Yeremia 44

Bene n sɔe te ya sagona ya mea

1 Na'ayenɛ n dekɛ yelehom sebo doohe Yeremia poan bo Yudadoma la n kɛn'ɛre Migdol, Tapanhes, Mempis, la Patros teŋhe la n boe Mizraim teŋa poan la n wana. 2 Pɛɛntɛɛnreba Na'ayenɛ la n de Israel Yenɛ la yeti, Ya nini nyɛ namehegɔ seko te mam bahɛ te ko sige Yerusalem la Yuda teŋhe la zan'an zuo na la. Behɛ se zina wa, se gan' la voore, te nɛra ka bɔna se poan, 3 ba be'em la te ba tom, nyiiha mam sunsunya, la bama n bote ba kaanbera, ge tona baga se'a te bama, bii yamam, bii ba sɔyaabdoma ka tabelɛ mina la. 4 Ge la bala zan'an, mam tone n nɔtɔgɔheba la bala ya zen'an na, yɛta ya te n belone ya mɛ te ya da tom be'em sebo te mam ka bɔta wa. 5 Te ba ka wom, bii ba kelehe la ba ŋmɛregɛ ba mɛhe yehe ba potɔɔ la poan na, la ba bahɛ da kaanbera baga la. 6 Bala te mam ka'ɛ n sunsunyiim bahɛ Yuda teŋhe la Yerusalem teŋkanra la zuto, te bo di ba sagom, te sɛsɛla ka le bɔna ba poan, wo ban ane zina se'em wa.

7 Ge nananawa, Pɛɛntɛɛnreba Na'ayenɛ la n de Israel Yenɛ la yeti, Bene n sɔe te ya sagona ya mea wana, koora boraahe la pɔgɔhe la bonbilipaalehe la la kɔmlɛɛhe Yuda teŋa wa poan, te ya buuri la fiin wa me pon ka gee wa? 8 Bene n sɔe te ya tara ya nu'uhen tooma nyiiha mam sunsunya wa, kaanbera baga Mizraim teŋa wa poan te ya keŋɛ ta zin'an ka poan wa? Ya bote ya kɔ'ɔn ŋmaɛ la ya mea bahɛ, te nɔpɔtɛ dɔla ya, te ya dɛna teŋa wa woo bonkɛhela? 9 Ya tamɛ ya yaabdoma, la Yuda teŋa nadoma, la ba pɔgɔba, la yamam mɛŋa, la ya pɔgɔba ganleŋɔ seko te ya ganlom kɔ Yuda, la Yerusalem teŋhe poan la mɛ? 10 Tara tara la zina, ba ka sigihe ba mɛhe bii ba zɔta dabeem. Ba ka dɔla mam pa'alegɔ la bii malema la te n ze'ele bo ya la ya yaabdoma.

11 Bala zuo la, Pɛɛntɛɛnreba Na'ayenɛ la n de Israel Yenɛ la, yeti, N maahom mɛ te n tare sagaŋɔ wa'an ya zuo na, n wan ba'ahɛ Yuda teŋa wa. 12 N wan bahɛ te Yudadoma n gee fiin wa ge lo' ba potɛn'ɛrɛ te ba keŋɛ Mizraim teŋa poan ta zin'ire wa, sagom zan'an. Mizraim teŋa la poan, so'a wan kɔrom ba, te kom ko' ba ta ba'ahɛ. Pɔhɛ bonbila n boe ba poan, ta paɛ ba bonkotɛ, kom la so'a wan ko ba ta ba'ahɛ. Te ba lebege kɛhega la dabeem lɔkɔ, te nɔpɔtɛ dɔla ba, te ba dɛna yelɔ'ɔrɔ lɔkɔ. 13 N wan namehɛ sɛba n kɛn'ɛre Mizraim teŋa la poan la, wo mam n dekɛ so'a, la kom, la too namehɛ Yerusalem teŋa se'em la, 14 bala te Yuda buuri wa n gee fiin wa n wa'ana kɛn'ɛra Mizraim teŋa poan wa, ba ayena mɛ kan peɛn, bii vo'e nyaŋɛ lebe Yuda teŋa la poan na. Ya wan ta bɔta te ya lebe na, ge ya kan nyaŋɛ lebe na, han dagana sɛba fiin wa n wan ta peɛn lebe na.

