27
1 Da ŋmɛ'ɛra nyɔn'ɔn la beere. Se'ere n sɔe la ho ka mi' dabaherɛ la n wan ana se'em. 2 Nɛreba han pɛngɛ hɔ, la ane soŋa, ge la ka ane soŋa te ho pɛngɛ ho mɛŋa.3 Gerego gere etegɔ tare la daaŋkantɛ, daanseko n tebegɛ gana taŋkantɛ bii tentɔnɔ duurɛ. 4 Se'em n yebegere pɔgɔlone nɛreba ge ka tara ninbɔn'ɔn, ge nyuunre daana n gane zan'an.
5 La ane soŋa te ho tanhɛ nɛra nɛreba teŋasoka nyane hon n tare ho nɔŋɔlom sogora ba. 6 Nɛra zɔ en pɔgɔlom en, la dela potɛn'sonɛ. Se'ere n sɔe la a eŋɛ te a pa'ale a zɔ la me, ge la kan sagom en. Diŋdaana kɔkere ka tare potɛn'sonɛ, la pon ka pakɛ sugumnɔɔren se'em te a kɔkera.
7 Se'em n tegɛ zagahere seerom mɛ, ge se'em te kom tara bon mi'ihego zan'anhom bo en me.
8 Nɛra en tuunɛ ɛɛra a yire se'em la, a ane me wo niiŋa en tuunɛ ɛɛra ko tokɔ la.
9 Kaam somɔ, la digilom n tare popeelom se'em la, ge zɔ'soŋɔ nyɛlom ze'ete la a kan'aŋɔ poan na.
10 Da tamɛ ho zɔdoma bii ho sɔ zɔdoma yele. Ho han bɔna muguhego poan da keŋɛ ho sɔɔn zen'en te a soŋɛ ho, se'em n lɛm ho ta'an soŋɛ ho nyana ho sɔɔn n boe zen'en zaan.
11 N bia, tara yam, te n poore peera te n ta'an lebehe sɛba n zɛrɛgerɛ mam la.
12 Potɛn'sonɛ daana ne nyɛ' be'em sogɛ a mɛŋa mɛ, ge yampɔ'ɔredaana ne to'ohɛ bo mɛ nyɛ' namehegɔ.
13 Se'em n ze'ele to'e sanɛ bo saana, to'e ya a fuo biŋe, se'em n ze'ele to'e sanɛ bo pɔgɔyaalega, bahɛ ya te a yɔ.
14 Ho han ihege daarɛ woo bolika po'oha ho tadaana vɔɔla, ho tadaana la tɛn'ɛhe te la dela pɔtɛ.
15 Saa n niihe ge ka gɔ'ɔra, la pɔgɔnyunyuŋa dela boyena, 16 te ho han bɔta te gu' nyunyun la, la ane wo hon yeti ho gu' sabeeo bii ho tɔgele kaam la nu'o se'em.
17 Kurugo n saahere kurugo, bala mea te nɛra soŋora a tadaana.
18 Tontonsɛba n behere kenkaŋa n dite ka mu'uro, bala mea te tontonsɛba en ete ba kpɛ'ɛndoma n bote se'em la wan nyɛ' yɔɔrɛ.
19 Nɛra han behɛ ko'om poan nyɛta a nɛŋa se'em la, te nɛra han tɛn'ɛhe soŋa doohe a potɛn'ɛrɛ la a tooma poan, a wan baŋɛ n de nɛra se'em buuri.
20 Yɔɔ ka malom nyɛ' kum sebo te a bɔta la zan'an, te nɛreba mɛ ka malom nyɛ' sɛla te ba bɔta la zan'an.
21 Nɛreba nyɛlegere sanlema la sanlenpeela te ba behɛ ba ane soŋa bii ba ka ane soŋa, ge nɛreba te ba bɔ'ɔra ba yu'urɛ se'a la n bahɛ te ba baŋera ba ane se'em. 22 Ho han dekɛ gerego la ki gaam taaba tɔ ba tooren, ho kan ta'an yelege a geretooma la bahɛ.
23 Baŋɛ ho piihe la boohe n ane se'em, ge behera ba soŋa. 24 Bala tarega ka boe wuuha wuuha, mina ya soŋa te ba ka vaare na'ahegