Mben Israel yaham imbuk kep TUHAN
14
1 Lene himmun dima mben Israel ipim kui jei kikau binjap kep drek dip nihyet di imiap tu. 2 Yahagom inso-nso nyen bak Musa kin Harun bipai biyok <<Gi kei rino nimai hak tirigi po nibong ei minu Mesir pima e, he nimai hak ei iggum ndigsi dini e. 3 Nggon rino TUHAN mibuwak nye ug ei minu dima i? Yahagom mimai tirigi timiei minu dima mikon pran bit nye leu api yoni mipos nyeni itnem bat-imunggwom bat nya. Nna ba nyeni yahagom ingkwei hanyen ug ei minu Mesir hak ug.>> 4 Lene yahagom ipai cuk yam bipai <<Ma jindo no di bie tut nye kan ba, ingkwei hanyen ug ei minu Mesir hak ug.>>5 Lene Musa kin Harun ikuk yok ba, iba ingwak bikik mpia ei mben Israel yahagom yoho bei. 6 Lene Yosua di Nun nipmot kin Kaleb di Yefune nipmot po ibit yo di imbris nyahan biyuug yok itta kep minu Kanaan pima irik ide sinsun nok bindo bipia ingon buhun bibor. 7 Ba, ipai bak mben Israel <<Minu po nimbris nyahan biniyok nitta kep pima ne minu di kei bibor kei. 8 Gino TUHAN joi sut nye lene Noni mibuwak nye ug ei sirima bikes minu di mpung tut mun di isuar nya di nnum kei cem dima hagom ei nyeni indati. 9 Noro ma jaham jimbuk kep TUHAN ba, jingon digit tut timiei minu dima au. Krop kei mem gima nyeni ihwen yok bingwig lewo TUHAN ningat rin ei nyeni ikieti ba, Noni co kep yo dima ide kwar di ikuk yok bak bingwig leu su. Gima rino ma jingon digit tut yok au.>> 10 Noro mben Israel yahagom igyok ingon gom mem gima iba tig bihwen yo cin dima bimai hak ug. Lene TUHAN de nikei-kau-keisi piga kros ei Nide Prak Meng bou mben Israel yahagom igyai him.
Musa ya hacan bingat nadi tindei nide limwa nya
11 Lene TUHAN hig ser Musa <<Yo dini misrep tut Da kikau apig bu i? Mbro nok gino dindo bindo kin mun di mindur mang bibor ei ikieti tu lo, iba ingon com Da bi kikau apig bu i? 12 Mbigom lene midikes nsuwer ajar di buhun bibor di mihwen yok bingwig leu dihyeisi dini leu api midibindei ba, anok pung di keret nijep nindig bibor ba, sindem bibor cem dor njiriek yoni bu.>>
13 Noro Musa buhup <<Na di TUHAN e, abuwak yo dini kwei leu minu Mesir tug hon Ade nisindemti di nindig bibor tu. Gino mben Mesir imiap tut bipia ahwen Ade limwa nya bingwig leu su, 14 lene yoni mitri tut bak timiei minu Kanaan nya bu. Yo dima ikan tut bipia Na di TUHAN angat rin ei nyeni nikieti ba, ando Nanti binye tug hon Ade bumbuhui ttou di bie tut nye mem njap ba, tug hon Ade cou hum di bie tut nye mem mmun cem tu. 15 Gino ahwen nye di ninok Ade limwa nya biningwig lene tungwatu dihyeisi dini di imiap tut Ade nisindemti kin anyeng di jei cem misimbot dat bipia, 16 TUHAN hwen Nide limwa nya bingwig ei iggum ndigsi lewo Noni sindem mem gima buwak yok kikau ug ei minu di Noni preu sut ei mem yok habiei pima kan bi. 17 Gima rino Na di TUHAN e, handei kon ba, ando Ade nisindemti brei binye ba, ayai hagom bit leu nok apreu ei mem nye cem tirigi po apai ei ahui him, 18 <Dani ne TUHAN rin ba, dingon sibui sut tungwatu nya haninyai kan bi. Noro Ditde ningon ngakeisi nindig bibor bikum eisi bu ba, dingon gom cem. Lewo dikos ser tungwatu nya ide sisar kin ide naham nimbuk kep Dati. Mbro nok gima lo, midikes hukum ei imunggwom bat nya kin ignyon bat-idrot bat nya dip kikau ug bipek yo di intun yok him gi niningai kin gi nibitai drek dip ide pung di intun him nya ide sisar.> 19 Gi nok lene TUHAN e, dahara bak Nani, ma akos ser yo dini ide sisar di ibon dini tug hon Ade ningondut nyeti di nindig bibor ba, aluei angonti tut mun di apreu sut ei mem nye bi cem bit leu nok akos ser ide sisar mang bibor habiei tirigi ijo leu minu Mesir kwei bipek ammani kep.>>
