Yeremia 48

Se'em n wan sagom Moab teŋa

1 Moab teŋa yele n wana. Pɛɛntɛɛnreba Na'ayenɛ la n de Israel Yenɛ la yeti, yele boe Nebo teŋa wa zuo, ka wan gan'an voore. Nyanɛ wan kɛn' Kiriataim teŋa wa, ba nyaŋɛ ka mɛ. Ba gbi' ka pɛɛntɛɛnreba deto la bahɛ mɛ, te to lu'te la dɛna nyanɛ. 2 Nɛra ka le na'aha Moab teŋa wa. Dima wan nyokɛ Hesbondoma, maahena te a wan tom Moab be'em. A yeti, Bahɛ te to sagom teŋa la, te a da nyaŋɛ lebege teŋkantɛ. Yamam sɛba n de Madmen teŋa nɛreba wa, so'a la wan bahɛ te ya ma'ɛn. 3 Kaahe dɔɔrɔ n lute Horonaim teŋa poan la, dima n zaberɛ la ka, sagona ka. 4 Moab teŋa sagom ya, ka kɔma n bala kɛla fabela, 5 ge kɛla zɔna Luhit teŋai la, sagaŋɔ ma'an yɛla te ba tɔgɔra Horonaim sɔya zuto. 6 Zɔya ya to'e ya vom. Ane ya wo tia n ze' pɔgɔtia poan ha la. 7 Yamam n dekɛ ya mɛhe delom ya mɛhe tooma, la ya tarega la zuo, ba wan zabɛ nyaŋɛ yamam, la Kemos bagarɛ la, la sɛba n kaanbere dɛ la, la de tontoneba la woo, pɛnregɛ ya loŋɛ teŋa. 8 Sagona la wan sige teŋa woo zuo, te teŋa la kayena me kan peɛn en. Bɔn'ɔn wan sagom, ge te paberɛ me mɛlom. Na'ayenɛ n pon tɔgɛ se'em la.

9 Too ma'an n de Moab tɔntɛ, Moab teŋa wan ba'ahom sagom, a teŋkanra la zan'an wan gan'an voore, te nɛre beeliho ka bɔna se poan. 10 Pɔtɛ boe hom se'emdaana n ka tom Na'ayenɛ n bo ho toonse'ere la zuo, pɔtɛ boe hom se'emdaana n ka bahɛ te so'a la kɔrɔna kan sone te ka kɔrɔna se'e la zuo. 11 Moab teŋa n pɔhe na, ka boe la fai. Wo daam te ba ka bi'ihe bo, ba kan ta'an ka'ahɛ bo enŋɛ ligehe poan. Ba ka tabelɛ pɛnregɛ en loŋe teŋa, a soŋa kelom bɔna mɛ. 12 Na'ayenɛ yeti, Saŋa la kene na, n wan tom nɛreba na, te ba wa'ana dekɛ ligehe wa ka'ahɛ sɛla n boe ka poan la, ge wɔnrɛ ka bura bura. 13 Kemos bagarɛ la zuo, te Moab teŋa wan wɔnregɛ, wo Israel teŋa n yuun dekɛ ba mɛŋa delom Betel bagarɛ la, te ba teŋa la yuun wɔnregɛ se'em la. 14 Yamam wan ta'an eŋɛ la wane ŋmɛ' ya nyɔn'ɔn, te tomam dela boraahe, tomam mi' zaberɛ?

15 Se'em n wan sagom Moab teŋa, la ka teŋkanra la, n bala paɛ na wa te a borase'ehe te a ganhɛ la pon tole kɔrɔŋɔ, Naba sɛka yu'urɛ n de Pɛɛntɛɛnreba Na'ayenɛ la, en yele. 16 Moab teŋa nɔyalegerɛ, la ka sagaŋɔ dabeha la paɛ na. 17 Yamam sɛba n de a sɔɔnrɔ la, la sɛba n mi' en la, kele ya bo ya en Yele ya yeti, na'am doore la, n de soŋa doore la, kɔ' ya. 18 Nabia Dibon wa, nya ze'ele ho soŋa zen'an la, sige na zin'ire teŋkɛ'ɛŋa wa poan. Se'ere n sɔe la, se'em n wan sagom Moab teŋa la, n bala zabera la hɔ wa. A pon sagom ho paŋa zen'enhe la mɛ. 19 Aroer teŋadoma wa, ze' ya kenkɛleŋa, ge beha sɛla n ete. Soke boraa, bii pɔgɔsɛka n zote yɛha yeti, Bene n eŋɛ? 20 Nyanɛ n kɛn' Moab teŋa, la kan lu' la. Fabele ya, ge kɛla. Ze'ele ya n lɛm Arnon Kolaa la ya mɔɔlɛ yeti, Moab teŋa gan' la voore.

21 Gankerɛ n sige Moab, Holon la Yaza la Mepaat teŋa, 22 Dibon la Nebo la Bet Diblataim teŋa, 23 Kiriataim la Bet Gamul la Bet Meon teŋa, 24 Keriot la Bozra la teŋse'ehe woo n boe Moab teŋa poan la zan'an zuo. 25 Na'ayenɛ yeti, Moab teŋa paŋa la ba'ahɛ ya, te a nu'o kɔ'.

