OKUBIIKULA
EERI OYOKAANA
Ebibono ebisooka
1
1 Kunu niikwo okubiikula okuzwa egiri oYesu Kurisito,
oKibbumba okuyamuwaire,
amanyikisye abaikirirya ba Yesu ebintu ebyatira okubbaawo.
OKurisito yatumire omalaikawe okubiraga omuweereryawe oYokaana.
2 Niiye alonsya byonabyona ebiyaboine.
Atumula bukwenda obuzwa egiri oKibbumba era iye oYesu Kurisito obwakakasa.
3 Ali nʼenkabi omuntu oyo asomera abantu ebibono binu ebyʼobunaabbi,
era bali nʼenkabi abawulira eBiwandiike omu kitabo kinu,
ni babikoleraku,
olwakubba ekiseera kiri kumpi okutuuka,
byonabyona ebibawandiikeremu bituukirire.
Obusugirye eeri amakanisa
4 Nze oYokaana,
mpandiikira amakanisa omusanvua agali omu kitundu kyʼAsiya.
Ekisa nʼeidembe bibbenge mwinywe,
nga bizwa egiri oKibbumba aliwo,
era eyabbairewo,
era aiza kubbaawo.
Era ni bizwa eeri emyoyo omusanvu,
b egibba omu maiso gʼentebeye eyʼobwakabaka bwa Kibbumba.
5 Era nʼekisa nʼeidembe ebizwa egiri oYesu Kurisito omujulizi oku bikwata oku bintu oKibbumba ebiyakolere.
Era omwesigwa,
nʼeyasookere bonabona okuzuukira,
era afuga abakabaka abʼoku kyalo.
OKurisito oyo atutaka era yatutoire omu bibbibibbi byaiswe oweyafiire okulwaiswe,
6 nʼatusuuca okubba obwakabaka era abakabona ba Kibbumba oIteeye.
Ekitiisya nʼobwezye bibbe egiri iye emirembe nʼemirembe.
Amiina.
Era ngʼolwembo owerukoba luti:
7 “Ngoyo aizira oku bireri.
Abantu bʼentumu gyonagyona balimubona,
era nʼabo abamusumutire balimubona.
Abantu abatamwikirirya bonabona oku kyalo balikubba enduulu okululwe.”
Niikyo owekyalibba.
Amiina.
8 “Ninze Alufa era Omega,”
atyo oMusengwa oKibbumba oWabwezye bwonabwona waakoba,
abbaawo,
era eyabbairewo,
era aiza kubbaawo.
OKurisito abonekera oYokaana
9 Ninze oYokaana,
owoluganda agabanira aamo na inywe omu kugada,
omu bwakabaka,
era nʼomu kuguminkiriza ebitusuna olwʼokubba abantu ba Yesu.
Nabbaire oku kizinga e Patumo omu busibe,
olwʼokukobera abantu ekibono kya Kibbumba,
era nʼebifa oku Yesu.
10 Oku lunaku lwa Musengwa,
oMwoyo oMweru nʼanjikaku.
Ni mpulira e nyuma wange eigono erikooka ooti kondeere,
11 nga likoba liti,
“Ebyobona,
obiwandiike omu kitabo,
kaisi okiweererye amakanisa omusanvu ganu:
EyʼEfeeso,
nʼeyʼe Simiruna,
nʼeyʼe Perugamo,
nʼeyʼe Siyatira,
nʼeyʼe Saludi,
nʼeyʼe Firaderufiya,
era nʼeyʼe Lawodikiya.”
12 Awo ni ngaluka okubona atumula na nze.
Owenagalukire,
ni mbona ebikondo byʼamataala musanvu ebyʼezaabbu.
13 Akati wʼebikondo ebyo ni mbonawo afaananira nakimo nʼoMwana wa Muntu,
ngʼazwaire ekizwalo ekituukira nakimo ansi oku bigere,
era nga yeesibire omu kifubba omusipi ogwa zaabbu.
14 Omutwegwe nʼenziirigye byabbaire bitukula ooti byoya bya ntaama ebyeru ooti mabbaale ga ikendi.
Amaisoge nga gamoleka ooti musyo ogulunkuuma.
15 Ebigerebye nga biri ooti kikomo ekipowookeire omu musyo gwʼetanuulu.
Eigonolye nga liri ooti maizi amangi agawolomboga.
16 Yabbaire akwaite omu ngaloye endiiro enkota musanvu.
Omu munwagwe ni muzwamu empiima enjogi oku lubba nʼolubba.
Omu maisomwe nga mwaka ooti isana oweryaka nʼamaani gaalyo gonagona.
17 Owenamuboine,
ni ngwa okumpi nʼebigerebye,
nga ndi ooti mufu.
Neye nʼankwataku nʼengaloye endiiro,
nʼankoba ati,
“Tiwaatya,
ninze eYasookere era oWʼenkomerero,
18 era oMwomi.
Nabbaire nfiire,
neye obone atyanu ndi mwomi emirembe nʼemirembe,
era ndi nʼobwezye oku kufa nʼeKiina eKitakoma.”
19 Kale owandiike ebyoboine,
nʼebiriwo,
nʼebyaba okubbaawo oluzwanyuma.
20 Amakulu gʼenkota omusanvu egyoboine omu ngalo yange endiiro,
nʼagʼebikondo byʼamataala omusanvu ebya zaabbu,
niigo ganu:
Enkota omusanvu niibo abamalaika ba makanisa omusanvu.
Kaisi ebikondo omusanvu ebyʼamataala,
niigo amakanisa omusanvu.