Pebila la lakɛ sɛla bayopɔe n dekɛ tabɛ la ayema yia
6
1 N nyɛ' te Pebila la lakɛ sɛla bayopɔe n dekɛ tabɛ la ayema yia.
Mam n nyɛ' bala la,
n me wom kelompagehedoma banaahe la ayema ta nyabera wo saa n ta'anhere la te,
Wa'ana.
2 Te n behɛ nyɛ' yeho peelega.
Se'em n ban' bo la daa zanle la tanhɔ,
te ba bo en muŋa.
A nya daa dɛna n nyaŋera ban' yeho yɛ'ɛha.
3 Te Pebila la le lakɛ sɛla bayopɔe n dekɛ tabɛ ganɛ ayema pa'ahɛ yi'i.
Ge te n le wom kelompagehedoma se'em n pa'ahɛ boyi' la ta yeti,
Wa'ana.
4 Te yeho mɔlega yehe na.
Ba bo se'em n daa ban' bo la la paŋa te a sa'ahɛ zaberɛ teŋa wa zuo,
la a bahɛ te nɛreba koora taaba.
Ba bo en la sokantɛ.
5 Te Pebila la le lakɛ sɛla bayopɔe n dekɛ tabɛ ganɛ la pa'ahɛ botan' la.
Te n le wom kelompagehedoma,
se'em n pa'ahɛ botan' la ta yeti,
Wa'ana.
Te n behɛ nyɛ yeho sabega.
Se'em n ban' bo la tare sɛla te ba makera lɔgɔrɔ a nu'uhe poan.
6 Te mam wom konkore n tɔgɔre kelompagehedoma banaahe la zen'en na la yeti,
Mui la laa me'en n de dayenɛ yɔɔrɛ.
Ge te ki' la laahe setan' me'en n de dayenɛ yɔɔrɛ.
Ge,
da sagom kaam la,
la daam la.
7 Te Pebila la le lakɛ sɛla bayopɔe n dekɛ tabɛ ganɛ la pa'ahɛ bonaahe.
Te n le wom kelompagehedoma se'em n pa'ahɛ bonaahe la yeti,
Wa'ana.
8 Te n nyɛ' yeho kɔɔan.
Se'em n ban' bo la yu'urɛ daa dela Kum ge te se'em te ba yi'ira zen'sɛka te ke'endoma bɔna la daa dɔla a poore du'a du'a.
Ba bo ba paŋa teŋa zuo lɔga anaahe la deyema te ba ko' nɛreba yɛhera zaberɛ poan,
la kom poan,
la ban'an poan,
la goodunhen poan.
9 Te Pebila la le lakɛ sɛla bayopɔe n dekɛ tabɛ ganɛ la pa'ahɛ bonuu la.
Te n behɛ kaanbegɔ zen'an la teŋa la,
nyɛ' te nɛresɛba te ba daa ko' la sɛɛhe Yenɛ yelehom la Yenɛ yɛla la n yete ba bɔna se'em la zuo.
10 Ba kaahɛ kekeko yeti,
Gaŋɛ Zan'an Daana n de Fa'a la yelemɛŋɛrɛdaana wa,
wane ma'an te ho yeti ho gankɛ nɛreba la teŋa wa zuo gee namehɛ ba la ban ko' tɔ la zuo?
11 Bama ayema woo to'e la fuwoko n ane fa'a.
Ge te ba daa yele ba te ba gura se'em ma'an te Yesu dɔlɔba sɛba te ba wan ko' ba,
wo ban daa ko' bama se'em la kanlɛ ta paɛ.
12 Te n le nyɛ Pebila la daa le lakɛ sɛla bayopɔe n dekɛ tabɛ ganɛ la n pa'ahɛ boyoobe.
Te teŋa miim te yentule la sobe wo fusabelega te ŋmarega lebege mɔlega wo ziim.
13 Ŋmarebibihe la me ze'ele la saŋgbanɛ zuo zɔngɛra teŋa wa zuo na.
Ba zɔngɛra mɛ wo sabeeo kantɛ n lobe miim tia te kenkama zɔngɛra na la.
14 Te saŋgbanɛ la mɛlom wo gɔŋɔ te ba kilom la,
ge te zɔya woo la teŋse'ehe te ko'om kae bahɛ teŋasoka la woo daa ka bɔna bini.
15 Te nadoma teŋa wa zuo,
la sɛba n sɔe nɛreba teŋa wa zuo behera,
la pɛɛntɛɛnreba zuodoma la,
la bontateba la sɛba n gane zan'an,
la nɛreba woo,
la yamehe la sɛba n dagɛ yamehe,
sogɛ yogoro la tanhe poan.
16 Yɛta tanhe la zɔya te lu' ya to zuto na la ya lilom to bahɛ se'emdaana n zin' na'am gɔŋɔ la poan la la sunsunsɛka te Pebila la tara kena na wa.
17 Ba sunsunyiim ninmɔ'ɔrɛ dabaherɛ la paɛ,
ane n wan ta'an yelese'ere?