Yosua ya luei Musa nohoti
31
1 Lene Musa binut nihyet bu bipai bak mben Israel, 2 <<Ditde njap ug ei ari bingwam sratus gom ningot can tu. Bit bon dibie tut je kikau bu kan bi. Nok gima he bi lewo TUHAN pai bida bipia midisigon Minyei Yordan bi sren. 3 Nonti mibie tut je leu api mihwen ngkiai nya di ibong ser minu dima bingwig leu binhyepo jikieng kep minu dima nisurti-nipekti. Lene Yosua minok nibou di bie tut je bit leu nok gi po TUHAN pai binye pima. 4 TUHAN mihwen ngkiai dima yok bingwig bit leu nok gi po Noni hwen nibou ndig mben Amori ibou can di inyeng Sihon kin Og bindig ide minu bitimek bingwig tu pima. 5 Tirigi jihwen yok lene TUHAN mibindei ba, yahagom micut bije. Lene ma jibibon yok bit leu nok dipai bije tu. 6 Suar jita jibou eisi bijibrim jingkek ba, jittin tut yok au. Lewo TUHAN di nok jide Allah misindem tut je. Noni mikes je ei bibindei ba, jingon pus tut Noni bi sren.>>7 Lene Musa hig Yosua kwei bicuk noni ei mben Israel yahagom yoho bei bipai <<Ma ata abou eisi ba, abrim angkek lewo nani ne no di mibie tut yo dini tirigi icoi ug ei minu di TUHAN preu ei mem idigup bat-idigai bat nya bibong kep ri. 8 TUHAN Nonti mibie tut nani ba, ningat rin bit nani cem. Noni mikes nani ei bibindei ba, angon pus tut Noni bi sren. Gima rino ma angon ttin ba, angwes mien au.>>
Suar ikwop kep TUHAN de nicukti bikwop ari bingwam nimuhwindacan
9 Lene Musa pas kep TUHAN Allah de nicukti nya hagom ba, kes srat dima ei imam di intun Lewi him di inyeng tak kep Allah de Brua Gi Preu nya indati kin nibou mben Israel indati cem. 10 Lene noni cuk yok bipai <<Bikwop ari bingwam nimuhwindacan ningwigsi hammi tirigi nicunti dem mem jiciu ser ningwam nya hagom lene ma jikwop nicukti dini yok brei ei tungwatu nya yahagom yoho bei tirigi jidem yam ei mem Njap Ndig Ig Jibei Mpam Meng. 11 Suar jikwop kep niggai serti dini hagom ei juhui him ei mben Israel yoho bei tirigi idem yam ei mem ikuk yok bak TUHAN di nok ide Allah ei minu ttou nsi gom di Noni pigig sut ei mem jikuk je biNoni eisi. 12 Ma jinduk pinai nya kin sop nya kin munggwom nya kin ngkiai di ibong srig jikieti yahagom kwei leu binhyepo ingig itingou mem nihyet cem iba ingon di jo nyahan bikuk yok bak TUHAN di nok ide Allah ba, iba ingon gom bibit nihyet. 13 Tug hon nisinati dima lene jide nintun him yamti di bram yam nya ei nidipti bu di imiap TUHAN di nok ide Allah nicukti bi sren nya yahagom imiap kep nihyet apino ibiyai hamem nihyet leu binhyepo ibit hagom kikau ba, ide njap ngwig ei minu di sindi jibong kep dima ei Minyei Yordan nite dima ug.>>
TUHAN nicuk Musati ningwigsi nya
14 Lene TUHAN pai bak Musa <<Son dideu ayaijo ningwig honti tu. Gima rino ma ahig Yosua kwei ba, jahacem jicoi ug ei Ditde Prak Meng nsi leu binhyepo dipai sut dicuk noti nya bak.>> Lene Musa kin Yosua icoi ug ei Prak Meng nsi. 15 Leu api TUHAN tau kep yok tug hon cou hum di ya hammi dimbou hui ei Prak Meng nsi dima.