20 Lene TUHAN buhup <<Midikos ser ide sisar dima bit leu nok ahara Dati. 21 Noro dipai tug hon neheng bit leu nok diyaijo bijo ninno bijo kikau ba, bit leu nok dingat rin bidem ei dihyei nisurti-nipekti cem bipia, 22 bit bon yo dini ingat minu di dipreu ei mem idigup bat-idigai bat nya bou igyai him bi sren. Mbro nok gino ingat Ditde nikei-kau-keisi kin mun di mindur di dibon mem yok ei minu Mesir kin iggum ndigsi cem lo, ibingon-ngon nyen Da ba, ibit dihyet bi cem ninno tu. 23 Bit bon yo dini icoi kikau ug ei minu dima bimbut imig eisi bi sren! Lewo isrep tut Da ninno tu. 24 Noro nok gima mem Ditde awak di Kaleb bi. Lewo ningon gom tut Da kikau. Gima rino midibuwak noni ug ei minu po noni mbris nyahan biyok nitta kep tu pima leu api nide nintun him yamti di bram yam nya midigek kep mpia dima nok ide bu. 25 Noro nogindini mben Amalek kin mben Kanaan ibong ei minu dima ser. Njap di hyep bu lene suar jahagom jingkwei hanyen ug ei iggum ndigsi di bie ug ei minyei Akaba ninging.>>
TUHAN tri tut hukum di Noni mikes ei mben Israel dip
26 Lene TUHAN pai bak Musa kin Harun, 27 <<Yo di imbuk dini minso-nso nyen tut Da mem nijam pig bu i? Cobi! Dimiap mun di inso-nso nyen tut dima hagom tu. 28 Disok dihyet ei na dip bak yo dima nok gini. Dipai tug hon neheng bit leu nok diyaijo ninno bijo kikau bipia midibirop ighyet bit leu nok yahara Dati tu. Dani ne TUHAN rin ba, disimbot dat tu. 29 Mijimai ba, iggum ndigsi dini mimpung tut jijui nya. Gino jide njap ug ei ari bingwam ningot can nima kui lene mijicoi ug ei minu dima bi sren lewo jinso-nso nyen tut Da. 30 Gi nipou lene dipreu ei mem je tut minu dima tu noro jigom micoi ug ei minu dima bi sren. Ibou can di inyeng Kaleb kin Yosua he micoi ug eisi. 31 Gi nipou lene jinso-nso nyen tut jimunggwom bat nya bipia timiei minu Kanaan mipos yok. Noro midibuwak jimunggwom bat dima yok ug ei minu di jikou sut pima leu binhyepo ibong eisi nok itimieisi ri. 32 Noro je di nindigsi mijimai bijingwig ei iggum ndigsi dini. 33 Lene jimunggwom bat nya mimbut-mbut nyen ei iggum ndigsi dini ba, igyai inghuisi di wei kikau mem ari bingwam ningot bitai drek dip je di andigpoi di jiba jingon com Da bi pima. Nok gima kikau bibou je di andigpoi jahagom jimai bijingwig leu ug e. 34 Hukum di ntun jide sisar him mibuhun tak je kikau mem ari bingwam ningot bitai. Ari bingwam gom mem njap gom ari bingwam gom mem njap gom lene bikwop nok noyam kin njap nimangti gi jimbris nyahan bijiyok jitta kep minu Kanaan pima. Jahagom mijibiang mun di buhun di miyem jinghuisi drek dip gi po jisrep tut Da! 35 Dipai tug hon neheng bipia mun dini yok hagom micut igkep je di jimbuk bibor di jiyok jingon gom mem gima jihwen bit Da. Jahagom mijimai bijingwig ei iggum ndigsi dini. Da di TUHAN disimbot dat tu.>>
36 Lene yo po Musa pinak yok ug ei minu Kanaan leu binhyepo imbris nyahan bigyok itta kep lo, ikwei hanyen bitri ighyet nitrowai di bindei dino mben Israel inso-nso nyen tut pima, 37 itug ndei nsuwer ajar di TUHAN kes ei yok dip ba, imai hak ug. 38 Leu ibou simnaibrimigcan po imbris nyahan bigyok itta kep minu Kanaan pima lene Yosua kin Kaleb yongkom he ingwes ngun bimai bi.
Tentara Israel ibingon mem icoi ug ei minu Kanaan
(Ul. 1:41-46)
39 Tirigi Musa tri tut TUHAN nihyet dima hagom bak mben Israel lene yahagom ingon buhun bibor. 40 Njap di hyep bu lene injei siceu mem gima icoi ug ei nungug him ei minu Kanaan. Icuk yam bipai <<Ningat ne nyeni ibon sisar tu. Noro nogindini jikwei ba, injei siceu mem gima nyeni yuug coi minu di TUHAN ndo binye tu.>>
41 Noro Musa srep bipai <<Nggon rino jibisau sut gima jiyai mun njiriek TUHAN ningon kanti mem je nogindini i? Jingon kanti dima mibindei ba, ningat di kei ntun him bi. 42 Ma jimbut ug ei minu dima au. Lewo TUHAN ningat rin bit je bi. Mbigom jide siceu nya mibindei timek je ug ri. 43 Tirigi jikinyon ei nihwen mben Amalek kin mben Kanaanti lene mijimai ug rin lewo TUHAN bie tut je ba, ningat rin bit je bi. Lewo jibit nihyet pima bi.>>