Minu ndig nya mem keret Lewi
21
1-2 Mpe di gom bu lene nibou mem keret Lewi nide bat nya yuug ei Silo ei minu Kanaan bingat Imam Eleazar kin Yosua kin nibou mem keret mben Israel nindigsi nya ide bat nya. Ba, ipai biyok <<TUHAN pai nicukti tug hon Musa bipia suar nye di nintun Lewi him nitug ndei minu ndig nya poi ba, nibongti ba, nitug ndei ngoi dumti nya di jo ttai minu ndig nya poi dima mem nyende mindhe-ndhe di nihyen kep nya cem.>> 3 Leu api mben Israel ibit TUHAN nicukti ba, ikwas yonti ide minu ndig nya poi bitut ngoi dumti nya cem tut yo di intun keret Lewi him dima.4 Yo di itug ndei ide minu ndig nya nimbie him ngat rino ig bei nsi gom-gom leu Kehat nide bat nya di intun keret Lewi him. Yo di intun Imam Harun him dini itug ndei minu ndig simnaibrimigningai ei keret Yehuda kin Simeon kin Benyamin ide hanjop nsi di inyeng tak kepti nya. 5 Lene ig bei nsi gom-gom leu Kehat ninsi de nindigsi nya itug ndei minu ndig simnai ei keret Efraim kin Dan kin Manasye di ibong ei Minyei Yordan nite bei mpia nicutti ide hanjop di inyeng tak kepti nya.
6 Lene Gerson nide bat nya itug ndei minu ndig simnaibrimigningai ei keret Isakhar kin Asyer kin Naftali kin Manasye nite hi di ibong ei Minyei Yordan nite bei mpia nipriti ide hanjop nsi di inyeng tak kepti nya.
7 Lene bikwop ig bei nsi gom-gom di leu Merari nide bat nya itug ndei minu ndig simnaibrimigcan ei keret Ruben kin Gad kin Zebulon ide hanjop nsi di inyeng tak kepti nya.
8 Nibou mben Israel iba nisinati dima bikwas ide minu ndig nya poi bitut ngoi dumti nya tut keret Lewi nya tug hon gi iko ba, ibinggok tutf gima dem igbit nicukti di TUHAN sok ei Musa dip bak yoni.
Minu ndig di Kehat nide bat nya itug ndei
9-19 Lene imam Harun de di intun him noni di bram yam di leu Kehat nide bat nya di intun keret Lewi him itug ndei ide minu ndig nya nipou ngat. Itug ndei minu ndig simnaibrimigningai bitut ngoi dumti di jo ttai nya. Itug ndei minu ndig muhwindatai ei keret Yehuda kin Simeon ide hanjop nsi di inyeng tak kepti. Minu ndig dima yok rino Libna kin Yatir kin Estemoa kin Holon kin Debir kin Ain kin Yuta kin Bet-Semes kin Arba (Arba ne Enak nicig ninyeng ri) lo, nogindini Arba yai ninyeng hi Hebron ba, Hebron ne minu ndig ninang coi gom ei nungug him keret Yehuda ri. Noro Kaleb di Yefune nipmot tug ndei nggreisi di briep kin minu mien nya ei hanjop dini nipou su. Lene imam pima yok itug ndei minu ndig Gibeon kin Geba kin Anatot kin Almon ei keret Benyamin ide hanjop nsi di inyeng tak kepti.
20-26 Kehat nide bat nya ide ig bei nsi gom-gom hiter bu itug ndei minu ndig simnai bitut ngoi dumti nya cem. Itug ndei minu ndig bitai dino Bet-Horon kin Kibzaim kin Gezer kin Sikhem ei keret Efraim ide hanjop di inyeng tak kepti. Sikhem ne minu ndig ninang coi ei nungug him keret Efraim ri. Lene itug ndei minu ndig bitai dino Alteke kin Gibeton kin Ayalon kin Gat-Rimon bitut ngoi dumti di jo ttai nya ei keret Dan ide hanjop di inyeng tak kepti. Lene itug ndei minu ndig can ei keret Manasye nite hi di ibong nite bei mpia nicutti ide hanjop nsi di inyeng tak kepti. Minu ndig can dima rino Taanakh kin Gat-Rimon bitut ngoi dumti di jo ttai nya.
Minu ndig di Gerson kin Merari ide bat nya itug ndei
27-33 Keret Lewi ninsi de gom bu ne Gerson rin ba, yoni itug ndei minu ndig simnaibrimigningai bitut ngoi dumti di jo ttai nya. Itug ndei minu ndig can dino Beestera kin Golan ei keret Manasye di ibong ei nite bei mpia nipriti ide hanjop nsi di inyeng tak kepti. Golan ne minu ndig ninang coi gom ei minu Basan ri. Lene itug ndei minu ndig bitai ei keret Isakhar ide hanjop nsi di inyeng tak kepti ba, minu ndig bitai di itug ndei leu keret Isakhar dima rino Kisyon kin Dobrat kin Yarmut kin En-Ganim. Lene itug ndei minu ndig bitai ei keret Asyer ide hanjop nsi di inyeng tak kepti ba, minu ndig bitai di yo di intun keret Asyer him itug ndei dima rino Misal kin Abdon kin Helkat kin Rehob. Lene itug ndei minu ndig ningai ei keret Naftali ide hanjop nsi di inyeng tak kepti ba, minu ndig dima yok rino Hamat-Dor kin Kartan kin Kedes. Kedes ne minu ndig ninang coi gom ei Galilea ri.
34-40 Lene keret Lewi ninsi de niken rino Merari ninsi de ba, yoni itug ndei minu ndig simnaibrimigcan bitut ngoi dumti di jo ttai nya. Itug ndei minu ndig bitai ei keret Zebulon ide hanjop di inyeng tak kepti ba, minu ndig bitai dima rino Yokneam kin Karta kin Dimna kin Nahalal. Lene itug ndei minu ndig bitai ei keret Ruben ide hanjop di inyeng tak kepti ba, minu ndig bitai dima rino Bezer kin Yahas kin Kedemot kin Mefaat. Lene itug ndei minu ndig bitai ei keret Gad ide hanjop di inyeng tak kepti ba, minu ndig bitai dima rino Mahanaim kin Hesybon kin Yaezer kin Ramot. Ramot ne minu ndig ninang coi gom ei hanjop Gilead ri.
41-42 Gima rino mben Israel ikwas ide minu ndig di inyeng tak kepti nya nimangti ningot bitai ba, muhwindaningai bitut ngoi dumti di jo ttai nya tut keret Lewi nya.
Mben Israel ijem minu Kanaan bou yok nok ide
43 Tug hon nisinati dima lene TUHAN yai minu titut yam po Noni ba neheng bipreu kep mben Israel idigup bat-idigai bat nya tut pima bak mben Israel. Tirigi limwa mben Israel ibindei timek timiei minu ndig nya dima leu lene igyai bigyati bibong kikau ei sirima. 44 TUHAN nyohou mben Israel bibindei ba, ibong kei igwam kei ei minu dima nisurti-nipekti bit leu nok Noni preu ei mem idigup bat-idigai bat nya tu. Ide siceu nya hi di brim ningkek mem gima hwen yok bi. Lewo TUHAN yai nisindemti bak mben Israel leu binhyepo ibindei timek siceu nya yahagom. 45 TUHAN yai mun bipek kep nipreu kepti nya hagom bak mben Israel. Noni sindui sut gom ei cem bi sren.