15 Te borase'ehe woo n mi' te ba pɔgɔba kaanbere la baga la, la pɔgɔse'ehe n ze' bini la, la nɛrekooŋɔ la, la sɛba woo n kɛn'ɛre Patros teŋa n boe Mizraim teŋa poan la, yele Yeremia yeti, 16 Han dɛna yelehom sebo te ho tɔgɛ bo to Na'ayenɛ yu'urɛ la poan la, to kan to'e bo. 17 Tomam yeti to tona la tomam n biŋe to nɔɔrɛ te to tona se'em la, to kaanbera pɔgɔnaba la n sɔe saazuo la, ge kaanbera en daam, wo tomam, la to yaabdoma, la te nadoma, la te kpɛ'ɛndoma n daa ne bɔna Yuda, la Yerusalem teŋhe poan eta se'em la. Te daa ne tara dia mɛ, ge panrɛ, te daaŋɔ ka bɔna. 18 Ge se'em ma'an te to bahɛ, ka le kaanbera pɔgɔnaba wa n sɔe saazuo wa, ka kaanbera en daam la, sɛla woo mɛlom mɛ, te so'a, la kom ko' tɔ. 19 Te pɔgɔhe la me yeti, La dela sera, tomam wan kelom kaanbera poge naba wa n sɔe saazuo wa, ge kaanbera en daam, hom tɛn'ɛhɛ te tomam ne maalɛ boroboro, golɛ a wɔnhom enŋɛ boroboro la poan, ge kaanbera daam bɔ'ɔra en la, tomam ma'an n ne eta bala, ge te to sereba kan bɔna bini?

20 Te Yeremia yele nɛreba la zan'an, boraahe, pɔgɔhe, la nɛresɛba woo n boe bini lebehe n wana wa la yeti, 21 Han dɛna kaanbe seko te yamam, la ya yaabdoma, la ya nadoma, la ya kpɛ'ɛndoma, la ya nɛreba la woo kaanbera Yuda la Yerusalem teŋhe poan la. Na'ayenɛ ka tam la yele. La boe a potɛn'ɛrɛ poan mɛ. 22 Na'ayenɛ ka le tana beha ya be'emtooma la, ya ganleŋɔ seko te ya ganlona la. Bala zuo te ya teŋa la sagom, gan'an voore, te nɔpɔtɛ bɔna ka zuo, te ka tara nɛra ka poan wo lan ane se'em zina wa. 23 Yamam n nyɔ' ko'ɛnka la tona be'em ya Na'ayenɛ la nɛŋan la, ka nana la en bii dɔla a pa'alegɔ la a malema la a kan'aŋɔ la te a ze'ele bo ya la zuo, te sagaŋɔ mea n le zɛ'a te ko sige ya zuo zina.

24 Te Yeremia yele nɛreba la, la pɔgɔhe la zan'an yeti, Kelehe ya Na'ayenɛ yelehom wa, yamam sɛba n de Yuda buuri kɛn'ɛra Mizraim teŋa wa poan wa, 25 Pɛɛntɛɛnreba Na'ayenɛ la n de Israel Yenɛ la yeti, yamam, la ya pɔgɔba la n tɔgɛ se'em la, ya pon tom ba'ahɛ mɛ n bala. Ya yeti, te maahom mɛ, te to tom tomam n biŋe nɔɔrɛ te to tom se'em la, te wan kaanbera la pɔgɔnaba wa n sɔe saazuo wa, ga kaanbera en daam. La dela bala, tare ya ya nɔɔrɛ la te ya biŋe la, ge kaanbera ya daam la bɔ'ɔra ya bagarɛ la. 26 Yamam Yudadoma sɛba n kɛn'ɛre Mizraim teŋa poan wa, kelehe ya Na'ayenɛ yelehom wa, n pɔ' la n yu'urɛ kantɛ wa, te yamam Yudadoma wa n kɛn'ɛre Mizraim teŋa poan wa, kan le nyaŋɛ ya'ɛ nɔɔrɛ porɛ mam yu'urɛ wa yeti, N pɔ' la to Daana Na'ayenɛ se'ere n vɔe wa. 27 N yeti n gu'ura ba mɛ, la n tona ba be'em ma'an, dagɛ som, so'a, la kom, wan ko' Yuda teŋa nɛresɛba woo n kɛn'ɛre Mizraim teŋa poan la, ko' ba te ba ayena. 28 Sɛba n wan peɛn so'a la, wan dɛna la fiin wa, wan ze'ele Mizraim teŋa poan lebe teŋkana wa poan na zin'ire, Yuda buuri sɛba n gee fiin wa la, zan'an han ta lebe Yuda teŋa wa poan na zin'ire, ba wan baŋɛ nya ane yetɔgom n tom? Mam, bii bama? 29 Na'ayenɛ yeti, danlehom bona n wan pa'alɛ te mam yeti n sagom ya mɛ zen'kana wa poan, bii la bahɛ te ya baŋɛ te mam yele se'em la wan seren tom dela, 30 N wan dekɛ Mizraim teŋa naba Hopra, eŋɛ a diŋdoma sɛba n eere en te ba ko' nu'uhen, wo mam n dekɛ Yuda teŋa naba Zedekia a diŋdaana Kaldea Naba Nebukadnezar, se'em n eere a ko' la nu'uhen se'em la.