Ge Na'ayenɛ mɛŋa wan mɛ yire bo' ho
7
1 Se'em ma'an te Naba David nya ta zin'an a yire na'am gɔŋɔ la poan fai la, ge te Na'ayenɛ la bo en vo'ohogo a diŋo la woo n kae en bahɛ teŋasoka la, 2 te naba la nya yele Yenɛ nɔtɔgɔha Natan yeti, Behɛ yele wa, mam ton kɛn'ɛra dɔɔ mɔlɔsonɔ yire poan, ge te Yenɛ nɔbiŋere daka la zɛ'a sogorɛ poan. 3 Natan lebehe naba la yeti, Keŋɛ, la ho ta eŋɛ ho suunre n bote ho eŋɛ se'em la, ge Na'ayenɛ la boe la hɔ. 4 Yu'uŋkoŋɔ mea poan te Na'ayenɛ le tɔgɛ bo' Natan yeti, 5 Keŋɛ ta yele mam yameŋa David yeti, Na'ayenɛ la n yele se'em n wana. Hom n de se'em n wan mɛ yire bo' mam te n kɛn'ɛra? 6 Se'em ma'an te mam daa tare ya ze'ele Mizraim teŋa poan yehe na la tara tara la zina, mam ka kɛn'ɛre yire poan. Mam boe la sogorɛ poan kena la ya. 7 Mam n tare Israeldoma wa ɛ doohe zen'se'ehe woo la, n tabelɛ soke sɛba te mam bo ba nɔɔrɛ te ba beha Israeldoma wa la yeti, Bene n sɔe te ya ka mɛ dɔɔ mɔlɔsonɔ yire bo' mam?8 Bala la nya yele mam yameŋa David yeti, Pɛɛntɛɛnreba Na'ayenɛ yeti, Mam mɛŋa n loe ho duŋkeeŋai te ho behera mam nɛreba Israeldoma, 9 doohe ho poore a kenɛ zen'an woo, ge bo' ho nyaŋerɛ ho dima zan'an woo. Nananawa n wan bo ho yu'urɛ kantɛ n zone la teŋa wa nɛrekanreba. 10 Le yɛ'ɛha n wan loe zen'an bo' mam nɛreba Israeldoma mɛ ba kaŋkaŋe, te potɔpa kan le nyaŋɛ bike ba wo pɔhe na la 11 saŋsɛka poan te mam loe kema te ba behera nɛreba Israeldoma. N me wan bo' ho nyaŋerɛ ho dima zutin. Ge Na'ayenɛ mɛŋa wan mɛ yire bo' ho. 12 Te ho han ka ta bɔna, kule paɛ ho sɔdoma, n wan tee ho dayɔa kayema diihe ho na'am te a sɔna sɔ'ɔlom la behera. 13 A wan mɛ yire bo' mam, ge te n mɛ a na'am la me wuuha wuuha. 14 N wan dɛna ka sɔ, te ka me dɛna n dayɔa. Ka han ganlom, n wan feebe ka la kpa'aherɛ wo nɛresaaleba n ete se'em la, n wan bahɛ te nɛresaaleba ŋmɛ en.a 15 Ge n kan malom luke n zo'ohogɔ la te n tara bɔ'ɔra en la a zen'an wo mam n daa luke de Saul se'em te n foe en ho ninin se'em la. 16 Ho yire la ho sɔ'ɔlom kɔ'ɔn yeti bo bɔna mam nɛŋan la bala wuuha, te na'am la me bɔna yire bala wuuha. 17 Te Natan dekɛ yetɔgɔbɔna, la liligere dena wa tɔgɛ bo' David.
18 Te Naba David kɛn' ta zin'ire Na'ayenɛ la nɛŋan yeti, Daana Na'ayenɛ, mam me dela ane, n yire dela dene, ge te hom zɛnkɛ mam saazuo wa'ana paɛ zina beere? 19 Daana Na'ayenɛ, yele dena wa n dela yelepeka ho nɛŋan, ho pon tɔgɛ ho yameŋa wa yire zɛnke mam gaŋɛ. Lana wa dela ho pa'alegɔ yɛhɛra nɛreba, Daana Na'ayenɛ? 20 Mam David le tare la dene te n yele bo ho? Daana Na'ayenɛ, hom mɛŋa mi' mam ho tontona wa. 21 Ho nɔɔrɛ la te ho biŋe la ho mɛŋa suunre nɔŋerɛ zuo, te ho bahɛ te yele ana woo wa'ana tom, te mam ho tontona wa baŋɛ. 22 Bala zuo la, Daana Na'ayenɛ, ho kanregɛ mɛ. Se'em ka boe ana wo hom. Tomam toba n wom sɛla woo se'em la. Yenɛ ka le bɔna pa'ahɛ hom zuo. 23 Ane n boe ana wo ho nɛreba Israeldoma wa, n boe ba teŋparɛ wa zuo? Te hon yɔ to'e to te ho nyɛ yu'urɛ. La dɔla la yelese'a te ho tom, sa'ɛ teŋhe la ba baga, ho nɛreba la nɛŋan. Ho yɔ to'e ba ban boe Mizraim teŋa la poan. 24 La dela hom mɛŋa n loe Israeldoma wa ge sɛ ba ze'ele te ba dɛna ho mea nɛreba yɛ'ɛha te hom n Na'ayenɛ me dɛna ba Yenɛ. 25 Ge, Yenɛ Na'ayenɛ, bahɛ te sɛla woo te ho biŋe ho nɔɔrɛ mam ho tontona wa la n yire mea poan la seren wa'ana tom. Bahɛ te la tom wo hom n biŋe ho nɔɔrɛ la se'em la 26 Bala te ba wan pegera ho yu'urɛ yeti, Pɛɛntɛɛnreba Na'ayenɛ la n de Israel Yenɛ, ge te ho tontona David yire la me wan mɛ ze'ele kaŋkaŋe ho nɛŋan. 27 Se'ere n sɔe, hom Pɛɛntɛɛnra Na'ayenɛ Israel Yenɛ n lilige liligere dena wa pa'alɛ ho tontona wa yeti, n wan mɛ ho yire. Bala zuo la, ho tontona wa iŋa kpeŋɛ mɛ te a po'ohɛ po'ohegɔ kona wa bo ho na wa. 28 Bala, Daana Na'ayenɛ, hom de Yenɛ. Ho yetɔgom woo dela sera, hom n biŋe nɔɔrɛ te ho wan eŋɛ yelesoma ana wa woo bo ho tontona wa. 29 La seren dɛna bala, te ho kan' som bahɛ a tontona wa yire poan te de bɔna ho nɛŋan bala yɛ'ɛha. Se'ere n sɔe la, hom Daana Na'ayenɛ n tɔgɛ. Ho kan' somɔ la wan seren bɔna ho tontona wa yire la poan te de tara kan' somɔ bala yɛ'ɛha.