Nicukti tut mun di ikwas tut TUHAN
27
1 TUHAN yai nicukti dini bak Musa, 2 mem mben Israel. Gino jidimig tungwagom pijum hak ei mem TUHAN drek dip neheng di buhun lene dem mem gima jiba mitiei perak bipek no dima hanyen leu TUHAN, 3 bit leu nibok di jikrau kep ei TUHAN De Prak Mengti tug hon nisinati dini. Mem no di pinai di nide njap ug ei ari bingwam ningot can kikau ug bipek ningot muhwindagom lene jiba mitiei perak nitig ningot muhwi bipek noni hanyen lo, 4 jiba mitiei perak nitig ningot ningai bipek no di sop hanyen. 5 Mem no di pinai di nide njap ug ei ari bingwam muhwi kikau ug bipek ningot can lene jiba mitiei perak nitig ningot can bipek noni hanyen lo, jiba mitiei perak nitig simnai bipek nisop hanyen. 6 Mem no di nide njap ug ei bed gom kikau ug bipek ari bingwam muhwi lene jiba mitiei perak nitig muhwi bipek nipinai hanyen lo, jiba mitiei perak nitig ningai bipek nisop hanyen. 7 Mem no di pinai di nide njap ug ei ari bingwam ningot muhwindagom bikui lene jiba mitiei perak nitig simnaimuhwidip bipek noni hanyen lo, jiba mitiei perak nitig simnai bipek nisop hanyen.8 Gino no di heng tut bipia nuhui mbum bibor ba, dem mem gima go bidem nibok di TUHAN kos tut ei bi lene suar noni buwak nide bat bak imam. Lene ma imam dima kos tut nibok di cut bibor dem igbit no di heng tut dima nisindemti.
9 Gino no dima heng tut bipia mikwas nide mindhe pijum ei tut TUHAN ba, map kui mindhe dimati bi lene suar noni yai gima bikuk no bak TUHAN lewo mindhe di nok gima hagom ne mindhe di kwes ri. 10 Harin dima no di heng tut pima ba mindhe hiter biluei a. Lewo mun nyeng hagom di jibikuk je bak TUHAN lene Noni ma bou No nok Nide. Harin dima no dima ba mindhe hiter biluei mindhe gi pima a. Leu gi nok lene TUHAN ma mindhe-ndhe hacem bou No nok Nide drek dip. 11 Noro gino mindhe di no dima heng tut bipia mikwas pijum bak TUHAN dima ne mindhe di map kuisi di bit bon bikuk no bak TUHAN kan bi lene ma noni jem nide mindhe dima bak imam. 12 Leu api imam mikos tut nibok bibit leu mindhe dima nikei-nikineisi. Imam mikos tut nibok bihigom ba, jo kep. 13 Gino no dima luei ningonti biba mitiei bipek nide mindhe dima hanyen lene suar go igbit nibok lene bikum mitiei nitig can leu ningot gom lene nok ei nibokti.
14 Gino tungwa hi kwas nide ig hi pijum ei tut TUHAN lene ma imam kos tut nibok bibit leu ig dima nikei-nikineisi. Imam mikos tut nibok bihigom ba, jo kep. 15 Gino no dima luei ningonti biba mitiei bipek nide ig dima hanyen lene suar go igbit nibok lene bikum mitiei nitig can leu ningot gom lene nok ei nibokti.
