imang bibor pima cut bak nyeni tu!>> Lene icuk Simson ug ya kui cou nipmem nidihim can ninggreti. 26 Lene Simson pai bak munggwom pinai di cen noni kwei <<Acen da bidiya kui cou nipmem nindig can di hati tut ig ndig dini.>> 27 Ig ndig dima mpung tut pinai nya kin sop nya imang bibor bitut nibou ndig ibou muhwi pima cem. Lene ibou sribu ningai bu ingwig ei ninsi di nindig bibor di jo ei ig jou gi nidip hu kwei ba, yahagom iba Simson bikek bou igyai him.
28 Lene Simson ngat nadi bipai <<TUHAN Di Ninyeng Jei Bibor e, ma ayok ngon kep da. Dingat nadi leu binhyepo Na di Allah asindem tut da mbigom kin bu he. Leu binhyepo midibirop hanyen bak mben Filistin drek dip diyai njep cin di itak tu.>> 29 Lene noni ya ei cou nipmem can pima nikieti leu api kes ninda prak bingget cou ei nite hi ba, kes ninda com bingget cou ei nite hi bu lene birok hacem leu yam. 30 Lene ba nihyet nindig hara <<Nna ba dimai bihigom bit mben Filistin nya hak ug!>> Leu api ba nisindemti birok cou dima hacem kikau apino ig nibousi dima titut yam lus ug ei dihyeisi bibindei ba, nibou ndig ibou muhwi kin ide limwa nya yahagom kin Simson nonti imai bingwig. Gima rino Simson ba nimaisi dima bibindei ba, mben Filistin imangti nindig bibor imai leu gi po niyaijo leu api yai nimai biyok pima.
31 Lene nikindig bat-nikinjoi bat nya kin nide bat nindigsi nya ikwei kon ningut bingkwei sut ba, itig ei nicig Manoah nide hak mihyeti ei Zora kin Esytaol nikieti.
Simson ninyeng tak kep mben Israel mem ari bingwam ningot can.