Mam yeti n gbi la mam n mɛ' sɛla la bahɛ
45
1 Yetɔgom sebo te Na'ayenɛ nɔtɔgɔha Yeremia tɔgɛ te Neria dayɔa golehɛ bo enŋɛ ganɛ poan, saŋsɛka te Yuda teŋa boraa Yosia dayɔa, Yehoiakim zin'an Yuda na'am gɔŋɔ la poan, a yuuma anaahe poan la n wana. 2 Na'ayenɛ la n de Israel Yenɛ la n yele se'em n wana, Baruk, 3 hom yeti, Mam boe la yele poan, se'ere zuo, Na'ayenɛ dekɛ la too malom pa'aha n too poan, mam kaahɛ taregɛ mɛ, ka kan ta'an go'e vo'ohe.4 Bala, yele en yeti, Na'ayenɛ yeti, Mam yeti n gbi la mam n mɛ' sɛla la bahɛ, ge voen mam n borɛ sɛla la bahɛ, teŋa la zan'an n bala te n yɛta wa. 5 Bala la, hom eere la sɛla n ane soŋa bɔ'ɔra ho mɛŋa yoi? Na'ayenɛ yeti, da ɛɛra ba, ge mam yeti n sagom iŋganɛ woo mɛ, ge hom n ye' zen'an woo, n wan bo ho vom, te la dɛna ho zaberɛ la yɔɔrɛ n bala.