Hebrudoma
Ge nananawa a tare la a Dayɔa la tɔgɔra bɔ'ɔra tɔ
1
1 Yuuma yuuma ha la,
Na'ayenɛ yuun tare la a nɔtɔgɔheba tɔgɔra tomam sɔyaabdoma yɛla zo'e zo'e saŋhe yema yema.
2 Ge nananawa a tare la a Dayɔa la tɔgɔra bɔ'ɔra tɔ.
Na'ayenɛ bahɛ te a Dayɔa la naam sɛla woo n boe teŋa wa la saazuo.
La dela Dayɔkana mea,
te Na'ayenɛ loe te a ta sɔna sɛla woo ba'ahegɔ poan.
3 La dela enŋa n bahɛ te to mina Na'ayenɛ nɛɛhom n ane se'em.
A me le kɔ'ɔn tara la Na'ayenɛ wɔnɛ.
La dela a paŋa poan te n yele se'em la bahɛ sɛla woo n boe teŋa wa la saazuo.
Te n daa ta bahɛ te Na'ayenɛ bahɛ nɛreba be'em ba'ahɛ la,
a nya daa ta zin'an la Na'ayenɛ N Gane Zan'an la zuɔ nu'o saazuo ha.
4 Na'ayenɛ n daa bo a Dayɔa yu'urɛ te de gana Yenɛ soŋoreba la.
Bala mea,
te a bahɛ te a Dayɔa la gana ba.
5 Se'ere n sɔe la,
Na'ayenɛ daa ka yele a soŋoreba la ayena me wo n yuun yele a dayɔa se'em la te,
Zina wa ho dela mam Dayɔa te mam dɛna ho Sɔ'.
(Yooma 2:7) A me daa pon ka yele yɛhera ba ayema me poan te,
N wan dɛna ka sɔ,
te ka me dɛna n dayɔa.
6 Ge Na'ayenɛ n daa mahone te a tom a dayɔdeeŋa sɛka n de dayɔyia nɛra woo poan teŋa wa zuo na la,
a daa yeti,
Na'ayenɛ soŋoreba la woo wan nyeena a zuo.
7 Ge n daa tɔgɔra yɛhere a soŋoreba la,
a daa yeti,
A bahɛ te sabeeo n dɛna a soŋoreba te bugum peelom dɛna a yamehe,
8 ge han de'a a Dayɔa la yeti,
Yenɛ,
ho na'am la boe la bala ka tara ba'ahegɔ.
Ho na'am doore la dela narehom doore.
9 Ho nɔŋɛ la tontɔɔtooma,
ge yaɛ pototooma.
Bala zuo te Yenɛ n de ho Yenɛ la son ho la nyeema kaam te ho gana ho taaba la.
10 Na'ayenɛ yuun kelom yeti,
Pin'ileŋɔ poan na la,
hom biŋe teŋparɛ wa ɛnberɛ,
te saazuo wa dɛna hom mɛŋa nu'o toonɛ.
11 Ba wan mɛlom ge te hom bɔna.
Ba wan aanhom wo fuo.
12 Ho wan teehom ba wo futo la,
ge te ba kelom aanhom.
13 Le yɛ'ɛha me,
Na'ayenɛ daa ka yele a soŋoreba la la ayema me te,
Zin'ire n zuɔ nu'o wa na gura te n bahɛ te ho diŋdoma lebege ho tagatɛ.
14 Dene poan,
bane n nya de Na'ayenɛ soŋoreba la?
Ba dela sɛba n ka tare nɛresaala iŋnaanɛ ge tona bɔ'ɔra Na'ayenɛ.
Bama te a tom ba te ba wa'ana soŋɛ nɛresɛba n bote ba nyɛ' faanrɛ.