Mben Amori icut bak mben Israel
10
1 Mpe dima lene Adoni-Zedek di nibou ndig ei minu ndig Yerusalem miap Yosua ninghapti tut gi noni kin mben Israel ikon pran bit mben Ai binggek minu dima bitimek bingwig ba, igyai nimai bak timiei minu ndig Ai kin ide nibou ndig dem kep nok gi po ihwen mben Yerikho kin nibou ndig Yerikho pima. Lene noni miap tut mben Gibeon inghapti bipia ibindei ba, mben Israel ikwam minggwen bit yok bice tut yo dima ibong srig mben Israel ikieti. 2 Gima rino noni kin nide limwa nya yahagom ittin nindig bibor tut mun di cut igkep mben Gibeon. Lewo Gibeon ne minu nindig bibor dem kep nok minu nindigsi di ibon ide nibou ndig nya ri. Ba, timiei Gibeon nya imang ndig dor njiriek timiei minu ndig Ai nya cem ba, ide pinjoi ndig nya yahagom ibrim ingkek bikon pran kan. 3 Gima rino Adoni-Zedek sok nihyet bak nibou ndig Hoham ei Hebron kin nibou ndig Piream ei Yarmut kin nibou ndig Yafia ei Lakhis kin nibou ndig Debir ei Eglon bipai biyok, 4 <<Ma jahagom jikwei mpu da ba, ihwen mben Gibeon lewo yoni ikwam minggwen bit Yosua kin mben Israel tu.>> 5 Gima rino nibou ndig di mben Amori leu minu ndig Yerusalem kin Hebron kin Yarmut kin Lakhis kin Eglon yahagom injei siceu ba, ibiyon ttai Gibeon bikon pran bit timiei minu dima.6 Lene mben Gibeon isok ighyet bak Yosua di bong ei Gilgal bipai binoni <<Andigpoi e, ma asindui nye au! Akwei mpu nye nogindini! Lewo nibou ndig di mben Amori leu nungug him yahagom injei siceu leu api ide tentara ikwei bihwen nye tu!>>
7 Gima rino Yosua kin nide tentara bitut yo di isindem mem gima ikon pran yahagom ittei yam ba, ijo leu Gilgal mem gima ikon pran. 8 Lewo TUHAN pai bak Yosua <<Ma attin tut yok au. Dikos tut bipia yo dima yahagom micut bak jeni ug ri. Bit bon ade siceu hi ningwes ngun kan bi.>> 9 Lene Yosua kin nide tentara ijo leu Gilgal mem mmun bimbut kikau biyuug krau Gibeon mem ha yausi ba, icut igkep tentara Amori bihwen yok kros. 10 Lene TUHAN bindei ba, tentara Amori yahagom ingon tai-tai bou tut tentara Israel. Leu api tentara Israel ihwen yok nindig bibor ei Gibeon ba, yuhuk bram bihi di inang leu yok nya bihwen yok ei nitinggoisi Bet-Horon kikau bipek kin Azeka kin Makeda ei bei mpia nibiho. 11 Hammi tirigi tentara Amori inang leu tentara Israel bijuk leu nitinggoisi pima rino TUHAN bindei ba, biget es mbras nok tig nindig bibor bitot yok kak puig sinon kikau bipek Azeka. Tentara Amori imang bibor imai tug hon biget es leu gi imai tug hon tentara Israel di ihwen yok nya.
12 Gima rino TUHAN bindei ba, tentara Israel ihwen tentara Amori bingwig mem njap dima. Lewo Yosua kiju biya ei tentara Israel yahagom yoho bei lene ngat nadi bak TUHAN bipai,
<<Mpia njap e, ma ahuk pijum anai Gibeon lene ma acut au. Bed mmun e, ma acom ndei Ayalon nyai lene ma acutti au e.>>
13 Mpe dima lene mpia njap kin bed mmun hacem cut bi bibou tentara Israel ihwen ide siceu nya bingwig ug e. Yasar pas kep tut mun di pek kep mem yok ei nide sratti nok gini tu. Njap dima ne mpia com mem mpia huk pijum bicut bi kikau mem njap nitindur gom. 14 Njap di mindur hi nok gima pek kep mem tungwatu nya nipou ba, niabiati cem bi sren. Lewo njap dima ne TUHAN bit tungwatu dihyeisi dini ingon kanti ba, Noni tti kin tentara Israel bimpu yok.
