SRAT NINDAT KEP TUHAN NICUKTI NYA
Srat Nindat Kep TUHAN Nicukti nya pai sut nihyet di Musa tri tut bak mben Israel sindam tirigi niabiati yoni ikak puig leu iggum ndigsi ei minu ting bibor bikwei krau Moab tu. Lene itin ei mem icoi ug ei minu Kanaan bikieng kep minu jep dima.
Musa niyai munti nya di bon ninyeng ei srat diniti rinok gini.1. Musa win kep nide limwa nya ingonti tut mun di pek kep mem yok ei ari bingwam ningot bitai gi pini jug su. Noni sok kep yok leu binhyepo igyok ngon kep Allah nibie tut yokti ei iggum ndigsi ba, ibit nihyet ba, ingon gom tut Noni cem.2. Musa ndat kep Allah de Nicukti Simnai bingginau yok tut Nicukti Gi Nigom ningginausi leu binhyepo ikuk yok bak Allah Nongkom. Lene noni pingok ingonti tut Allah nicuk yokti nya di mibie tut yok mpe dino ikieng kep minu jep di Noni preu ei mem yok.3. Musa win kep nide limwa nya ingonti tut mun po Allah preu ei mem yok pima lene bidip huk yok leu binhyepo ippu hum kin ingon di gom tut gi preu pima nisok kep yokti nya.4. Musa ta Yosua mem gima ya luei noni nohoti nok nibou nijep di mibie tut Allah de limwa nya bu. Niabiati Musa ba doia bikiek Allah de ningon gomti ba, ngat nadi leu binhyepo Allah minjei mun di kei bak Nide limwa nya leu su lene noni mai ei Moab ei Minyei Yordan nite dima ug bei mpia nipriti.
Musa bidip huk nide limwa nya tug hon srat dini leu binhyepo ingon jo kep bipia Allah teu mben Israel di Noni dimig ei su ba, njei mun di kei bak yoni lewo ngondut yok. Gima rino suar Nide limwa nya igyok ngon kep nipingok yokti nya hagom ba, ingon ngakei Noni bibit nihyet. Tug hon nisinati dima ne mibong kei migwam kei ba, mitug ndei mun di kei leu Allah cem.
Ayat di jo nibreisi mem nye di mbusyamei nya ei srat dini ti rino ayat di Yesus pai sut <<Ma jiba jingonti titut kin jinnei titut kin jide nisindemti titut bingon ngakei TUHAN di nok jide Allah. Nicukti dini bon ninyeng biya bibie mem nicukti nindigsi nya hagom>> (6:4-6).
Nirop Ninda Ndigsi
Musa tri tut nihyet gi gom 1:1--4:49
Musa tri tut nihyet gi nican 5:1--26:19
a. Allah de Nicukti Simnai 5:1--l0:22
b. Nicukti kin nipingokti kin nisok kep yokti 11:1--26:19
Allah nicuk yokti nya nipou tirigi icoi ug ei minu Kanaan bigyo 27:1--28:69
Ippu hum kin mun po Allah preu ei mem yok 29:1--30:20
Musa nitri tut nihyet ningwig honti 31:1--33:29
Musa nimaisi 34:1-12
Musa ndat kep TUHAN nipingok mben Israelti
1
1 Musa tri tut nihyet bak mben Israel tirigi ibong ei iggum ndigsi ei Minyei Yordan nite dima ug bei mpia nipriti leu api noni pas hagom ei srat diniti. Yoni ibong ei Yordan nyai dideu Suf ba, Paran jo bei mpia nikimbasti lene Tofel kin Laban kin Hazerot kin Di-Zahab jo bei mpia nipriti. ( 2 Mpe di po ijo leu Nungug Sinai biyuug ei Kades-Barnea tug hon minu Edom ei nungug him pima lene imbut mem mmun-njap simnaibrimiggom.) 3 Lene ug ei njap gi nigom ei bed gi nisimnaibrimiggom ei ari bingwam gi nyatungwacan tirigi niabiati ijo leu minu Mesir tu lene Musa tri tut TUHAN nicuk noti nya hagom bak mben Israel. 4 Mun dini pek kep mem yok tirigi niabiati Musaa hwen Sihon di nok nibou ndig mem mben Amori di ninyeng tak kep Hesybon lene bihwen Og di nok nibou ndig mem mben Basan di ninyeng tak kep Asytarot kin Edrei cem leu su. 5 Gima rino Musa kinyon ei ningginau nide limwa nyati tut TUHAN niggai serti kin nicukti nya tirigi yahagom ingat rin ei Yordan nyai ei minu Moab bei mpia nipriti.Noni pai biyok, 6 <<Tirigi po nyeni yahagom ingat rin ei Nungug Sinai pima lene TUHAN cuk nye bipai <Cobi! Jibong ei nungug him dini wer ninno tu. 7 Ma jilet jide prak meng nya bijimbut ug ei mben Amori ide minu di bon nungug him kin minu di gahai dima kou cem. Nok Yordan nyai kin hampiati kin les him kin hanjop di jo bei mpia nibiho kin mukti di jo ndam Muk Hacan hagom. Ma jicoi ba, jiya bidem minu Kanaan kin Nungug Libanon kikau ug bipek minyei nindig Efrat. 8 Dani ne TUHAN rin ba, dipreu sut minu dima hagom bak jidigup bat-jidigai bat di Abraham kin Ishak kin Yakub kin ide nintun him yokti di bram yam nya. Gima rino ma jicoi ba, jiya bidem minu dima hagom.> >>
