Minu ndig di suar mben Israel igyai bigyati
13
1 Ari bingwam mang ser leu api Yosua wer misar bibor tu. Lene TUHAN pai binoni,<<Yosua e, awer misar bibor tu. Noro minu ndig di suar mben Israel ibindei timek leu bigyai bigyati mang bibor no jo yo. 2-7 Nipou ne hanjop mben Kanaan ide bon minu niya kwas yamti ei Minyei Sikhor nyai gi dideu minu Mesir nite bei mpia nipriti kikau ug bipek kin minu ndig Ekron. Mben Awi kin Gesur inyeng tak kep hanjop nsi dima nite bei mpia nibiho lo, nibou ndig mben Filistin ibou muhwi inyeng tak kep minu ndig Gaza kin Asdod kin Askelon kin Gat kin Ekron bitut minu mien di gahai nya cem.
Lene hanjop hiter di mben Kanaan ide bon minu niya kwas yamti nite bei mpia nijjai ei minu ndig Meara. Mben Sidon inyeng tak kep minu dima. Minu niya kwas yamti dima mbut kikau bipek kin minu ndig Afek ba, sir minu di mben Amori ide kikau ug bipek kin puig di mbut llu kak Nitinggoisi Hamat. Nitinggoisi dima bon minu niya kwas yamti nite bei mpia nipriti bimbut ug ei nite hi bei mpia nibiho ug ei Baal-Gad ei Nungug Hermon nikiou leu api minu niya kwas yamti dima mbut bei mpia nicutti ug bipek kin Misrefot-Maim. Hanjop nsi di jo nite bei mpia nijjai dini bikrop ttai Nungug Libanon kin mben Geebal kin mben Sidon di ibong ei nungug him dima kikau bipek kin Misrefot-Maim cem.
Da di TUHAN midimpu je mpe dino jibindei timek mben dima bijijji yok ningwig a. Lene suar akwas minu di bon minu niya kwas yamti ei Minyei Yordan nyai kin Muk Hacan cem titut yam tut keret mben Israel muhwindatai kin keret Manasye niken cem lewo itug ndei dihyei hanjop nsi hi bou yok nok ide bigyo. Mpe dima lene bikwop keret gom-gom mibong nyahan ei nide hanjop nsi.>>
Dihyei hanjop nsi nya di ikwas tut yam ei Minyei Yordan nite bei mpia nipriti
8 Keret Ruben kin Gad kin Manasye nite hi itug ndei dihyei hanjop nsi leu Musa di TUHAN de awak tu. Ba, dihyei dima jo ei Minyei Yordan nite bei mpia nipriti. 9 Hanjop nsi dima ne minu niya kwas yamti ei Mbang Briep Minyei Arnon nyai lene bon nibresti kikau ug bipek kin minu niya kwas yamti nite bei mpia nijjai. Nibresti dini bikrop ttai minu ndig Aroer ei mbang pima nite dini kwei cem minu ndig Medeba kin Dibon bitut briep bou him ei nai ei minu ndig cin dima ikieti, 10 kin minu ndig di nipou yo Sihon di nibou ndig mben Amori di bong ei Hesybon ninyeng tak kepti nya hagom cem ba, minu ndig dini jo simin mben Amon ide minu niya kwas yamti. 11-12 Lene nibresti pima bikrop ttai minu ndig Gesur kin Maakha nya kin hanjop di Nibou Ndig Og ninyeng tak kepti bitut Nungug Hermon kin minu Basan titut yam kikau bipek kin Salkha cem. Og ninyeng tak kepti nibousi jo ei minu ndig can di Asytarot kin Edrei ba, noni ne no di ntun mben Refaimb him gi ningwigsi ri. Musa nya ibindei timek Sihon kin Og bitut ide limwa nya bijji yok leu api inang leu ide hanjop nsi dima nipou su. 13 Noro mben Israel ijji timiei minu ndig Gesur kin Maakha binang leu ide hanjop nsi dima bi. Ba, no ibong srig mben Israel ikieti kikau kwei bipek ammani kep yo.
14 Lene keret Lewi igitug ndei dihyei hanjop nsi hi leu Musa bi. Lewo TUHAN pai bak Musa nipou su bipia Lewi ide mun di itug ndei nya ne mikwau di indig ei nimbar hum dokti nya di mben Israel ibikuk yok bak TUHAN Allah Israel ri.