26 Bahɛ te a buge, se'ere zuo, a zɛnkɛ la a mɛŋa la Na'ayenɛ. Moab teŋa wan bilom a tiinro poan, me lebege yelɔ'ɔrɔ kenkanrɛ. 27 La Israel n daa pon dagana nayiga la, a daa lebege la yelɔ'ɔrɔ kenkenrɛ bo hom Moab teŋa wa, te ho daa ne ta tɛɛn a yele lɔbera zuo. 28 Moab teŋa nɛreba wa, bahɛ ya teŋkanra la poan bɔŋa, ge keŋɛ ta kɛn'ɛra tanhe poan ha, ana ya wo dayene n keŋɛ ta tɛ' a teko boko nɔɔrɛn la. 29 Te wom Moab teŋa wa pa'alɛ mea yele. Moab teŋa wa ba' pa'ala la ka mea, la ka soŋa la, la ka pa'alɛ mea la, la ka toonwuruba la, la ka nyɔn'ɔn ŋmɛ'a la gaŋɛ. 30 Na'ayenɛ yeti, Mam mɛŋa mi' te a voole la yoo, a nyɔn'ɔn ŋmɛ'a la dela yoo, te a tooma la dɛna yoo. 31 Bala zuo te mam kɛla bɔ'ɔra Moab teŋa wa, mam kele bɔ'ɔra la Moab teŋa zan'an, mam kele bɔ'ɔra Kir Hareset teŋa nɛreba wa mɛ. 32 Mam kele bɔ'ɔra Sibma teŋa nɛreba wa n ane woo tiihe wa mɛ, gana Yazer teŋadoma. Ho yia tɛɛn zoe ko'kantɛ wa mɛ, ta paɛ Yazer teŋa poan ha. Dima n bala lu' ho tiihe va'am la poan, la ba wɔla deena la zuo te a sagom ba la. 33 Nyeema, la popeelom ka le bɔna Moab teŋsoŋa wa poan. N bahɛ te daam ka le bɔna daam ŋmɛkerɛ zen'an la poan. Nɛra ka le bɔna ka poan yoona vɔɔla la popeelom. Voole se'ere n voole bini la le dagana popeere voole. 34 Hesbon, la Eleale, la Yahaz teŋhe boe la kaahega poan, kaahega ma'an n ze'ele Zoar, paara Horonaim, la Eglat Selisiya teŋhe poan. Nimrim kolehe kɛɛhe mɛ. 35 Na'ayenɛ yeti, N wan bahɛ te sɛba n dole kuŋkune woo zuo kaanbera ba baga Moab teŋa poan la ba'ahɛ zan'an. 36 Bala zuo la, mam kɛle mɛ la Moab teŋa wa wo nɛra peepere taleteŋa la, ge kɛla bala mea bɔ'ɔra Kir Hareset teŋadoma. Se'ere n sɔe la, ba tarega la zan'an wan mɛlom. 37 Zuo woo siie mɛ, te tɛɛŋa woo koonhɛ, te ŋmɛ'a beena gan'an nu'o woo zuo, te nɛra woo futo dɛna sunsagaŋɔ futo. 38 Te fabelegɔ to'e Moab yiya la poan, la sɔya zuto zan'an, Na'ayenɛ yeti, Ge mam wɔnregɛ Moab teŋa mɛ, woo nɛra n ka bote dokɔ ge wɔnregɛ kɔ se'em la.

39 Behɛ teŋa la n wɔnregɛ se'em, behɛ ban kaahe se'em, Behɛ Moab n bire a poore la nyanɛ se'ere taaba. Moab teŋa wa nya lebege la dabeem lɔkɔ bo teŋhe sese'ehe, ge dɛna yelɔ'ɔrɛ bo se. 40 Na'ayenɛ yeti, Beha, a wan suŋe na wo tuguho la, yeregɛ a kelompagehe zabɛ la Moab, 41 zabɛ fan' a teŋhe la, la a paŋa zen'enhe la, de daarɛ la, Moab teŋa pɛɛntɛɛnreba la sunya wan fɔlɔgera wo pɔka n boe dɔgom poan, te ka suunre fɔlɔgera se'em la. 42 Moab teŋa wa, la ka nɛreba wan sagom. Se'ere n sɔe la teŋa la zɛnkere la ka mea la Na'ayenɛ. 43 Moab teŋa nɛreba wa, Dabeem, la boko, la bɛnregɔ n gan' gura ya. 44 Se'em woo n zɔ peɛn dabeem la, a wan lu' boko la poan, se'em woo n nyaŋɛ ze'ele boko la poan doe na, bɛnregɔ la wan nyɔkɛ en. Na'ayenɛ yeti, Moab teŋa namehegɔ yuunɛ la, a wan bahɛ te yele ana wa sige teŋa la zuo na. 45 Nɛresɛba n zote la, zɔ taregɛ mɛ, nya paɛ Hesbon teŋa poan, zɛ'a vɔ'ɔha, bugum n ze'ele Hesbon teŋa la na, bo ze'ele la Sihon teŋa na. Bo di sagom Moab teŋa la, n de nɛreba la paŋa zen'an la mɛ. 46 Yele boe Moab teŋa wa zuo. Nɛresɛba n dole Kemos bagarɛ la bɔregɛ ya, ba pɛnregɛ nyɔkɛ ho dayɔɔhe mɛ, nyɔkɛ ho pɔyɔɔhe. 47 Ge Na'ayenɛ yeti, La bala zan'an, dabeha kene na, te n wan sɛ Moab teŋa lebehe ze'ele. Moab teŋa gankerɛ la beene n ta bala.