6
1 Lene TUHAN yai nidimig sutti dini bak Musa. 2 Gino tungwagom bon sisar tut TUHAN nok gini lene ma noni tin ei mindhe mem nibon midut nibiyai nikos ser sisarti. Sisar dino tungwagom tug ndigban di nisut ba ningon com noni tut hanyen bak nisut bi kin sisar dino tungwagom nggimang nisut gom nide ndigban kin sisar dino tungwagom ba ndigban biris ei nisut dip, 3 kin sisar dino tungwagom om ser drek dip ndigban di pror lene ba neheng bipai noni ngat ndigban dima bou niyai him bi lo, ngat tu cem. 4 Gino tungwagom bon sisar tug hon nisinati nya dima, 5 lene suar noni tug ndigban po noni ba nimbuk biyai pima hagom hanyen bak niceu tirigi nikei kes hukum ei noni dip lene suar noni kum ei ningat canti leu ningot gom lene nok bak niceu. 6 Lene ma noni jem domba e, he kambir nikre di bok-ba bi ningut gom e, kwei bak imam mem nibon midut nibikum Allah de ningwam leu binhyepo TUHAN mikos ser nide sisar. Suar mindhe dima nibok bit leu nok nibok di ice tut mem TUHAN De Prak Meng. 7 Lene ma imam bon midut nibiyai nikos ser sisarti dima mem no dima leu binhyepo TUHAN mikos ser no dima nide sisar.Nibon midut nindig mindhe titut kep humti
8 Lene TUHAN sok nihyet bak Musa hanyen, 9 leu binhyepo noni yai nicukti bak Harun kin nipmot bat nya tut gi indig mindhe titut kep hum. Suar ikon mindhe ei nimbar hum dokti ba, indig kep hum mem mmun kikau binjap kep. 10 Lene suar imam juk nide sinsun ndok di jei di iba minyahas linen binap kin nide sinsun bopen linen leu api ug ket atriem ndung di nimmau srigsi ei nimbar hum dokti bicom hagom ei dihyeisi ei nimbar hum dok nuhui. 11 Lene ma noni juk nide sinsun nibon midut pima leu no ba, juk nide sinsun nitu leu api kon atriem ndung dima ei mben Israel ide prak meng yati dima nisai bicom hagom ei mpia ttou nsi gom di ipigig ser mem tu. 12 Suar imam nya indig kep hum ei nimbar hum dokti bijo ninno lene ma hum dima mu hanyen au. Suar imam gom kon biei hum eisi binyohou dimig mindhe mem nibon midut nindig mindhe titut kep humti leu api ndig mindhe nimmau mem nibon midut nibiyai ningon kwes kin Allahti bikwop njap bigyokti. 13 Suar hum dima njeng kikau lene ma isindui sut ba, mu hanyen au.
Nibon midut njita nibipai sigyo bak Allahti
14 Gini ne nicukti tut nibon midut njita nibipai sigyo bak Allahti mem TUHAN. Suar no di ntun Harun him kon njita dima kwei ei nimbar hum dok nuhui. 15 Lene ma imam dima kam tepun ei ninda bia bei gom bitut mini zaitun poi mien kin biei nggrai di ui-gwang kei bindig kep hum ei nimbar hum dokti nok mun di bindo bipia no di bon sisar yai hagom bak TUHAN. Lene TUHAN mijoi sut ninghap di ngge kei dima. 16 Lene niken mijo mem Harun kin nipmot bat nya bigyem kep. Suar yoni ikang roti di roti ninjep srigsi bi dini bigyem ei mpia ttou nsi gom di kwes-kwau kui Ditde Prak Meng nuhui. 17 Ma roti ninjep srig tepunti au. Lewo TUHAN yai njita dini bak imam nya nok ide. Roti dini kwes-kwau bibor ba, noyam kin nibon midut nibiyai nikos ser sisarti kin nibon midut nibikum Allah de ningwam. 18 Roti dini mem Harun kin pinai di intun noni him di bram yam nya yongkom he igyem kep lewo ima roti di tungwatu igyai bak TUHAN dini bijo ninno bijo kikau. Tungwa tou rino ngget roti nibon midut nibiyai nikos ser sisarti dini mitug midut drek dip lewo roti dini nikwes-kwausi sindem bibor.
19 Lene TUHAN yai Nide nicukti nya bak Musa, 20 tut gino ita no di ntun Harun him nok imam. Ma no dima yai tepun kilo gom bak TUHAN mem njap dino ita noni nok imam. Suar noni ba tepun nite hi bibon midut mem njap bigyokti lene ba niken bibon midut mem mmunti. 21 Suar noni ba mini zaitun biwir roti dima leu api kang ei komfor ninjek dip. Lene ma noni ki roti dima kukiau nok nibon midut njita nibipai sigyo bak Allahti. Lene TUHAN mijoi sut ninghap di ui-gwang kei dima. 22 Tirigi ita no di ntun Harun him nok Imam Nibou Ndig ei nidipti bu lene suar imam nya igyai kep nibon midut dini bijo ninno bijo kikau. Lene suar indig roti dini hagom ei nimbar hum dokti nok mun di yoni ipigig sut ei mem TUHAN. 23 Harin dima imam nya igyem kep roti di yoni igyai bak TUHAN dini a. Noro ma indig hagom kep hum.
Nibon midut nibiyai gi kos ser sisarti
24 Lene TUHAN cuk Musa, 25 leu binhyepo noni yai nicukti bak Harun kin nipmot bat nya tut nibon midut nibiyai gi kos ser sisarti. Suar niceu bui mindhe ei nite nimbar hum dok nite bei mpia nijjai hammi mpia ttou nsi di mem nibon midut nindig mindhe titut kep humti eisi. Lewo nibon midut nibiyai nikos ser sisarti dima kwes-kwau bibor. 26 Lene ma imam di bon midut dini yem kep mikwau leu mindhe dima ei mpia ttou nsi gom di kwes-kwau kui TUHAN De Prak Meng nuhui. 27 Tungwatu hi e, he, mun mindei hi e, rino ngget mikwau di leu mindhe dini mitug midut drek dip lewo mikwau dini nikwes-kwausi sindem bibor. Gino ninggrom rus hi nide sinsun lene suar no dima tot sinsun dima ei mpia ttou nsi di kwes-kwau. 28 Gino ikwen mikwau dima ei yeng dihyeiti lene ma ibindei kinei yeng dihyei dima hak ug. Gino ikwen mikwau hi ei yengti lene ma icok yeng ninsi kei-kau leu api ipiap ei minyeiti. 29 TUHAN sindui sut imam nya ide bat di pinai nya yahagom igyem kep mikwau di kwes-kwau bibor dini. 30 Noro tut mindhe po ibui mem gima ibon midut nibiyai nikos ser sisarti di yehek ninggrom poi biyuug sut ug ei Ninsi Di Kwes-Kwau pima lene ma hi yem kep mikwau dima au. Suar indig hagom kep hum ei nimbar hum dokti.