Da keŋɛ ya Mizraim teŋa poan
42
1 Te zaba nɛŋadoma la zan'an, la Yohanan, la Hosaiah dayɔa Yezania, la nɛreba la zan'an, pɔhɛ bonbila, ta paɛ bonkotɛ, 2 zan'an ihege mɛ keŋɛ nɔtɔgɔha Yeremia zen'an, yele n yeti, Kelehe to fabelegɔ wa, la ho po'ohɛ bo Na'ayenɛ la n de ho Yenɛ la, tomam sɛba n gee fiin wa la zuo. Ho mɛŋa la nini nyɛ te tomam n daa zo'e se'em la, to fiin wa n gee. 3 Bahɛ te Na'ayenɛ la n de ho Yenɛ la, pa'alɛ tɔ to wan keŋɛ zen'an, la to wan eŋɛ sɛla. 4 Te nɔtɔgɔha Yeremia yeti, La ane soŋa, n wan po'ohɛ bo Na'ayenɛ se'ere n de ya Yenɛ la, wo yan soke se'em la, te Na'ayenɛ la n lebehe ya se'em la, n wan dekɛ yele ya, n kan sogɛ sɛla la ya.5 Te ba lebehe yele Yeremia yeti, Na'ayenɛ la n de ho Yenɛ la, han doohe ho poan tɔgɛ se'ere bo to' te to ka doohe sɛla woo te, Na'ayenɛ dena wa, dɛna tomam aze'elenyɛdaana, la de gankɛ tɔ. 6 La han pon bɔta la dɛna som, bii be'em, tomam wan nam Na'ayenɛ se'ere n de to Yenɛ te to tona hɔ de zen'an wa nɔɔrɛ, to han nana en, sɛla woo wan ana soŋa bɔ'ɔra tɔ.
7 Dabeha pia ba'ahegɔ poan, te Na'ayenɛ tɔgɛ bo Yeremia. 8 Te Yeremia yi Yohanan, la zaba nɛŋadoma la woo n boe la en la, la nɛreba la zan'an, bia, ta paɛ bonkotɛ, lagahɛ na, 9 yele ba yeti, Na'ayenɛ se'ere n de Israel Yenɛ te ya tom mam te n tare ya fabelegɔ la ta bo dela yeti, 10 ya han wan ma'an ya mɛŋa yee teŋa wa poan, n wan sɛ ya ze'ele, n kan gbi' ya bahɛ. N wan se'ere sɛ ya ze'ele, n sagom ya. La pon daam mam mɛ la mam bahɛ te sagaŋɔ seko sige ya zuo na la. 11 Da zote ya Kaldea naba la, wo yan zote en se'em wa, da zote ya dabeem la en. Mam Na'ayenɛ n tɔgɔre. Mam Na'ayenɛ boe mɛ la ya, n wan fan' ya, ge to'e ya a nu'uhen bahɛ. 12 N wan pa'alɛ ya n ninbɔn'zɔrɛ, te naba la me pa'alɛ ya ninbɔn'zɔrɛ, ge bahɛ ya te ya bɔna ya mea teŋa poan.
13 Ge ya han sina ge yɛta te yamam kan kɛn' teŋkana wa poan, zagahɛ Na'ayenɛ la n de ya Yenɛ la nɔɔrɛ, 14 ge yɛta ya mɛhe yeti, to wan pon keŋɛ sige la Mizraim teŋa ha, zen'an te zaberɛ ka bɔna, te to kan wom zaba tentana peebego la, zen'an te kom ka bɔna bini la, la to ta kɛn'ɛra bilam fai la, 15 ye wom ya Na'ayenɛ yelehom la, yamam Yuda teŋa nɛresɛba n gee fiin wa, Pɛɛntɛɛnreba Na'ayenɛ la, n de Israel Yenɛ la yeti, Ya ye han maahom te yamam yeti ya kɛn' la Mizraim teŋa poan ta bɔna bilam, 16 so'a sɛka te ya zɔta la wan paɛ ya Mizraim teŋa la poan na, te kom sebo te ya ka bɔta te ya nini nyɛ la paɛ ya bini na, te ya ki ka poan. 17 Nɛresɛba woo n lo' ba sunya poan te bama bote ba keŋɛ la Mizraim teŋa poan ta bɔna la, so'a, la kom, la too wan nyɔkɛ ba bilam, te ba ki bini. Namehegɔ seko te n wan bahɛ te ko sige ba zuo bini na la, wan ko' ba, kan ge la fiin me. 18 Pɛɛntɛɛnreba Na'ayenɛ la n de Israel Yenɛ la yeti, wo mam sunsunyiim te n yuun ka'ɛ bɔ bahɛ Yerusalem teŋa nɛreba zuo la, bala mea te ya han sina ge keŋɛ Mizraim teŋa poan, te n wan ka'ɛ bɔ bahɛ ya zuo na. Ya wan ta lebege sɛla n de kɛhega zogɔ, te nɔpɔtɛ dɔla ya, te ya pon kan le malom nyɛ zen'kana wa le yɛ'ɛha.
19 Bala zuo la, Na'ayenɛ yele yamam Yuda teŋa nɛreba wa n gee fiin wa la yeti, da keŋɛ ya Mizraim teŋa poan. Mini ya te mam yele ya mɛ la ninmɔ'ɔrɛ zina wa, 20 te ya tue mɛ, yamam mɛŋa n tom mam Na'ayenɛ se'ere n de to Yenɛ la zen'an, te n dekɛ ya yele po'ohɛ bo Na'ayenɛ la n de ya Yenɛ la, te sɛla woo te a yele to, to wan tom. 21 Mam yele ya sɛla te Na'ayenɛ la n de ya Yenɛ la yele ya, ge ya ka nam a yelehom la te a dekɛ doohe mam poan yele ya la. 22 Ya mini ya soŋa, te yan lo' ya sunya te ya keŋɛ zen'an ta zin'ire la, so'a, la kom, la too wan nyɔkɛ ya bilam, te ya ki bini.