Minu ndig nya mem keret Lewi
35
1 Tirigi mben Israel ingat rin ei briep bou him Moab di birok kik Yerikho ei Minyei Yordan nite dima ug lene TUHAN pai bak Musa, 2 <<Ma apai bak mben Israel bipia suar ikwas minu ndig poi kin minta nidumti di jo ttai nya leu ide dihyei ninda rom nya tut keret Lewi leu binhyepo ibong timiei eisi. 3 Minu ndig dima ne keret Lewi ide mem gima ibong timiei eisi ri. Minta nidumti di jo ttai nya dima mem ide sapi nya kin mindhe-ndhe nindigsi di ighyen kep nya. 4 Ba, minta nidumti di jo ttai minu ndig nya ninyanti meter sratus bitai ningot muhwi ba, gima ne inai leu ngug tig di bikrop ttai minu ndig dima ri. 5 Bikwop dihyei ninda rom di keret Lewi ide dima bon nuhuisi bitai ba, bikwop nihuisi hagom dem meter sratus muhwindatai ba, ide minu ndig jo hacan ngat. 6 Suar jikwas minu ndig niya coi muhwindagom tut keret Lewi leu binhyepo limwa mben Israel di ibindei mai tungwagom kin gi ibisinggre bi minang bicoi ug ei minu ndig dima bingwes ngun. Ter leu minu ndig ningat muhwindagom dima lene suar jikwas minu ndig ningot bitai ba, can hi kin bu tut keret Lewi, 7 bitut minta nidumti di jo ttai nya cem. Ba, minu ndig di keret Lewi ibong timiei eisi dima hagom sok yam nimangti ug ei ningot bitai ba, muhwindaningai. 8 Suar jikos tut keret Lewi ide minu ndig nimangti di jo srig keret mben Israel ide hanjop nsi nya bibit leu minu ndig nimangti kin hanjop nsi dima ninyanti kin nijeisi.>>Minu ndig niya coi nya
(Ul. 19:1-13; Yos. 20:1-9)
9 Lene TUHAN cuk Musa, 10 bitri tut nihyet bak mben Israel, <<Tirigi jisigon Minyei Yordan ba, juug dihip ei nite hi bijicoi ug ei minu Kanaan, 11 lene suar jindo minu ndig niya coi nya mem yo di igyai nimai bak hiter kin gi ibisinggre bi nya leu binhyepo inang ug ei minu ndig dima ba, 12 ingwes ngun leu nimbiam di ihwen bimai pima nide bat nya di ibuhup kin nimai biyok a. Harin dima jibuhup kin nimai bak tungwagom di yo di hiter ipai kep noni bipia bisinggre ba, hwen mun dima nipou tirigi noni ya ei nikei noho bei bimiap tut nikei nikos tutti bigyo a. 13 Ma jidimig minu ndig niya coi ningat muhwindagom ba, 14 ningat ningai ei Minyei Yordan nite bei mpia nipriti lene ningai bu ei minu Kanaan. 15 Minu ndig muhwindagom dima nok minu ndig niya coi mem mben Israel kin ngkiai nya di ibong laide kin gi ibong timiei ei jikieti. Bikwop no di bindei mai hiter kin gi bisinggre bi lene suar nang ug ei minu ndig niya coi dima hak ug.
16 Noro gino tungwagom bisinggre biba ngkimom nyeng hi biyai nimai bak hiter lene no dima hwen nimbiam ba, bon mun tunggwei. Suar jiyai nimai bak. 17 Gino tungwagom bisinggre biba tig nindak gom biyai nimai bak hiter lene no dima hwen nimbiam ba, bon mun tunggwei. Suar jiyai nimai bak. 18 Gino tungwagom bisinggre biba biei ttou gom biyai nimai bak hiter lene no dima hwen nimbiam ba, bon mun tunggwei. Suar jiyai nimai bak. 19 Suar nimbiam dima nide bat di dideu rima yai nimai bak no di ninda yem nimbiam pima. Tirigi tau kep noni lene suar yai nimai bak.
