Kʼayeelepa Apeele
4
Attaame naxaye tuusu Hewwaane qali rafi isekka sheeghoppa shampo dhali,
“Kʼarkʼarsa Haallikkitotakki an shampo tayadhi” kippaytipa makaxkoka “Kʼayeele”a nu kodhi.
2 Nakaleema qaso Kʼayeele Apeelesikkib dhalti.
Apeele koshshito qeemmeete,
Kʼayeele kapay qhotampako.
3 Kuyyaqako tookko Kʼayeele olhossi poxadhinaki akkipa Haallikkonu teexakko teexu.
4 Apeelekka qeemmessi payyotatte dhaladhennaki orppo koopi okaasipa teexakkonu itʼtʼoosu;
Haallikkokka Apeelepa teexakko huusuttay ihxhxasoodhi.
5 Naqharay Kʼayeelepa teexakko huusuttay ye hxasoodhu husa maallay Kʼayeele uumi miroodhipa miinte tuusukka na kumadhi.
6 Haallikkokka Kʼayeelena hasinna payi:
“Moʼo ho miireesi?
Moʼo maallakki miinte hola kumatti?
7 Olho xeesa akkotti payni anu hola akkanni ahxay?
Naqharray olho xeesaki atu kodhu payni cʼuppo haahuna ghintati ribhipa isi ho rafise woʼa naqharray atho usoosi pute ho gheeqasa.”
8 Xaysa tupettay Kʼayeele qaso huusu Apeelena hasinna payi:
“Into waadhdhipa liqakko kula ashshini!”
Iliqakosinna qaghana Kʼayeele qaso huusu Apeeleemi haqipa poghu.
9 Haallikkokka Kʼayeelena inna payi:
“Qaso haahu Apeele ahaate?”
Kʼayeelekka:
“Anu ari;
ano tiqitampakko qaso haayyuna inta?”
Kippayipa nu holasu.
10 Haallikkokka inna payi:
“Olissa moʼo akkotti?
Kʼeeqhte qaso haahuna kappenu karo haayyu irriirti.
11 Lammi atho ho qhiicʼamti;
kappisay kʼeeqhte qaso haahuna hola akkanu pako qhashtina aghghoramnay.
12 Kappisaasi apooxadha payni manghoosi ye ho awshasinti;
piyye qhaatʼetekka qhawho ghoghoramapa ho qhaqhashadha akkodhdhinti.”
13 Kʼayelkka Haallikkito hasinna payi:
“Kʼitʼaate thaayyu qhooti uuma naqti maallay dhooqhe anu alkasni.
14 Haadhi kuyyu piyyatte ayye ghorti,
Minte Taahunakka anu armanni,
piyye qhatʼinakka qhawho ghoghoradhapa ho qhaqhashadha an kodhdhini,
qhawho ye tayi kaasakka iyye poghna”
15 Haallikko kapay hasina payi:
“Qhawho ho kohxna ye qaghi!
Qhawho hoosi poghi xargho taxxantakki haaluyamni.”
Hussa maallay qhawho usooma hxafi kaasay qhamu ye uso poghninu Haallikko milikiteesikki nu kodhdhi.
16 Xaysa tupettay Kʼayeele Haallikkito miinatte issikapuyipa ashsho piyye Eteenena karo oqhqhaye lighattay piyye Noodhesac qaakoy.
Sanynye Kʼayeele
17 Kʼayeele naxaye tuusu qali rafi tupettay ishsheeghtipa Henookeesi dhali,
katamassi Kʼayeele ghupadhiisi makaxko miʼaye huusuttay “Henooke” napayuppa ooqu.
18 Henooke Irratineesikki dhali,
Irratineekka Mehuyaeelesikki dhali,
Mehuyaeelekka Metusaeelesikki dhali,
Metusaeelekka Lameheesikki dhali.
19 Lamehe xiske lakki he ana payi Aattapa Tʼiila issixi.
20 Aatta miʼaye ana payi Yapalesikki dhalti Yapalekka korossi qhole koshadhapa isi tunkanadheete kalla qaakana paappo huusundhi.
21 Qaso huusu Yopaalekka korossi shubhalepa sonqho xikkadhana paappo huusundhi.
22 Tʼiilakka shampo ho anna payina Tupal-Kʼayesiki dhalti.
Usokka hawdhaththo ho naasepa sipleete mahxaadhe kodhdha,
alawte tuusukka Naima ana payi.
23 Lamehekka xiske huusuna hasina payi
“Hune xiske haayyu into olho an hune qalliisi yela apaqha:
ponkora tooko ye shoqhipa ye bhaqhaso maallay
anokka an shoqhipa pogha.
24 Qhawho Kʼayeelesi poghi xargho taxxanki kʼatʼaʼamni kipayamti payni
qhawho yeesi poghi lammi hudhanko taxxanpa taxxan na ghutakki kʼatʼaamni.”
Seetepa Henoose
25 Attaame ihholipa naxaye tuusu qale rafunna ishsheeghtipa shampo dhali isekka:
“Apeelesi Kʼayeele poghi kapeemi Haallikko ye shampo teexi” kipaytipa makaxko huusu Seeted napayi.
26 Seetekka shampo ana payi Henoosesikki dhali.
Xinkisanaki korokka makaxko Haallikkitoosi ooqe paayyi.