Minu ndig ninang coi nya
20
1 Leu api TUHAN pai bak Yosua bipia, 2 pai bak mben Israel <<Disok dihyet ei Musa dip bak nani nipou su tut minu ndig ninang coi nya. Minu ndig dima yok mem gima tungwatu nya inang coi leu binhyepo iba minu ndig dima bicuon yonti igyaisi. Nogindini ma ando igbit minu ndig dima yok nijoti nya. 3 Ma no di yai nimai bak hiter kin gi bisinggre bi lo, yai nimai bak hiter tu dima nang bicoi ug ei minu ndig ninang coi dima leu binhyepo ba minu ndig dima bicuon niyaisi leu no tin ei mem buhup nimai pima. 4 Gima bon nituti mem noni nang ug ei minu ndig ninang coi di jindo ei su gom. Leu api nang kikau ug bipek dimbou pmem nuhui di nok mpia di nikei nya imbus dat munhyet eisi. Suar noni pai igbit tut mun di cut igkep noni bak nibou dima yok. Apino yoni misindui sut noni bicoi ug ei minu ndig dima lene mindo mpia ttou nsi ndia hi bak bibong niti. 5 Gino no di tin ei mem buhup nimai pima huk bram kikau ug ei minu ndig ninang coi dima lene ma nibou pima yok ikat no di ningon mui pima bikes bak no di buhup nimai dima au. Suar ingkiem ser noni. Lewo noni bisinggre biyai nimai bak no dima bi ba, ningon mbuk tut nipou ei cem bi. 6 Ma jisindui sut noni bibong nyahan ei sirima bibou nikei nya imbus ningonti ei timiei nya ei minu ndig dima yoho bei ug e. Nok gima cem bibou Imam Nindig ei nijam dima cem mai leu ug e. Leu api handei kon ba, no dima ngkwei hanyen ug ei nitimieisi di noni nang leu pima hak ug.>>7 Lene nibou mben Israel indo minu ndig poi ei Minyei Yordan nite bei mpia nicutti dini jug nok minu ndig ninang coi nya. Minu ndig Kedes ei nungug him keret Naftali ide ei Galilea kin Sikhem ei nungug him keret Efraim ide kin Hebron ei nungug him keret Yehuda ide. 8 Lene yoni indo minu ndig poi ei Minyei Yordan nite bei mpia nipriti ei briep bou him di nok iggum ndigsi dini jug nok minu ndig ninang coi nya bu. Minu ndig Bezer ei keret Ruben de hanjop di inyeng tak kepti kin Ramot ei Gilead di keret Gad de hanjop di inyeng tak kepti kin Golan ei minu Basan di keret Manasye de hanjop di inyeng tak kepti. 9 Gima ne minu ndig ninang coi nya hagom di nibou nya indo mem limwa mben Israel yahagom kin ngkiai nya di ibong ei ikieti nya cem ri. Bikwop no di bisinggre biyai nimai bak hiter bi lo, yai nimai bak hiter dima tu ne nang bicoi ug ei minu ndig dima yok gom. Leu binhyepo ba minu ndig dima bicuon niyaisi leu no di huk bram bijoi sut buhup biyai nimai bak a. Gino imbus no di nang coi pima ningonti ei timiei nya yoho bei bigyo lene ma nibou nya igyai nimai bak noni au e.