16 Gino tungwa hi kwas nide dihyei hanjop nsi hi pijum bak TUHAN lene ma imam yoni ikos tut nibok ba, bibit leu njita ngan nimangti di indim ei hanjop nsi dima. Bikwop gandum barli ngan kilo nyatungwagom nibok mitiei perak nitig simnai lene nok. 17 Gino no dima kwas hanjop nsi dima hammi tirigi Ari Bingwam Ningkwei Hanyenti mbut bitun bigyo lene nibok titut yam jo kep hak. 18 Gino Ari Bingwam Ningkwei Hanyenti tun leu su leu api no dima kwas dihyei hanjop nsi dima lene ma imam binai bidem igbit leu ari bingwam di jo yo kikau ug bipek Ari Bingwam Ningkwei Hanyenti gi nidipti bu. Leu api kos tut nibok di cut lai-lai de. 19 Gino no dima luei ningonti biba mitiei bipek nide dihyei hanjop nsi dima hanyen lene suar go igbit nibok lene bikum ei mitiei nitig canti bu leu ningot gom lene nok. 20 Gino no dima bisinggre bitri dihyei hanjop nsi dima bak hiter ba, bipek mitiei nipou tirigi pek hanjop nsi dima hanyen leu TUHAN bigyo lene harin dima noni pek gima hanyen leu TUHAN a. 21 Ug ei Ari Bingwam Ningkwei Hanyenti gi nidipti bu lene hanjop nsi dima nok TUHAN de bijo ninno bijo kikau. Ma jiyai dihyei dima bak imam nya.
22 Gino tungwa hi kwas dihyei hanjop nsi di nonti pek leu hiter tut TUHAN, 23 lene ma imam kos tut nibok bibit leu ari bingwam di jo yo kikau ug bipek Ari Bingwam Ningkwei Hanyenti gi nidipti bu. Leu api suar no dima go bidem nibok dima hak njap dima cem. Mitiei dima ne TUHAN de mitiei ri. 24 Ei Ari Bingwam Ningkwei Hanyenti dima lene suar jingkwei hanjop nsi dima hanyen bak niceu gi nimbie him. Gino no dima mai su lene bak nide nintun him yamti di bram yam nya.
25 Suar jikos tut mun nyeng hagom nibok bit leu nibok di jikrau kep ei TUHAN De Prak Mengti tu.
26 Mindhe nipmot bou ne TUHAN de ri. Gima rino harin dima jikwas gi hi dima nok mun di jikwas pijum ei mem nibon midut bit leu jijoi sutti a. Sapi nipmot bou kin domba nipmot bou kin kambir nipmot bou ne TUHAN de hagom. 27 Noro tut mindhe di map kuisi nipmot bou ne disindui sut ba, jiba nibok di jikrau kep ei TUHAN De Prak Mengti bipek gima hanyen lene jibikum ei mitiei nitig canti bu leu ningot gom lene nokti. Gino jipek nipmot bou dima hanyen bi lene disindui sut ba, jiba nibok di jikrau kep ei TUHAN De Prak Mengti bitri gima hanyen bak nindigsi nya.
28 Mun di jikwas pijum hak eif mem gima jibikuk je bak TUHAN nok tungwatu kin mindhe kin dihyei hanjop nsi ne harin dima jitri ba, jipek hanyen cem a. Mun dima yok hagom TUHAN de bijo ninno bijo kikau. 29 Nicukti dima mem tungwatu di ikos tut pijum hak ei bak TUHAN mem gima bindei sar tu lene harin dima jipek noni hanyen a. Suar noni tug ndei nimai.g
30 Tut jide gandum ngan kin biei ngat nya di ntun jide miaisi nya hagom him lene TUHAN ma gom leu ningot gom gom leu ningot gom lene nok bou No nok Nide. 31 Gino tungwa hi joi sut pek mun dima yok bihi hanyen leu TUHAN lene suar ba nibok di jikrau kep pima bipek hanyen lo, bikum mitiei nitig can leu ningot gom lene nok ei nibokti. 32 Tirigi jikwop jide mindhe-ndhe di jihyen kep nya lene TUHAN ma bibikwop ningut gi nisimnai bou No nok Nide. 33 Harin dima mindhe-ndhe nihyen kep dima niceu nyohou dimig gi kinei ningkom ei biba gi kinei biluei gi kei mem TUHAN a. Gino noni ba gi kinei biluei gi kei lene TUHAN ma mindhe dima hacem bou No nok Nide. Lene harin dima no dima ba mitiei bipek mindhe-ndhe dima hanyen a.
34 Gini ne TUHAN nicukti nya di Noni sok ei Musa dip ei Nungug Sinai bak mben Israel ri.