Katapessi Haallikko Noohe Qale Xuli
9
Waako Noohepa dhelle huususi hasi payipa sakoy:
“Dhaladhapa naqankuppa piyye hoqhqhanku!
2 Ghaapisepa murkise taahundhi aaghe luhhettay ashshapa aaghe holottay haqapa uumata piyyaʼita erottay kuqama pana hxaare qandheete kittate qaakasa ikkodhdhita,
hissa kaasay xarghe haahundhisa itteexameye.
3 Qhamossi xayna qharaʼita dhishito kaasanna ayiʼonu hune teexi kula uumata lelleeha qagho sheegha kaasasikka qhama yiintenu an hune teexi.
4 Naqharray napse kʼeeqhtatte kittatte qhooti qaghti maallay sakanko olona kʼeeqhte elisuusi olo yiʼi.
5 Qhawho qhawho poghi kaasay kʼeeqhte qhawsa farina kapeema ikkasqatamna,
kʼeeqhte qhawsa farina ho uso poghipa aaghitakitokka an peeranna.
6 Qhawho lighno Waakitotakki uumami maallay qhawho qhawho poghi kaasay xargho qhawhitotakki farri.
7 Hune kapay dhaladhapa naqanku,
sanynye taahundhikka piyyema innaqata.”
8 Xaysa tupettay Waako Noohepa dhellesi huusu naqale qaghana hasinna payi:
9 “Haadhi,
hunepa dhalata hune kala okayina qalle katape an xulli,
10 holuppa uumata qagho sheegha hune qale qagha kaasay:
aaghe holottay haqapa qholepa aaghe mandhitopa hissa hune qale markapatte kittatte lighe uumata piyyate qaghottay qagha kaasay qalle katape an xulli.
11 Xaynu koru katapi an hune qalle xulittay:
lanka uumata qagho sheegha kaasay qandhettay ye panni,
kappekka lanka qandhe patitatettay ye patinti.”
12 Waakokka hasi payi:
“Milikite Anopa hunepa uumata qagho sheegha hune qale qagha kaasa pana dhalata hune kala okaynanu kodhdhina tisi.
13 Magharte Tayyusikki an urratte sappeema xawwani,
hussakka katapesi Anopa kappe kitteema an xulina milikite ikkodhdhinti.
14 Xeere an urrattettay moontoosi shudhipa maghartekka urrattate sappeete armadhi kaasanna,
15 katapesi an hunepa uumata qagho sheegha kaasa qalle xulisiki an hella taayni.
Xaynu koru lanka qandhe uumata qagho sheeghasi ye patisne.
16 Xeere magharte urrattatte saappeete armatipa hiʼa kaasanna katapessi perre ye hume sheeghenna Anopa uumata piyyatte qagho sheeghana kittatte qaghaasi an hela taayna.”
17 Waakokka Noohena hasinna payi:
“Maghartisay katapessi Anopa uumata piyyatte qagho sheegha kaasay qale an xulina milikite ikkodhdhinti.”
Noohepa Dhelle Huusu
18 Dhellesi Noohe markapate kittatte lighe haadhi hisi:
Seemepa Kaame pana Yafeete.
(Kaameka paappo Keneʼaane.)
19 Dhellesi Noohe izzax haadhi hisi,
waarsho piyyina qagha kaasakka usundhisanaki dhaladhi.
20 Noohekka qhawho pasho qhotadha qhooti kodhdhi maallay woyneesikki dhishadhi.
21 Kuyyaqako tooko tʼayye woynate qukuppa hxayyoodhoppa tʼurkumaqe tunkaana kala rafu.
22 Kaamesi paappo Keneʼaane ana payi palanko paappo huusuna ihhiʼina ghintekati lighipa Seemepa Yafeetenu qallu.
23 Seemepa Yafeete kapay palanko paappo huusundhina hiʼe qhooti ye woʼe maallay laallesikki akkeppa hashshaawe sappema kapadhonkippa konankonnayye ashonkippa palanko paappo huusundhina urkesonki.
24 Noohenakka hxayye inna pattipa haqu tupettay olhossi miʼaye huusu takkayya kodhiisi iʼarripa,
25 hasa payu:
“Keneʼaane ho qhiicʼami ikkodhdha!
Seemepa Yafeetena kalla aylito ayleete ikkodhdha!”
26 “Holuppa Haallikko,
Waako Seeme issakami!
Keneʼaane Seemenu iʼayle kodhdha.
27 Waako saapanko Yafeetesi inaqisa,
Yafeetekka itunkana Seemenna qaaki!
Keneʼaane Yafeetenu iʼayle kodhdha.”