15 Gima ngwig lene Yosua bie tut nide tentara ba, yahagom ingkwei hanyen kwei ei prak meng yati ei Gilgal.
Yosua kat nibou ndig mben Amori ibou muhwi
16 Noro nibou ndig mben Amori ibou muhwi pima inang billu ba, iku yonti ei hak mihyeti gom ei Makeda. 17 Lene tungwagom tau kep yok leu api pai sut mpia di iku yonti eisi bak Yosua. 18 Lene Yosua pai <<Jirim tig di nindig nya ba, jibinggam ser hak mihyeti dima nuhui a. Lene jikwas tentara ibou poi bigya ser mpia dima. 19 Noro tut je di nindigsi lene ma jiya ser hak mihyeti dima au. Ma jiyo je kep siceu nya kikau ba, jihwen mben Amori ei bei inghim dip. Ma jisindui sut yok ba, inang bicoi ug ei ide minu ndig nya au! Lewo jide TUHAN Allah mibindei ba, jibindei timek yok ug ri.>> 20 Lene Yosua ya tut tentara Israel ba, igyai nimai bak mben Amori dima. Noro ide tentara nya poi inang bicoi ug ei ide minu ndig ba, ingwes ngun apino bit bon Yosua nya igyai nimai bak siceu nya yahagom kan bi. 21 Leu api Yosua de tentara yahagom ingwes ngun bingkwei hanyen bingat noni hanyen ei prak meng yati ei Makeda.
Apino tungwa hi leu minu ndig dima di brim ningkek mem gima srep huk mben Israel bi.
22 Gima leu api Yosua pai bak tentara nya <<Nogindini jirim tig leu hak mihyeti dima nuhui ba, jikri nibou ndig ibou muhwi dima kwei ei doho bei.>> 23 Lene irim tig di ibinggam ser hak mihyeti dima nuhui leu ba, ikri nibou ndig minu ndig Yerusalem kin nibou ndig Hebron kin nibou ndig Yarmut kin nibou ndig Lakhis kin nibou ndig Eglon yahagom kwei ba, 24 igya hak ei Yosua noho bei. Lene Yosua nduk tentara Israel yahagom kwei leu api hig nibou tentara di injei bit noni bikon pran nya kwei leu binhyepo ico kep nibou ndig dima yok inggibi kin mpia. 25 Gima leu api Yosua pai bak nibou tentara nya <<Ma jingon mbut-mbut nyen ba, jidigit tut yok au. Ma jita jibou eisi ba, jingon nddong kei cem. Lewo TUHAN mibibon jide siceu nya yahagom nok gini.>> 26 Lene Yosua yai nimai bak nibou ndig dima yok yahagom leu api pindur ingut nya ei cou dihim muhwiti kikau bipek mmunti. 27 Tirigi mpia cut tu lene Yosua cuk nide tentara nya poi ba, icug nimbiam ngut dima yok leu cou dihim dima yok. Leu api injei ingut ug ei hak mihyeti po nibou ndig dima yok iku yonti eisi pima hanyen. Leu api irim tig nindig pima yok ser hak mihyeti dima nuhui dip hanyen. Tig dima yok no jo ei mpia dima kikau kwei bipek ammani kep.
Yosua coi biyai mben Amori ide minu ndig nya hi kin bu biyati
28 Njap dima lene Yosua nya icut igkep mben Makeda bihwen yok lene ibindei timek minu ndig dima kin nide nibou ndig cem. Lene ibiyai nimai bak timiei minu ndig dima yok yahagom. Lene Yosua bibon nibou ndig Makeda noyam kin gi po bibon nibou ndig Yerikho pima.
