Ismael yehe Mizpa teŋa la poan
41
1 Ŋmarehe seyopɔe poan, te Elisama dayɔa Netania, me dayɔa Ismael, se'em n de nabia, ge me dɛna naba la kpɛ'ɛndoma ayema la, doohe la boraahe pia wa'an Gedalia zen'an na, Mizpa teŋa poan. Te ba zan'an nya ta zin'an dita, 2 te Ismael, la boraahe pia la n doohe en wa'ana la, ihege kɛ' Gedalia la so'a, ko' en, la Kaldea naba n loe en te a beha teŋa la. 3 Ge me ko' Yuda teŋa nɛreba sɛba n lagom bɔna la Gedalia, Mizpa teŋa poan la, la Kaldea teŋa pɛɛntɛɛnreba sɛba n boe bini bala ma'an la.4 Ban ko' Gedalia la ba'ahɛ la, yeem beere, te nɛnɛra nan ka baŋɛ la, 5 te boraahe pihinii n ze'ele Sekem, la Silo, la Samaria teŋhe poan paɛ na, te se tɛɛhe siie, te se futo aanhom, te se iŋa ta' ta', te se tara boom bo'olom, la ko'ɛnka bo'olom yɛ'a na te ba bo Na'ayenɛ Yenɛ yire la poan. 6 Te Ismael yehe Mizpa teŋa la poan, kɛla to'oha ba, en ta paɛ ba la, yele ba yeti, wa'an ya Gedalia zen'an na. 7 Te ba keŋɛ ta kɛn' teŋa la teŋasoka, te Ismael, la a boraahe la n dole en la, gin' boraahe wa, kɔrom se, lobe ba bahɛ bulega poan bilam. 8 Bala ma'an la, te boraahe pia lagom bɔna ban kɔrɔne sɛba la poan, nya yele Ismael yeti, Da ko tomam, ge tomam tare ki' la mui la kaam la seerom, te la sogɛ bɔna vatɔ poan ha. Te a bahɛ bama, la ba nɛreba, ka ko' ba. 9 Bulega sɛka te Ismael dekɛ nɛreba la te a ko' la bahɛ ka poan la, dela bulega kantɛ sɛka te naba Asa yuun tu' te a gu' a mɛŋa, se'em ma'an te enŋa, la Israel naba Baasa yuun tara zaberɛ la, te Ismael ko' nɛreba ta perɛ ka. 10 Te Ismael nya nyɔkɛ nɛresɛba woo n yee Mizpa poan la, la naba la pɔyɔɔhe, la nɛresɛba woo n boe Mizpa teŋa poan, te zaba nɛŋadaana, Nebuzaradan tare ba na eŋɛ Gedalia nu'uhen la, nya maahom te a yakɛ Yordan Kolaa kɛn' Ammon teŋa poan.
11 Ge Karea dayɔa Yohanan, la zaba nɛŋadoma sɛba n boe la en la n ta wom toonbe'o seko taaba te Ismael tom la, 12 te ba boraahe la zan'an yehe te ba ta zabɛ la Ismael, wa'ana paɛ en kole gilega kantɛ la n gai' Gibeon teŋa poan la. 13 Nɛreba la n ta nyɛ' Yohanan, la zaba nɛŋadoma la woo n dole en la, ba poorɛ pee mɛ. 14 Te ba zan'an, bama sɛba woo te Ismael nyɔkɛ ba Mizpa teŋa tara yɛ'a la, bakɛ lebe na lagom la Yohanan, 15 ge te Ismael, la a boraahe la, senii zɔ peɛn kɛn' Ammon teŋa poan.
16 Te Yohanan, la zaba nɛŋadoma la n boe la en la, ze'ele Gibeon teŋa, tare nɛresɛba te Ismael ko' Gedalia, la pɛɛntɛɛnreba la pɔgɔhe la kɔma, la nɛrekanreba, ge pe'ere ne ba yɛ'a la, lebe na. 17 Te ba keŋɛ ta kɛn' Gerut Kimham, n lɛm la Betlehem la, ban boe sore yɛ'ɛha keŋɛ Mizraim teŋa, 18 te ba doohe bilam peɛn Kaldeadoma nu'uhen. Dabeem n wa tara ba, se'ere n sɔe Netania dayɔa Ismael n wa ko' Ahikam dayɔa Gedalia, se'em te Babilon naba wa loe en te a beha teŋa la.