Musa ta nikei nya
(Kel. 18:13-27)
9 Musa pai bak mben Israel <<Mpe di po nyeni ingat rin ei Nungug Sinai pima lene dipai bije bipia midyai nibie tut jeti dini buhun bibor mem da. Dem tut gima dangkom ngat diyai midyai dima kan bi. Lewo, 10 jide TUHAN Allah bindei ba, jimangti kum eisi bidem kep ham mpia-bbed him nimangti. 11 Handei kon ba, jidigup bat-jidigai bat nya ide TUHAN Allah mikum ei jimangti bu kikau ug bipek mbisribu gom bram yam bibindei ba, jibong kei jigwam kei bit leu nok Noni preu ei mem yok nipou su! 12 Noro dem tut gima dangkom ngat dibiang minai di buhun bibor dini bidigwam nok nikei mem jide munhyet nya hagom bi. 13 Ma jimbus pinai nya di ingon nddong ba, igya hacan mem tungwatu nya igkei ba, ingon ki nindig bibor cem ibou poi leu bikwop jide mben gom-gom leu binhyepo dita yok mem midyai nibie tut jeti dima. 14 Mpe dima ne jice tut dingon kanti pima nok nikos tutti di kei bibor mem je. 15 Leu api dimbus nibou di ingon ki bibor kin gi igya hacan mem tungwatu nya igkei di jindo ei su pima ba, dita yok nok nibou nya mem je. Dita yok nok nibou mem nimpung nya di imangti ibou sribu gom kin nimpung nya di imangti ibou sratus gom kin nimpung nya di imangti ibou ningot muhwi kin nimpung nya di imangti ibou ningot gom lene nok. Lene dita nibou hiter nya mem gima igyok igyai kep jide mben nya.
16 Mpe dima ne dindo ide midyai biyok bidipai <Ma jingig jiyai kep nisrep tut yamti di srou jide mben nya. Ma jiba jingon di gom bikos tut nisrep tut yamti di ngot kep jide mben nya bingot kep ngkiai nya di ibong timiei ei jikieti cem. 17 Ma jiba jide nikos tutti nya bimbus nggok tungwatu nya au. Ma jiba jingon di gom bimbus tungwagom-gom ningonti lene ma jimbus nggok yok au. Ma jittin tut yo di igya ei joho bei mem gima jikos tut yok au. Lewo Allah mipingok jingonti bindo nikos tutti di igbit bak jeni. Lene ma jikes munhyet di nggruk bibor mem je ei dani dinghat dip leu api midikos tut bak jeni.> 18 Mpe dima ne dipingok jingonti tut mun nyeng hiter di suar jiyai kep nya.>>
Musa cuk yo di yuug yok itta kep minu Kanaan
(Bil. 13:1-33)
19 <<Leu api nyeni ikiju bimbut leu Nungug Sinai bit leu TUHAN nicuk nyeti ba, ikes nye kak iggum ndigsi di nyan bibor di bon nikineisi nya cem ndam nungug him di mben Amori ide. Mpe di nyeni yuug krau Kades-Barnea, 20-21 lene dipai bije <<Nogindini ikwei krau mben Amori ide nungug him tu. Minu dini ne dihyei di ide TUHAN Allah kin idigup bat-idigai bat nya ide Allah yai binye tu ri. Jingat i! Dihyei pima no jo joho bei dima. Juug yai dihyei dima bijiya niti nok TUHAN nicuk jeti. Ma jihig jingon eisi ba, jittin tut cem au.
22 Noro mpe dima ne jikwei ngat da bijipai <Gi kei mem icuk ibou poi bibie yoho mem gima yuug yok itta kep minu dima leu binhyepo yoni rima ipai binye tut puig dima imbut kak lene notou sut minu ndig di itin ei mem yuug yai bigyati nya i.>
23 Lene dice tut jingon kanti dima. Gima rino didimig ibou simnaibrimigcan ba, yo dima ne tungwagom leu jide mben di jintun him lene nok bikwop jide mben di jintun him hagom. 24 Yoni ikui ug ei nungug him pima biyuug krau Mbang Briep Eskol leu api intek gimahap bidem minu dima ba, igyok itta kep. 25 Leu api ingkwei hanyen kwei ba, ittei biei ngat kin ba ngat di igyai leu minu dima ba, ibipai sut binye bipia minu di ide TUHAN Allah miyai binye dima nnum kei.
