SRAT NIJAM NIKEI NYA
Ningginausi di bon ninyeng ei srat diniti pai binye bipia gino mben Israel ingon gom tut Allah lene ibong kei igwam kei noro gino ibit Allah nihyet bi lene mun di buhun bibor cut igkep yok. Mbro nok gima lo, Allah tin ei bikwop njap ngwa hagom mem gima mpu Nide limwa nya gino ittin ser ide sisar bingkwei hanyen ndam Noni.
Nirop Ninda Ndigsi
Mun di pek kep mem mben Israel hi kin bu ug bipek kin Yosua nimaisi 1:1--2:10
Nipui mun tut nikei nya di ibie tut mben Israel 2:11--16:31
Mun di pek kep mem yok bu nipou tirigi ide nibou ndig kiju mem yok bigyo 17:1--21:25
Keret Yehuda kin Simeon ikat nibou ndig Adoni-Bezek
1
1 Tirigi Yosua mai leu su lene mben Israel ihig ser TUHAN <<TUHAN e, keret di tou leu nyeni nikieti rima suar kiju biya bibie mem gima kon pran bit timiei minu Kanaan i?>>2 Lene Tuhan buhup <<Ma tentara keret Yehuda ikiju bigya bibie. Diyai nisindemti biyok leu binhyepo injei ihwen minu dima leu bigyati.>>
3 Lene tentara keret Yehuda icom ighyet bak tentara keret Simeon bipai biyok <<Ma jimpu nyeni ba, ikon pran bit timiei minu Kanaan leu ba, niyai nyende dihyei hanjop nsi di TUHAN kos tut bak nye biniyati. Leu api nyeni cem minimpu jeni ba, injei bihwen jide siceu nya leu jide dihyei hanjop nsi di TUHAN kos tut bak jeni ba, jiyai bijiyati.>> Leu api tentara keret Simeon, 4 kin Yehuda itti kin yam ba, ikon pran bit ide siceu nya. Lene TUHAN bindei ba, ibindei timek timiei mben Kanaan kin Feris ningwig a. Siceu ide tentara nya ibou sribu simnai imai biwer nimbiam ei Bezek. 5 Lene itau kep Adoni-Bezek di nok nibou ndig ei minu dima ba, ihwen. 6 Adoni-Bezek nang noro yuhuk bram bikat leu api ikkin ninda pmem hacem kin nimig nda pmem hacem leu. 7 Apino Adoni-Bezek pai <<Nipou yo lene dikkin nibou ndig ibou ningot muhwindacan inda pmem hacem kin imig nda pmem hacem leu su. Lene disindui sut yok ba, igyem njita ninir di cut ei ditde meja behei a. Gima rino Allah yai nok gima tut dani mem njap di ammani dem kep gi po dibibon yoni pima.>> Leu api ikri Adoni-Bezek ug ei minu ndig Yerusalem ba, noni mai ei sirima.
Tentara keret Yehuda ibindei timek minu ndig Yerusalem kin Hebron leu bigyati
8 Mpe dima lene tentara keret Yehuda icut igkep minu ndig Yerusalem ba, ihwen timiei minu dima leu api igyai bigyati. Lene ibindig minu ndig dima ba, ibiyai nimai bak limwa minu ndig Yerusalem nya cem. 9 Tirigi ihwen minu ndig Yerusalem bicut leu su lene icut igkep timiei minu Kanaan di ibong ei nungug him kin gi hi di ibong ei nungug kiou nya kin gi hi di ibong ei iggum ndigsi nite bei mpia nibiho cem bihwen yok. 10 Lene ihwen timiei minu Kanaan di ibong ser minu ndig Hebron cem. Minu ndig Hebron di nipou yo lene ijem ninyeng Kiryat-Arba. Tentara keret Yehuda injei siceu bihwen Sesai kin Ahiman kin Talmai yahagom ide bat nya cem ba, ibindei timek yok ei mpia dima.
Otniel bindei timek minu ndig Debir
(Yos. 15:13-19)
11 Mpe dima lene tentara keret Yehuda ijo leu Hebron ba, ihwen timiei minu ndig Debir nya cem. Mpe dima ijem minu ndig dima ninyeng Kiryat-Sefer. 12 Kaleb di ntun keret Yehuda him pai <<Tungwa tou rino hwen Kiryat-Sefer ba, yai biyati lene no dima mibuwak dipmisop Akhsa nok nitnem.>> 13 Lene Otniel di Kaleb nikinjoi Kenas nipmot bindei timek minu ndig dima leu biyai biyati leu api Kaleb yai nipmisop Akhsa bak nok nitnem. 14 Njap niwak yamti dima dem tu lene Otniel bidip huk Akhsa leu binhyepo hara nicig tut dihyei hanjop nsi ndia hi kin bu. Leu api Akhsa kinyon leu nide keledai dip lene Kaleb hig ser tut ningon kanti. 15 Lene Akhsa buhup <<Arig e, dahara nani tut minyei yaisi ningat poi lewo dihyei di Arig kwas tut da pima jo ei mpia di ngak-caisi.>> Lene Kaleb kwas minyei yaisi ningat can tut nipmisop dima ba, hi jo kui nai lene hi jo butnap.
