Ane n nare te a lakɛ bonɔ bayopɔe la n dekɛ tabɛ ganɛ la ge yu'ɛ kɔ
5
1 N le nyɛ' te se'em n zin' na'am gɔŋɔ la poan la zanla gɔŋɔ a zuɔ nu'o poan.
Ganɛ la loga ayi' la zan'an perɛ mɛ la golehegɔ ge te ba dekɛ sɛla n tabɛre tabɛ kɔ zen'enhen seyopɔe.
2 Ge te n le nyɛ' Yenɛ soŋora se'em n tare paŋa te a mɔɔla vole kekeko te,
Ane n nare te a lakɛ bonɔ bayopɔe la n dekɛ tabɛ ganɛ la ge yu'ɛ kɔ?
3 Ge nɛra ka boe saazuo ha bii teŋa ha n wan ta'an yu'ɛ ganɛ la behɛ ko poan.
4 N daa kele.
Se'ere n sɔe la,
nɛra daa ka boe nara te a yu'ɛ ganɛ la la a behɛ ko poan.
5 Te kema la ayema yele mam yeti,
Da kɛla.
Behɛ,
Gbegenɛ la n yehe Yuda buuri poan na la,
se'em n de David yaaŋa kantɛ la n nyaŋɛ ya.
A ta'an lakɛ zen'enhen seyopɔe la ge yu'ɛ ganɛ la.
6 Te n le nyɛ' te nɛra ayema ane wo Pebila ze'a na'am gɔŋɔ la teŋasoka.
Kelompagehedoma la la kema la n kae ko bahɛ teŋasoka.
Pebila la ane me wo ba ko' kɔ mɛ la.
Ko tare la ila ayopɔe la nini iyopɔe.
Nini iyopɔe la dela sɛɛhe seyopɔe n ze'ele Yenɛ zen'en na la te ba daa tom ba teŋa wa zuo woo la na.
7 Te Pebila la paɛ to'e ganɛ la se'em n zin' na'am gɔŋɔ la poan la zuɔ nu'o.
8 Te n eŋɛ bala la,
kelompagehedoma banaahe la kema pihiyi' la banaahe la lu Pebila la nɛŋan.
Bama ayema woo tare la kɔnlɔgɔ la sanlema laahe te digilom perɛ bini me'en.
Ba dela Yenɛ nɛreba la sohoga la.
9 Ba yoon yoonpaalɛ bo Pebila yeti,
Ho nare ho dekɛ ganɛ lakɛ sɛla te ba tabɛ sugumnɔɔren boyopɔe la.
Te ba daa ko' ho mɛ,
te kum la poan te ho da' buuri woo,
la yetɔgom woo,
la nɛreba woo,
la teŋhe woo bo Yenɛ.
10 Ho eŋɛ ba te ba dɛna malemadoma buuri tona bɔ'ɔra Yenɛ,
ge wan sɔna teŋa wa zuo behera.
11 N le behɛ ge wom Yenɛ soŋoreba kekeko n kɛn tuha,
paɛ tuha kɔbehe pia ze'a kae na'am gɔŋɔ la,
la kelompagehedoma banaahe la,
la kema la,
12 ge yoona kekeko te,
Pebila la se'em te ba ko' la,
la nare te a to'e paŋa,
la tarega,
la yam,
la kpe'eŋo,
la na'ahegɔ,
la soŋa,
la pɛnka.
13 N le wom bonvɔa woo n boe saazuo ha,
la teŋa wa zuo,
la teŋa teŋa ha,
la ko'kanra poan,
la sɛla woo n boe ba poan konkore te ba yuune yeti,
Se'emdaana n zin' na'am gɔŋɔ la poan la,
la Pebila la tare pɛnka,
la na'ahegɔ,
la soŋa,
la paŋa wuuha.
14 Te kelompagehedoma banaahe la lebehe yeti,
Taarɛ.
Te kema la lu teŋa na'ahe.