Nɛra zɛleŋa dela bonpeka ge a tare paŋa
3
1 N sɔɔnrɔ,
da ton bote ya te ya pa'ala.
Se'ere n sɔe la,
ya mi' te tomam pa'aleba han ka pa'ala nɛreba sɛla n de ma'an,
tomam gankerɛ n wan gana zan'an.
2 Ge nɛra ka boe ka tuura.
Dena wa dela sera.
Se'ere n sɔe la,
nɛra han bɔna ge ka tuura a yetɔgom poan,
a daana ba'ahɛ la nɛra ge tana a mɛŋa tara.
3 Behɛ ya yiri.
Nɛra han bɔta te a yeho doohe n bote bo doohe zen'an,
a ne dekɛ la gariŋenɛ lɛ' bɔ tana bo gɔɔnra.
4 Le behɛ ya ɔɔnrɔŋkanra n boe ko'om poan.
Sabeeo kantɛ han pon lɔbera ŋmɛ'ɛra ko yɛ'a,
nɛra n ne dekɛ vugure mɔna tara ko yɛ'a n bote ko keŋɛ se'em la.
5 Wana la nɛra yetɔgom dela boyena.
Nɛra zɛleŋa dela bonpeka ge a tare paŋa.
Behɛ ya bugum panra n pɔ'ɛ se'em ge ne taɛ nyɔ' gookantɛ.
6 Dene poan zɛleŋa tooma an wo bugum la.
Be'em ta'an ze'ele zɛleŋa poan taɛ iŋa la zan'an.
Wana ane wo bugum la tɔ'ɔra to bɔŋa zan'an,
bugum bona wa ze'ele la sagaŋɔ zen'en la na.
7 Asaala ta'an malehɛ sɛla woo vɔe bɔna doone la ko'om poan la sɛla woo n ɛngera saazuo.
Asaala n malehɛ bana zan'an.
8 Ge nɛra kan ta'an malehɛ a zɛleŋa.
Zɛleŋa la kɔ'ɔn tara la be'em kena na.
Sɛla woo n ze'ele zɛleŋa zen'en na,
ane wo yabega n tare kum kena se'em na la.
9 Zɛleŋa la te to tara pɛngera to Daana Na'ayenɛ se'em n de to Sɔ la.
Zɛleŋa kaŋa mea n bala te to tara toora to taaba sɛba te Na'ayenɛ maalɛ ba te ba ana wo a mɛŋa la.
10 Zɛleŋa kaŋa n pɛngere Na'ayenɛ ge le toora nɛra.
Bala,
n sɔɔnrɔ,
la ka nare te to eta wana wa.
11 Nɛra wan ta'an ankɛ ko'somɔ la ko'be'ero buleyeŋɔ poan?
12 N sɔɔnrɔ,
kenkaŋa wan ta'an wom ta'ama,
ge te sinsanbega me wom mu'uro?
Aai,
nɛra kan ta'an ankɛ ko'somɔ bulesɛka n tare yaarom ka poan.
13 Nɛra boe ya poan tara yam somɔ ge te a nini yo'ɛ?
Enŋa daana sontii a eta etesoŋɔ.
A han eŋɛ bala ge sirihe a mea Na'ayenɛ zen'en,
wana wa wan pa'alɛ te a seren tare yam somɔ.
14 Ge hon se'em n nyuune la nɛreba gee kɔ'ɔn tɛn'ɛha la ho mea ma'an yele,
da ihege saazuo ŋmɛ' ho nyɔn'ɔn te hon tare yam somɔ.
Ho han eŋɛ bala,
ho ka tɔgɔre yelemɛŋɛrɛ.
15 Yamsom bona ka ze'ele Na'ayenɛ zen'en na,
ge bo ze'ele la saaleba tɛn'ɛyooro zen'en na,
la sagona la zen'en na.
16 Nɛra han nyuuna la nɛreba ge kɔ'ɔn bɔta te sɛla woo dela enŋa ma'an denɛ,
la bahere en te a etegɔ woo de'a la etebe'ero ge te a tooma ka dɔla ma'an.
17 Ge yamsomɔ sebo n ze'ele Na'ayenɛ zen'en na la n seren de yamsomɔ.
Yamsomɔ bona dela yelemɛŋɛrɛ.
Bo tare la sunma'ahom kena na,
nɛremama,
la sonɔ.
Bo bahɛ te nɛreba tara la giinle la taaba gee tona toonsoma.
Nɛra se'em n tare yamsomɔ bɔ'ɔra taaba ka tɛn'ɛhe boyi' boyi',
ge me ka pan'aha nɛreba.
18 Nɛresɛba n tare sunma'ahom ge ka tare sunsunya soŋore nɛreba mɛ te ba tara sunma'ahom ge ka tara sunsunya.
Bala te ba nya wan nyɛ' toonsoma ba etegɔ poan.