29 Gima leu lene Yosua ya tut nide tentara nya ba, injei leu Makeda kikau ug ei Libna ba, ihwen minu ndig dima cem. 30 TUHAN bindei ba, tentara Israel ibindei timek minu ndig dima kin nide nibou ndig cem. Yoni isindui sut tungwagom cem biniyaijo ei bi. Noro igyai nimai bak timiei minu ndig dima yok yahagom. Lene Yosua bibon nibou ndig dima noyam kin gi po bibon nibou ndig Yerikho pima.
31 Leu api Yosua ya tut nide tentara nya ba, injei leu Libna kikau ug ei Lakhis lene igyon ttai minu ndig dima leu api icoi bihwen. 32 Lene TUHAN bindei ba, tentara Israel ibindei timek timiei Lakhis cem ei njap gi nican. Ibibon mben Lakhis noyam kin gi po ibibon mben Libna pima. Ba, isindui sut tungwagom ngat cem biniyaijo ei bi. Noro igyai nimai bak yahagom pwoi. 33 Mbro nok gino Horam di nibou ndig Gezer kwei mpu mben Lakhis lo, Yosua bindei timek noni kin nide tentara nya cem. Tentara Israel igyai nimai bak yahagom ba, hi niyaijo ei bi.
34 Gi bram bu lene Yosua ya tut nide tentara nya ba, injei leu Lakhis kikau ug ei Eglon leu api igyon ttai minu ndig dima cem bihwen. 35 Ibindei timek minu ndig Eglon cem bigyati mem njap gom dima. Lene igyai nimai bak timiei minu ndig dima yahagom noyam kin gi po ibibon timiei Lakhis pima.
36 Lene Yosua ya tut nide tentara nya ba, injei leu Eglon kikau bikui nungug ug ei Hebron. Leu api ibindei timek minu ndig dima, 37 leu api igyai bigyati. Lene ibiyai nimai bak nibou ndig Hebron kin tungwagom-gom di ningat rin ei minu ndig dima kin minu mien di jo ttai nya cem yahagom. Yosua bindei sar minu ndig dima bitimek bihigom bit leu nok gi po noni bibon minu ndig Eglon pima. Igisindui sut ba, tungwagom ngat cem niyaijo ei minu dima bi sren.
38 Gima leu lene Yosua ya tut nide tentara nya bingkwei hanyen ug ei Debir ba, icoi bihwen minu ndig dima cem. 39 Yosua nya igyai nimai bak nibou ndig Debir lene ibindei timek minu ndig dima kin minu ndig hiter di jo ttai nya cem leu api igyai bigyati. Lene igyai nimai bak yo di ingat rin ei minu ndig dima yahagom. Yosua bibon Debir bitut nibou ndig Debir noyam kin gi po bibon Hebron kin Libna kin nibou ndig nya ei minu ndig dima.
40 Yosua bindei ba, timiei minu dima yahagom titut yam icut bak noni ba, ninyeng tak kep hagom bitut nibou ndig nya ei nungug him kin minu ndig ei ninda dip di srei nya nite bei mpia nipriti kin minu ndig ei nungug kiou nite bei mpia nicutti kin minu ndig ei iggum ndigsi nite bei mpia nibiho cem hagom. Yosua nya isindui sut tungwagom cem biniyaijo ei bi. Noro igyai nimai bak yahagom. Ba, gima bit leu TUHAN Allah Israel nicukti ri. 41 Yosua bindei timek minu ndig Kades-Barnea nite bei mpia nibiho kikau bipek kin minu ndig Gaza ei les him bitut minu ndig nindigsi di jo ikieti hagom. Ba, gima ne bitut minu Gosyen titut yam kikau bipek kin Gibeon nite bei mpia nijjai. 42 Yosua nya iba nikon pran sindam dima bibindei sar nibou ndig dima yok yahagom. Lene ibindei sar minu ndig di ide di inyeng tak kep nya cem leu api igyai bigyati. Lewo TUHAN Allah Israel hati tut tentara Israel bikon pran tut yok. 43 Gima leu lene Yosua ngkwei sut nide tentara nya hanyen ug ei prak meng yati ei Gilgal.