Mun di bindei di map kui tungwatuti
15
1 TUHAN yai nicukti dini yok bak Musa kin Harun, 2 mem mben Israel. Gino pinai gom nggwen nikei bisi leu api nuom dek kwei leu nikei bisi, lene gini bindei ba, map kui nuomti. 3 Gima bitut nuom di dek kwei kin nuom di dat kep ser nikei bisi cem. 4 Mpia di no dima gwam niti kin gi bong niti cem map kuisi. 5 Tungwa tou rino ngget mpia di no dima bongti ba, 6 gwam ei mpia di no dima gwamti cem lene suar noni tot nide sinsun bikek minyeiti tut lo, map kui noti kikau ug bipek mpia nicutti kep. 7 Tungwa tou rino ngget no di bindei hei nuom dima lene suar tot nide sinsun bikek minyeiti tut lo, map kui noti kikau ug bipek mpia nicutti kep. 8 Gino no di bindei hei nuom dima trai ndei gi hi di map kui noti bi lene suar gi hi di map kui noti bi dima tot nide sinsun bikek minyeiti tut lo, map kui noti kikau ug bipek mpia nicutti kep. 9 Gino no di bindei hei nuom dima gwam ei mun di ingig ei kuda ninghim dip kin mun di tungwatu igwam dip nindigsi nya lene map kui mun dima yok hagomti tu. 10 Tungwa tou rino ngget mun di no dima gwam dip lene map kui no dimati kikau ug bipek mpia nicutti kep. Suar bikwop no di kon mun dima yok tot nide sinsun bikek minyeiti tut lo, map kui noti kikau ug bipek mpia nicutti kep. 11 Gino no di bindei hei nuom dima ngget nindigsi nya tirigi piap ninda nipou bigyo lene suar hiter di no dima ngget ug bitot nide sinsun bikek minyeiti tut lo, map kui noti kikau ug bipek mpia nicutti kep. 12 Yeng di iba igtuyap bibon di no dima ngget lene suar iki hak ug. Srier di no dima ngget lene suar ipiap bipwoi-pwau.13 Gino no dima kei hanyen tu lene suar gwam njap muhwindacan bu. Gima leu api suar noni tot nide sinsun bikek minyei bousi di biam leu api map kui noti bu bi ba, noni pwoi su. 14 Lene suar noni krau hakimoi mbrei nibo yo can e, he ma krau ha tekukur nibo yo can buug sut ug ei dimbou TUHAN De Prak Meng nuhui bikes bak imam ei njap gi nimuhwindaningai. 15 Suar imam dima bui ha dima ningut gom bindig kep hum nok mun di ibui bibam mem nibon midut nibiyai nikos ser sisarti. Lene noni bui gi hi dima bibam mem nibon midut nindig ha titut yam kep hum. Tug hon nisinati dima lene imam bon midut nipiap no dima bipwoi ei TUHAN Noho bei.
16 Gino pinai hi nide minyei hei kwei lene suar noni kek minyeiti lene gwam nok no di map kuisi kikau ug bipek mpia nicutti kep. 17 Mun di iba minghas kin mindhe ningkek bibon di nide minyei hei bingget dima lene suar itot mun dima ei minyeiti lo, map kui mun dima yokti kikau ug bipek mpia nicutti kep. 18 Tirigi pinai hi yem njita tut nitnem lene suar yo cin dini ikek minyeiti lo, map kui yokti kikau ug bipek mpia nicutti kep.
19 Sop gom di ningkek kan mun yo lene map kui noti mem mmun-njap muhwindacan. Tungwa tou rino ngget sop dima ningkek lene map kui noti kikau ug bipek mpia nicutti kep. 20 Mun di hagom di sop dima gwam dip ba, bong dip ei mpe di ningkek kan mun pima lene map kui mun dima yokti. 21 Tungwa tou rino ngget sop di ningkek kan mun dima nigwamti lene suar noni tot nide sinsun bikek minyeiti tut lo, map kui noti kikau ug bipek mpia nicutti kep. 22 Tungwa tou rino ngget sop di ningkek kan mun dima nibongti lene suar noni tot nide sinsun bikek minyeiti tut lo, map kui noti kikau ug bipek mpia nicutti kep. 23 Tungwa tou rino ngget sop dima nibongti kin nigwamti cem lene map kui noti kikau ug bipek mpia nicutti kep. 24 Gino pinai gom yem njita tut nitnem di ningkek kan mun yo lene map kui nicepti kikau mmun-njap muhwindacan ba, map kui bikwop nghim nsi di no dima bongti tu.
25 Sop tou rino cut ei ninggrom di dek kwei mem nijam di ter leu nijam di ningkek kan mun yo kin sop tou rino cut ei ninggrom di dek kweiti kikau bidor njiriek nijam di ningkek kan mun nimbut kepti lene map kui sop dimati noyam kin sop di ningkek kan mun yo pima cem. 26 Lene map kui mpia di noni gwam niti kin mpia di bong niti mpe di ninggrom dek kwei dima. 27 Tungwa tou rino ngget mpia dima lene map kui noti lene suar tot nide sinsun bikek minyeiti tut lo, map kui noti kikau ug bipek mpia nicutti kep. 28 Tirigi sop dima ninggrom ntus leu su lene suar gwam njap muhwindacan bu. Njap muhwindacan dima leu ug api map kui noti bu bi. 29 Lene suar noni krau hakimoi mbrei di nibo yo can e, he ma krau ha tekukur di nibo yo can e, buug sut ug ei dimbou TUHAN De Prak Meng nuhui bikes bak imam ei njap gi nimuhwindaningai. 30 Suar imam dima bui ha dima ningut gom bindig kep hum nok mun di ibui bibam mem nibon midut nibiyai nikos ser sisarti. Lene noni bui gi hi dima bibam mem nibon midut nindig ha titut yam kep hum. Tug hon nisinati dima lene imam bon midut nipiap sop dima bipwoi ei TUHAN Noho bei.
31 TUHAN cuk Musa bisok kep mben Israel leu binhyepo igyok ngon kep nijam di map kui yokti kin nijam di map kui yokti bi. Leu binhyepo ibindei ba, map kui TUHAN De Prak Meng di jo hacan ei ide prak meng yati dima bi. Gino ibindei ba, map kui TUHAN De Prak Meng niyati dima lene yoni mitug ndei nimai drek dip. 32 Nicukti dini yok bitut pinai di nuom dek kwei leu nikei bisi di dwoi kin no di nide minyei hei kwei leu nikei bisi, 33 kin sop di ningkek kan mun kin pinai di yem njita tut nitnem di ningkek kan mun yo nya ri.