Tentara keret Yehuda kin Benyamin ibindei timek ide siceu nya
16 Musa nicig nipmang de nintun him yamti di bram yam nya ne mben Keni rin ba, yo dini ibit keret Yehuda ba, yehei leu minu ndig Yerikho po dui sraba ninghousi pima ba, yuug ei iggum ndigsi Arad nite bei mpia nibiho ei Yehuda ide dihyei hanjop nsi. Lene ibong timiei ei sirima srig mben Amalek ikieti. 17 Leu api tentara keret Yehuda injei bit tentara Simeon bu ba, icut igkep timiei minu Kanaan di ibong ei minu ndig Zefat ba, ibindei timek yoni. Lene isigion minu ndig dima leu api ibindei sar ningwig a. Leu api ijem ninyeng Horma. 18-19 TUHAN mpu tentara keret Yehuda apino injei bihwen minu ndig ei nungug him lene ibiyai ba, igyati. Noro dem mem gima ihwen minu ndig Gaza kin Askelon kin Ekron bitut minu ndig di gahai nya kan bi. Lewo timiei di ibong ei muk nipimat dima inyeng tut kroba pran di iba ngkimom nitu bibon nya. Gima rino dem tut gima tentara keret Yehuda ijji yok leu ide minu ndig nya kan bi. 20 Lene Kaleb tug ndei minu ndig Hebron bit leu nok Musa nicukti pinipou yo pima lewo nipou yo lene noni jji yo di intun Enak him ide bat nya nimpung ningai leu. 21 Noro bit bon tentara keret Benyamin ijji timiei Yebus leu minu ndig Yerusalem kan bi. Gima rino timiei Yebus nya ibong timiei ei sirima bit keret Benyamin.
Tentara keret Yusuf ibindei timek minu ndig Betel
22-23 Lene tentara keret Efraim kin Manasye di intun Yusuf him injei bihwen minu ndig Betel ba, TUHAN mpu yok. Mpe dima lene minu ndig Betel ninyeng rino Lus. Mpe dino ipinak tungwatu nya ug ndam minu ndig dima mem gima igyok itta kep, 24 lene yuum pinai gom di jo leu minu ndig dima lene ipai bak <<Gino ampu nye ba, ando puig binye leu binhyepo nicoi ug ei minu ndig dima lene minuubon nani nok gi kei.>> 25 Leu api no dima ndo puig dima biyok leu api tentara keret Efraim kin Manasye icut igkep minu ndig dima bigyai nimai bak yo di ibong eisi nya yahagom. Noro tut no po yuum pima kin nide bat nya ne igyai nimai biyok bi. 26 Jei bi lene no dima pri leu minu ndig Betel buug ei mben Het ide hanjop nsi leu api win minu ndig gom ei sirima lene jem ninyeng Lus ba, ninyeng dima no jo kikau kwei bipek ammani kep.
Timiei minu Kanaan di mben Israel igijji yok bi nya
27 Noro tentara keret Manasye igijji timiei minu ndig Bet-Sean kin Taanakh kin Dor kin Yibleam kin Megido bitut minu mien-mien di jo ttai nya bi. Gima rino timiei minu Kanaan dima ibong kikau bit yok ei minu ndig dima yok. 28 Ningat lene tirigi mben Israel ide nisindemti kum eisi tu lene yuubon timiei minu Kanaan dima yok ba, iba yok biyai midyai mem yoni. Noro igijji yok bihigom leu minu ttou nsi dima bi sren.
29 Lene tentara keret Efraim ijji timiei minu Kanaan di ibong ei minu ndig Gezer cem kan bi. Gima rino timiei minu Kanaan dima ibong kikau bit yok ei minu ndig dima. 30 Lene tentara keret Zebulon igijji yo di ibong ei minu ndig Kitron kin Nahalal cem bi. Gima rino timiei minu Kanaan dima ibong kikau bit yok ei minu ndig dima. Noro mben Israel yuubon yok ba, iba yok biyai midyai mem yoni.
31 Lene tentara keret Asyer igijji yo di ibong ei minu ndig Ako kin Sidon kin Ahlab kin Akhzib kin Helba kin Afek kin Rehob cem bi. 32 Gima rino timiei minu Kanaan di ibong ei minu ndig dima ibong kikau bit keret Asyer.
33 Lene tentara keret Naftali igijji yo di ibong ei minu ndig Bet-Semes kin Bet-Anat cem bi. Gima rino timiei minu Kanaan ibong kikau ei minu ndig dima bit keret Naftali. Noro keret Naftali yuubon yok ba, iba yok biyai midyai mem yoni.
34-35 Lene mben Amori ibong kikau ei minu ndig Ayalon kin Saalbim kin Nungug Heres. Lewo ibison huk keret Dan ug ei nungug him lene isindui sut yok ba, ijuk kwei ei briep bou him dima bi. Noro keret Efraim kin Manasye yuubon mben Amori ba, iba yok biyai midyai mem keret cin dini.
36 Mben Amori ide minu niya kwas yamti mbut bikriau minu ndig Sela nijjai ba, njiriek Nitinggoisi Akrabim.