Yosua bindei timek Yabin bitut nimpung nibou ndig nibicom yam nya
11
1 Tirigi Nibou Ndig Yabin ei minu ndig Hazor miap Israel ninghapti tut gi ibindei timek ide siceu nya dima lene cuk tungwatu nya biyuug ngat Nibou Ndig Yobab ei minu ndig Madon kin nibou ndig nya ei minu ndig Simron kin Akhsaf, 2 kin nibou ndig nya ei nungug him nite bei mpia nijjai kin nibou ndig nya ei Mbang Briep Yordan ei Igpong Galilea nibiho kin nibou ndig nya ei nungug kiou kin nibou ndig nya ei les him dideu minu ndig Dor cem yahagom. 3 Lene noni sok nihyet bak nibou ndig mben Kanaan di ibong ei Minyei Yordan nite bei mpia nicutti kin nite bei mpia nipriti cem bak nibou ndig mben Amori kin mben Het kin mben Feris kin mben Yebus ei nungug him kin nibou ndig mben Hewi ei Mizpa di jo ei Nungug Hermon nikiou. 4 Leu api nibou ndig dima yok injei sut ide tentara nya di imang bibor ba, imangti noyam kin iggum ndung ei muk nipimat kwei. Ide kuda kin kroba pran cem mang bibor. 5 Nibou ndig dima yok bitut ide tentara nya ibicom yam ba, yahagom injei kwei ei mpia tou nsi gom dideu Minyei Pmot Merom ba, itin ei mem ikon pran bit tentara Israel.6 Lene TUHAN pai bak Yosua <<Ma attin tut yoni au. Lewo njap di hyep mporo ug cut nituti di noyam kin nituti dini lene midiyai nimai bak yoni yahagom drek dip je di Israel ug ri. Tirigi pran tun tu lene suar jikos kuda di ide nya imig nggiluk leu lene ma jindig kroba pran di ide nya hagom ningwig hak.>> 7 Lene Yosua ya tut nide tentara nya bihwen ide siceu nya kros dideu Minyei Merom. 8 Apino TUHAN bindei ba, tentara Israel ihwen yok bibindei timek yok leu api yuhuk bram nindigsi nya kikau ug ei minu ndig Misrefot-Maim kin Sidon nite bei mpia nijjai kikau ug bipek kin Mbang Briep Mizpa nite bei mpia nipriti. Pran dima cig-cai kikau ba, tungwagom ngat leu siceu dima yok niyaijo ei cem bi ba, yahagom imai ningwig hak. 9 Yosua bibon yok bit leu TUHAN nicuk noti nipou su. Ba, ikos kuda di ide nya imig nggiluk leu lene indig kroba pran di ide nya cem.
10 Lene Yosua nya ingkwei ba, ibindei timek minu ndig Hazor leu api igyai bigyati lene ibiyai nimai bak Nibou Ndig Yabin. Ei nijam dima ne Yabin ninyeng tak kepti sindem bibor dor njiriek minu ndig nindigsi ei minu dima hagom. 11 Leu api ndig minu ndig dima lene biyai nimai bak timiei nya yahagom. Isindui sut tungwagom ngat biniyaijo ei cem bi. 12 Yosua yai minu ndig dima yok hagom biyati. Lene kat nibou ndig nya biyai nimai biyok bit leu nok TUHAN de awak di Musa nicuk noti. 13 Noro tentara Israel indig minu ndig di iwin ei ig kumti nya gom cem bi. Noro Yosua nonti he rino ndig minu ndig gom ngat di Hazor. 14 Lene mben Israel igisindui sut limwa di ibong ei minu ndig dima yok igom biniyaijo ei bi. Noro igyai nimai bak yahagom ningwig a. Lene ipos ndigban di bon ninyeng nya hagom kin mindhe-ndhe nihyen kep nya hagom ba, ima nok ide bu. 15 TUHAN yai nicukti nya hagom bak Nide awak di Musa nipou su lene Musa kes nicukti dima yok hagom bak Yosua. Leu api Yosua yai igbit nicukti dima hagom. Noni tunggwei sut gom cem bi.
Minu di Yosua nya igyai di igyati nya
16 Yosua nya ibindei timek minu dima hagom leu api igyai bigyati. Minu di ibindei timek lene ibiyai bigyati dima ne nungug him nya kin nungug kiou nya nite bei mpia nijjai kikau ug ei nite bei mpia nibiho kin hanjop Gosyen bitut minu ndig di jo eisi nya hagom kin iggum ndigsi ei Gosyen nibiho kin Mbang Briep Yordan. 17-18 Minu dima nibresti jo bei mpia nibiho ei Nungug Gundul di dideu minu Edom kikau ug ei nite bei mpia nijjai bipek kin Baal-Gad ei Mbang Briep Libanon ei Nungug Hermon nibiho. Yosua nya ikon pran bijo ninno bit nibou ndig nya ei minu dima. Noro ikat yok ba, igyai nimai bak yahagom. 19 Mben Hewi di ibong ei minu ndig Gibeon he rino ibon gi preu bit mben Israel ba, ijem isut bit yam ser di igyaijo ei a. Ter leu gima lene yo di ibong ei minu ndig nya ei minu dima hi di bon gi preu bit mben Israel ba, jem nisut bit yoni bi. Ba, tentara Israel ibindei timek minu ndig nindigsi nya hagom tug hon gi ikon pran bit yok. 20 TUHAN bindei ba, yo dima ingon tindak bikon pran bit mben Israel leu binhyepo bon nituti mem tentara Israel yoom ingonti binggriu sut yok bi noro ibindei sar yahagom ningwig a. Igyaisi dima dem igbit TUHAN nicukti po kes ei mem yok tug hon Musa pima ri.
21 Ei nijam dima lene Yosua nya yuug ba, icok tut mben Enak di ibong ei nungug him. Mben Enak ne mben anjan bibor di ibong ei Hebron kin Debir kin Anab ba, ibong ei nungug him ei hanjop di keret Yehuda kin keret Israel nindigsi nya ide cem. Yosua nya igyai nimai bak yoni yahagom lene ibindei timek minu ndig di ide nya cem hagom. 22 Mben Enak ibou poi he rino inang di ingwes ngun ug ei minu ndig Gaza kin Gad kin Asdod. Noro igisindui sut yo di intun Enak him ba, tungwagom ngat niyai mohousi jo ei minu di mben Israel ibindei timek leu bigyai bigyati nya bi sren.
23 Yosua nya ibindei timek minu dima hagom titut yam lene igyai bigyati dem igbit TUHAN nicukti po kes bak Musa pima. Leu api noni yai minu ndig dima bak mben Israel binok ide minu ndig nya. Leu api ikwas minu ndig dima tut yam sindam ba, bikwop keret gom-gom itug ndei dihyei hanjop nsi gom-gom bidem yok.
Mpe dima lene mpia mbum-bra. Gima rino mben Israel ibong kei igwam kei lene ikes hon ba, ikon pran bi.