16 Lene Noni pai bak Musa <<Jei bi lene ayaijo ngwig hon ug ri. Niabiati amai leu mben Israel tu lene yoni ingon gom tut Da bu bi leu api ikrau kep mun po dipreu ei mem yok pima bu bi ri. Yoni mikes Da ei leu api mikuk yok bak nung nya di ingat rin ei minu di sindi icoi bibong kep dima ug ri. 17 Gino igyai hagom nok lene dingon misibui sut yok ba, midikes yok ei apino yoni micut bak ide siceu nya bingwig. Mun di buhun mang bibor micut igkep yok apino mijo nibreisi mem yok bipia itug ndei mun di buhun dima hagom drek dip gi Da di TUHAN di dinok ide Allah dingat rin ei ikieti bu bi. 18 Mpe dima ne midikou sut gi dimpu yok lewo ibon sisar di kinei bibor ba, ikuk yok bak nung nya tu.
19 Nogindini ma apas kep doia dini lene ma angginau mben Israel tut lewo doia dini rinok mun di bindo tut igyai munti nya. 20 Midibie tut yok ba, micoi ug ei minu di bon ninnumti di kei bibor dima bit leu nok dipreu ei mem idigup bat idigai bat nyati. Yoni migyem kep njita ninyeng hagom nok gi dem mem yok apino mibong kei migwam kei ei sirima. Noro jei bi lene yoni mingkwei hanyen leu Da ba, mikuk yok bak nung nya. Yoni mirok Da ei itta leu api mikrau kep mun po dipreu ei mem yok pima cem bi. 21 Apino mun di buhun mang bibor micut igkep yok. Noro yoni mipai doia bibikiek mun di bindo tut igyai munti nya. Jit! Nogindini nipou tirigi dibie tut yok ug ei minu po dipreu ei mem yok tu pima bigyo ne dikan tut ingon kanti nya.>>
22 Lene Musa pas kep doia dima mem njap gom ndia leu api ngginau mben Israel tut.
23 Lene TUHAN pai bak Yosua di Nun nipmot <<Suar angon nddong ba, ata abou eisi lewo jei bi lene abie tut mben Israel ug ei minu di dipreu ei mem yok nipou su. Midingat rin bit na.>>
24 Lene Musa pas kep TUHAN nicukti nya ei srat gomti bikrau ningon tut leu binhyepo tunggwei mun nyeng hi bi. 25 Tirigi hagom put tu lene noni pai bak imam di intun Lewi him di inyeng tak kep TUHAN de Brua Gi Preu, 26 <<Ma jiyai srat di Allah nicukti nya joti dini bijikon bijo simiak TUHAN di nok ide Allah Nide Brua Gi Preu bijo kikau ei sirima binok mun di bindo tut Nide limwa nya igyai munti nya. 27 Dikan tut bipia yo dima ingkek ndok ba, ikiek imig jou tut Noni. Lewo yaham imbuk kep Noni habiei tirigi sindi dibie tut yok kikau kwei bipek ammani kep tu. Lene miyaham imbuk kep Noni nindig bibor bu ei niabiati dimai leu yok. 28 Gima rino ma jinduk jide nibou mben nya kin yo di inyeng jei nya yahagom kwei bigya ei doho bei leu binhyepo dindat kep dihyet pini hagom ei itingou nsi. Leu binhyepo mpia-bbed him kin dihyeisi dini mitou kep yok nok tungwagom di mipai brei tut igyai munti nya. 29 Dikan tut bipia niabiati dimai leu yok tu lene mben Israel mikum ei ide mun di mbukti ba, ikou sut dipingok yokti nya cem. Gima rino mun di buhun mang bibor micut igkep yok ei nidipti bu lewo ibindei ba, TUHAN ningon sibui sut yok drek dip gi ipigau hanjop bigyai kep igyai munti nya di Noni cuon ser tu.>>
Musa pai doia
30 Lene Musa ndat kep doia titut yam tirigi mben Israel yahagom ingig itingou mem bipai,