26 Noro jisrep tut jide TUHAN Allah nicuk nyeti ba, jikou sut gima jicoi ug ei minu dima. 27 Jilua sok bijipai <TUHAN ningon kinei sut nyeni. Apino Noni buwak nye biyehei leu minu Mesir leu binhyepo kes nyeni ei mben Amori indati mem gima igyai nimai binye. 28 Gima rino ma nyeni yuug ei sirima mem mindei i? Yo di igyok itta kep minu dima ibindei ba, nyeni nittin tut drek dip gi ipai binye bipia mben dima intig bou jei ba, inghuisi sindem bibor dor njiriek nye. Nok gima cem ibong ei minu ndig ngat di bon ngug tig kui sur mpia-bbed him a. Lene ingat yo di intig bou njan ndig ngat ei sirima bou igyai him!>
29 Noro dipai bije <<Ma jittin tut yo dima au. 30 Jide TUHAN Allah mibie tut jeni ba, mikon pran mem jeni noyam kin gi nipou po jingat bou jiyai him ei minu Mesir, 31 kin iggum ndigsi cem pima. Jingat TUHAN nibuwak jeti ba, jingwes ngun kak puig jei dima kwei ba, jikwei krau mpia dini tu. TUHAN noyam kin andigpoi gom di kes nimunggwom ei ninghat dip bimbut tut. 32 Noro mbro nok gino dipai nok gima bije lo, jiba jingon com jide TUHAN Allah bi. 33 Noni mbut bibie joho bei binggok mpia dima johok jide prak meng nya eisi. Noni ba cou hum di njeng mem mmun kin cou bumbuhui di jo nibreisi mem njap bindo puig bije.>>
TUHAN kes hukum ei mben Israel dip
(Bil. 14:20-45)
34 <<Mpe dima ne TUHAN miap jilua-lua nyenti leu api gga beheng ser, 35 <Yo di nimpung di isibut dini tungwagom cem micoi ug ei minu di nnum kei di dipreu sut bak jidigup bat-jidigai bat nya bi. 36 Noro Kaleb di Yefune nipmot he rima micoi ug ei minu dima. Lewo ningon gom tut Da kikau. Midiyai minu di nonti mbut nimig ei niti di ngig niyai kep dima bak nide di intun noni him di bram yam nya.> 37 Lene jibindei ba, TUHAN gga tut da bisimbot dat tut da <Musa e, nani cem mporo ma acoi ei minu dima bi. 38 Noro ma abindei Yosua di Nun nipmot di ya kui na ningon nddong ba, ngkiem cem. Noni mibie tut Israel leu api yoni mikieng kep minu dima bigyati.>
39 Mpe dima ne TUHAN pai bak nyeni yahagom <Midiyai minu dima bak jimunggwom bat di imien bibor di dem mem gima ibisrip tut gi kei leu gi kinei bigyo po jikan bigya jide siceu nya mipos yok leu je bit leu jihyet nghwak him pima ba, yoni mikieng kep minu dima bigyati. 40 Noro tut jeni ne ma jingkwei hanyen hon mpia dini ba, juug ei iggum ndigsi bijikak puig di bie ug ndam Akaba ninging.>
41 Mpe dima ne jibuhup bida hanyen <Musa e, nyeni nibon sisar tut TUHAN. Noro nogindini nitin ei mem ninjei siceu ba, nikon pran bit leu nok ide TUHAN Allah nicuk nyeti.> Leu api bikwop tungwagom-gom leu jikieti tin ei mem gima kon pran bijikan bigya mijinjei siceu ba, krop kei mem jiba siceu bikon pran leu api mijibrim nungug him pima bijiyati.
42 Noro TUHAN pai bida <Ma asindui sut yok ba, ikon pran bit yo dima au. Lewo midingat rin bit yok bi leu api ide siceu nya mibindei timek yok.> 43 Dipai sut mun di TUHAN tri tut dima bije noro jigimiap dihyet bi. Jisrep tut TUHAN nicuk jeti lene jiba jingon di jei bikui ug ei nungug him. 44 Leu api timiei minu Amori di ibong ei sirima yehei kok yam bikon pran bit je. Imang bibor bidem kep mimpam di sider wap ba, yuhuk je kikau ug ei Horma. Leu api ibindei timek je ei nungug him ei minu Edom. 45 Leu api jingkwei hanyen ba, jahara TUHAN kwei mpu je noro Noni miap kep jihyet bi noro ba ningha bak jeni.>>
Nijam di ingkwei-ngkwei nyen ei iggum ndigsi
46 <<Gima leu su lene nyeni ibong ninno ei Kades.