20 Gino tungwagom ningon sibui sut hiter leu api njei no dima hwen mpia bimai e, he ba mun hi bihwen bimai e, he 21 kimut ninda bitug bimai e, lene no dima ne no di ninda yem nimbiam rin ba, bon mun tunggwei. Suar jiyai nimai bak. Suar nimbiam dima nide bat di dideu nya rima igyai nimai bak no di ninda yem nimbiam pima. Tirigi tau kep noni lene suar yai nimai bak.
22 Noro gino tungwagom bisinggre biyai nimai bak tungwagom di ningon sibui sut bi tug hon gi njei no dima hwen mpia bimai e, he ba mun hi bihwen bimai e, he 23 gino tungwagom tou kep nuhwenti haigtu bi bicom tig nindak gom bindei hiter di nide nitok joti rin bi bimai tirigi noni tin ei ningonti mem hwen no dima cem bi, 24 lene suar limwa mben Israel idem yam bimbrap tut munhyet di nok gima. Lene imbrap gau no di ninda yem nimbiam kin gi bisinggre bi dima cem ba, imbrap gau nimbiam nide bat di itin ei mem ibuhup kin nimai bak no dima cem. 25 Suar limwa di idem yam ei mem imbus mun dima iteu no di bindei mai hiter kin gi bisinggre bi pima ba, ningwes ngun leu nimbiam nide bat di mihwen noni pima bibuwak noni hanyen ug ei minu ndig niya coi po ningwes ngun eisi tu pima. Lene suar noni bong kikau ei sirima bibou no di gwam nok Imam Nibou Ndig mem nijam dima mai leu ug e. 26 Noro gino noni hei bimbut leu minu ndig niya coi po ningwes ngun eisi pima, 27 leu api nimbiam nide bat hi tau kep biyai nimai bak lene nibuhupti dima coi sisar nihwen nimbiamti bi. 28 Suar no di bindei mai hiter kin gi bisinggre bi pima bong kikau ei minu ndig niya coi bibou no di gwam nok Imam Nibou Ndig mem nijam dima mai leu ug e. Ne gino Imam dima mai leu su lene ma jisindui sut ba, no dima ngkwei hanyen ug ei nide ig bei. 29 Nicukti dima yok bijo ninno bijo kikau mem jeni kin jide nintun him yamti di bram yam nya cem ei mpia ttou nsi di jibong ser nya hagom.
30 Tut ninyeng nimbiam hyet lene suar ma jikes hukum nimai ei no di jiba jingon kan nok no di hwen nimbiam dip hak ug gino ibou can ibou ningai ipai sut niyai munti dima di ingat brei bou igyai him. Gino tungwagom he pai sut niyai munti di ngat brei bou niyai him dima lene gima dem tut bi. Gima bindo bipia gi iba ingon kan pima igbit kan bi. 31 Suar jikes hukum nimai ei no di hwen nimbiam dip hak ug. Harin dima noni ba mitiei bigo gau nonti leu hukum nimai a. 32 Gino tungwagom nang ug ei minu ndig niya coi gom lene ma jisindui sut ba, noni ba mitiei bigo gau nonti leu binhyepo ngkwei hanyen ug ei nide ig bei nipou tirigi Imam Nibou Ndig mai bigyo au. 33 Gino jisindui sut noni nok gima lene jibindei ba, map kui dihyei di jibong niti. Nihwen nimbiam ninggrom bindei ba, map kui minuti. Ba, puig hiter mem gima jibon midut di bindei kwes dihyei dima ningat rin bi noro tug hon gi jikus no di hwen nimbiam dima ninnei leu he. 34 Ma jibindei suwok dihyei di jibong niti dima au. Lewo Dani ne TUHAN rin ba, dingat rin ei je di mben Israel jikieti.>>