Erko Erkampakko Yohannise Laankay
1
Ho erkuusi hune eraki ano qhimakkossia.
Atho xiskatossi qhollamitipa dhelle haahinub,
dhuke ano uuma an hune cʼikadhi holuppa ano patta anu kodhdhunna he dhukeesi ara kaasay ihhune cʼikadha,
2 dhukissakka the inena kittatte qaghappa isi perre ye hume sheeghe saasa ine qale qaaknay.
3 Teexakko Haallikkitopa hxurakkopa nakayho Huusupa ho Miʼaye Huusu Iyyesus Kristoose dhukepa cʼiknottay iʼine kaasay qale kodhdha.
4 Miʼaadhe haahina tookke tookke qhamossi Haallikko Appa ine hayo teexi kula qhooti dhukettay dhikitepa isi qaaka maallay uuma an hxasoodhi.
5 Atho xiskatossi kaanasamti,
haantukka olho anhe dhihame woʼi ho paayyotenu qagha dhiishoy qhawthitto qandhikka,
hussakka qhama ille cʼikanaanic.
6 Cʼikno dhukatte payyo hayo Haallikkitoosi dhikkise.
Hayusakka qhama payyotatte apaqte kula ho iyya:
“Cʼiknottay qaakindha.”
7 He Iyyesus Kristoose qhamu qhawho kodhdhipa piyyisaama okayu ye dhukkaysadhe dhappisampawhe kishakki qhaatʼissa lighi.
Qhawho hasa ligha ho koro dhappisapa ho Kristoose toora.
8 Qhama shillimaathe hoqhqho akkadhintennu dhiishoy,
hxaayye anna tardhiteesi qhamu huni dhapintennu kokkisadha.
9 Qhawho kollinko Kristoosettay ye qaakipa na sikapuyu qale Haallikko ye qaghi,
kapay qhawho kollinko Kristoosettay qaaka qale Haallikko Appapa Miʼaye uso qale.
10 Yaxakkakki kollinku male karo haahundhi okayna payyni manne haahundhisa olo akkadhe,
olonu xase.
11 Qhawho nu xaasa ho maghno huusu na qale kodha ikkodhdhini.
Ille Nakaysadhe
12 Ahxay olho kisha an hune tooxni qagha,
ikkodhitama kapay warkʼateema tooxe anu woʼi,
naqharray hxaso haani qhamu hoqhqho kodhdhininnu hune kula okayepa ille qale thoruyadhenukki an kippadhi.
13 Dhelle qasessi thaahi qholamitina nakayho ihhela paye.