Wom ya Na'ayenɛ yelehom, Israeldoma wa
4
1 Wom ya Na'ayenɛ yelehom, Israeldoma wa. Na'ayenɛ tare la yele la yamam sɛba n boe teŋa wa poan wa. Birikinte ka boe bii nɔŋerɛ bii Yenɛ zɔɔlom bɔna teŋa la poan. 2 Toorɛ la ponpɔrɔŋɔ la nɛre koa la zun'wa la kabonhe tooma ma'an n damene. Ba gbite mɛ te ziim ka'arɛ tagale ziim ka'arɛ. 3 Bala zuo, teŋa la wan kɛle, te ka poan nɛreba la zan'an mɛlom. Ka mɔen dunhe la niihe n ɛngere saazuo la zim n boe ko'omen wan mɛlom.4 Bahɛ te se'em da zɛrɛgɛ bii daama se'em. Ya nɛreba ane wo se'em tare la yele la malemadoma wa. 5 Ya gɛnte mɛ wontɛɛŋa la yu'uŋɔ zan'an, te nɔtɔgɔheba ponpɔrɔŋdoma la tu'una la ya. N wan sagom ya ma. 6 Ya sagom mam nɛreba la mɛ la yamam n ka tare baŋerɛ yɛla. Yamam n zagahɛ baŋerɛ la zuo, mam wan zagahɛ ya te ya kan dɛna mam malemadoma. Yamam n tam mɛ ya Yenɛ pa'alegɔ la zuo, n wan tam mɛ ya kɔma yɛla. 7 Malemadoma la n zo'ore se'em, ba be'em zo'ore la bala mea. Ba dekɛ ba yi'a soŋa la tee fagehom la nyanɛ. 8 Ba dite la mam nɛreba la be'em la poan, tara koŋkoma'ahom la ba toonfɛn'ɛha la. 9 N wan namehe malemadoma la la nɛreba la namehegɔ yeŋɔ. N wan namehɛ ba zan'an ba be'em la zuo, ge yɔ ba ba be'em la. 10 Ba wan dita, ge kan malom tegɛ. Ba wan tom yaalegɔtooma ge ba kan malom tebegɛ, la bama n zagahɛ mam Na'ayenɛ ge dɔla yena a se'a la zuo.
11 Daam kɛka la daam paalom n dekɛ ba bɔkerɛ keŋɛ. 12 Mam nɛreba wa dole la dɔɔ te ko pa'alɛ ba sɛla, ge gura dibega te ka bo ba kan'aŋɔ. Yan tare koŋkoma'ahom te ya dɔla baga zonɔ poan tona yalomtooma sea n bahɛ te ya ka tara birikinte la mam n de ya Yenɛ la. 13 Ba dole la zɔya zuto kaanbera, ge nyɔ'anra nyɔ'an bo'olom zɔya zuto, la tikanra tilain, la tiihe se'ehe woo n ane vikam tilain, se ma'ahom la zuo. Bala zuo, ya pɔyɔɔhe tone la kabonhe, te ya dayɔɔhe pɔgɔba tona kabonhe. 14 N kan namehɛ ya pɔyɔɔhe la ba yaalegɔtooma la zuo, bii n namehɛ ya pɔyɔɔhe pɔgɔba, ba kabonhe tooma zuo. Se'ere n sɔe la, boraahe la mɛŋa ziire la kabonhe tooma ɛɛra, naɛ la baga zonɔ yiyɛɛhe kaanbera. Nɛresɛba n ka tare bɔkerɛ n ne doohe sɔrɔɔ seko sagom n bala.
15 Israel, hom tone ho kabonhe la, da dekɛ taɛ Yuda, te a ganlom. Da tare kɛn' Gilgal poan, bii ho zom Bet Aven. Da le tara Na'ayenɛ yu'urɛ wa pɔta.
16 Israel toba kpa' mɛ wo botela toba n kpa se'em la, Na'ayenɛ yeti a eŋɛ la wane gu'ura ba wo pebila n boe bɔn'ɔn kantɛ poan se'em la? 17 Epraim dekɛ a mɛŋa lagom la baga, bahɛ ya en a ma'an.