Nikwas dihyei hanjop nsi ei Minyei Yordan nite bei mpia nicutti
14
1 Gini jug ne nipui sut notou ikwas minu Kanaan ei Minyei Yordan nite bei mpia nicutti tut mben Israel ri. Yo di ikwas minu dima tut mben Israel rino Imam Eleazar kin Yosua di Nun nipmot kin nibou mem Israel insi de gom-gom nya. 2 Suar ikwas minu ei Minyei Yordan nite bei mpia nicutti tut Israel ide keret muhwindatai biniken tug hon mun di iko bibinggok tutc dem igbit TUHAN nicuk Musati. 3-4 Musa kwas minu ei Minyei Yordan nite bei mpia nipriti tut keret can biniken di ter pima tu. (Gi kei mem igyok ngon kep bipia Yusuf de di intun noni him di bram yam ikwas canti binok keret can ba, nigom rino keret Manasye lene nican rino keret Efraim.) Noro Musa kwas dihyei hanjop nsi hi tut Lewi nya bi. Noni kwas minu ndig nya ningat poi tut yok binok mpia ttou nsi dima ibongti bitut ngoi dumti nya mem ide mindhe-ndhe nok sapi kin domba nya. 5 Gima rino mben Israel ikwas minu Kanaan tut yam tug hon nisinati dima dem igbit TUHAN nicuk Musati tu.Yosua kwas minu ndig Hebron tut Kaleb nya
6 Mpe di gom lene yo di intun keret Yehuda him ikwei ngat Yosua ei Gilgal. Lene Kaleb di Yefune di nimbier kim Kenas ninsi de dima nipmot pai bak Yosua <<Andigpoi e, akan kep mun di TUHAN pai bak Nide awak di Musa ei Kades-Barnea tut sani e? 7 Mpe dima lene TUHAN de awak dima pinak da leu Kades-Barnea leu binhyepo di kwei yok ditta kep minu dini. Mpe dima lene ditde njap ug ei ari bingwam ningot bitai su. Lene tirigi po dingkwei hanyen ndam Musa pima lene diba dingon di gom bitri tut mun di dingat bou diyai him. 8 Mpe dima lene yo di ibit da bikwei yok itta kep minu ndig dini yahagom ibindei ba, mben Israel idigit tut bibor. Noro diba dingon di gom bibit ditde TUHAN Allah nicuk dati. 9 Gima rino Musa preu kep da bipia dani kin dimunggwom bat nya minitug ndei dihyei hanjop nsi di dico niti dima hak bijo ninno bijo kikau. 10 Yosua e, mpe di TUHAN pai sut nihyet dima bak Musa kwei bipek ammani kep ug ei ari bingwam ningot bitai ba, muhwi tu. Mun dima pek kep mpe di mben Israel imbut-mbut nyen ei iggum ndigsi. Ba, TUHAN nyohou da apino diyaijo kikau kwei bipek ammani kep dem igbit TUHAN nitto ei bidati tu. Angat i! Ditde njap ug ei ari bingwam ningot muhwindaningai ba, muhwi tu. 11 Noro ditde nisindemti noyam kin mpe di po Musa pinak da kwei pima yo. Disindem mem gima dikon pran ba, diyai midyai nindigsi nya hagom cem. 12 Gima rino ma akwas minu ndig nya ei nungug him po TUHAN preu ei mem da mpe di po dani kin ditde limwa nya ningkwei hanyen binitri tut mun di ningat bou nyenti niyai him pima tut da. Mpe dima lene nitri tut bina bipia mben Enak di anjan bibor ingat rin ei mpia dima. Yoni ibong ei minu ndig ngat di ibon ngug tig ser. Mpaba TUHAN mimpu da ba, midijji yok dem igbit TUHAN nitto ei bidati pima.>>
13 Lene Yosua ngat nadi tindei mun di kei leu TUHAN Allah mem Kaleb di Yefune nipmot leu api kwas minu ndig Hebron tut noni kin yo di intun noni him. 14 Minu ndig Hebron dima ne yo di intun Yefune di nimbier kim Kenas ninsi de dima nipmot Kaleb ide minu ndig di itug ndei di bijo kikau kwei bipek ammani kep ri. Lewo noni ba ningon di gom bibit TUHAN Allah Israel nicuk noti. 15 Nipou yo lene ijem minu ndig Hebron ninyeng Arba. (Arba ne no di anjan ba, ninyeng jei bibor dor njiriek mben Enak nindigsi nya ri.)
Mpe dima lene mpia mbum-bra ei minu dima nisurti-nipekti apino mben Israel ibong kei igwam kei lewo nikon-kon nyen pranti bindin yok bu bi.