Dihyei hanjop nsi di Musa kwas tut keret Ruben
15 Musa kwas dihyei po TUHAN preu sut bak limwa mben Israel pima hanjop nsi nite hi tut keret Ruben ninsi de gom-gom ba, itug ndei dihyei dima nok ide bu. 16 Ide hanjop nsi ne minu niya kwas yamti ei nite bei mpia nibiho ei minu ndig gom ei Mbang Briep Minyei Arnon nyai nahacanti bitut minu ndig Aroer ei mbang briep dima nite dini kwei lene nibresti nite bei mpia nijjai bikrop ttai briep bou him di jo ttai minu ndig Medeba. 17-21 Sihon di nibou ndig mben Amori bong ei minu ndig Hesybon ba, ninyeng tak kep minu ndig nya ei briep bou him pima hagom nipou pini tu. Noro tini bu ne keret Ruben itug ndei dihyei hanjop nsi dima bitut minu ndig Dibon kin Bamot-Baal kin Bet-Baal-Meon kin Yahas kin Kedemot kin Mefaat kin Kiryataim kin Sibma kin Zeret-Hasahar di iwin ei nungug tou gom ei briep bou him pima kin Bet-Peor kin Nungug Pisga nimig kin Bet-Yesimot hagom.
Musa nya ibindei timek Sihon bigyai nimai bak noni kin nibou di inyeng jei ei Midian nindigsi nya di igya kui Sihon ba, inok nibou di inyeng tak kep Sihon de hanjop nsi nya nipou pini tu. Nibou dima yok inyeng Ewi kin Rekem kin Zur kin Hur kin Reba. 22 Mpe dima lene mben Israel igyai nimai bak Bileam di Beor nipmot po nung kui no bimbriom tungwatu nya igkei pima cem. 23 Minyei Yordan nite bei mpia nicutti bikkin keret Ruben ide dihyei hanjop nsi. Gima ne minu ndig nya kin minu mien nya di Musa yai biyok gom-gom ba, itug ndei nok ide dihyei hanjop nsi nya ri.
Dihyei hanjop nsi di Musa kwas tut keret Gad
24 Lene Musa kwas dihyei po TUHAN preu sut bak mben Israel pima hanjop nsi nite hi tut keret Gad ninsi de gom-gom ba, itug ndei dihyei dima nok ide bu. 25 Keret Gad de dihyei hanjop nsi rino Yaezer kin minu ndig hagom ei Gilead kin mben Amon ide minu nite hi kikau bipek kin Aroer ei minu ndig Raba nite bei mpia nipriti hagom ba, 26 hanjop nsi dima ne minu niya kwas yamti ei Hesybon nite bei mpia nibiho bibon nibresti kikau bipek kin Ramat-Mizpa kin Betonim nite bei mpia nijjai lene kikau bipek kin minu ndig Mahanaim kin Lodebar de minu niya kwas yamti, 27 kin Bet-Haram kin Bet-Nimra kin Sukot kin Zafon di Nibou Ndig Sihon ei Hesybon de minu di ninyeng tak kepti nikenti ei Mbang Briep Yordan hagom. Minyei Yordan nyai bikkin keret Gad de dihyei hanjop nsi nite bei mpia nicutti kikau bipek kin Igpong Galilea nite bei mpia nijjai. 28 Gima ne minu ndig nya kin minu mien nya di Musa yai bak keret Gad insi de gom-gom ba, itug ndei nok ide dihyei hanjop nsi nya ri.
Dihyei hanjop nsi di Musa kwas tut keret Manasye nite hi
29 Lene Musa kwas dihyei po TUHAN preu sut ei mem mben Israel pima hanjop nsi nite hi tut keret Manasye nite hi insi de gom-gom ba, itug ndei dihyei dima nok ide bu. 30 Keret Manasye nite hi ide dihyei hanjop nsi bon nibresti kikau bipek kin minu ndig Mahanaim bitut minu Basan titut yam po nibou ndig Og ninyeng tak kep pima ba, bitut minu mien ningot muhwindagom di Yair ninyeng tak kep ei minu Basan cem. 31 Dihyei hanjop nsi dini bikrop ttai minu ndig Gilead nite hi cem bitut nibou ndig Og de minu ndig pmem cin di Asytarot kin Edrei ei minu Basan. Musa kwas dihyei hanjop nsi dima hagom titut yam tut keret Manasye nite hi insi de gom-gom di intun keret Manasye nipmot Makhir him.
32 Tug hon nisinati dima ne Musa kwas dihyei hanjop nsi di birok kik minu ndig Yerikho ei Minyei Yordan nite bei mpia nipriti tut yok tirigi po noni ningat rin ei Briep Bou Him Moab pima. 33 Noro noni kwas dihyei hanjop nsi hi tut keret Lewi bi. Noni pai biyok bipia ide mun di itug ndei nya rino mikwau di indig ei nimbar hum dokti nya di mben Israel ibikuk yok bak TUHAN Allah Israel.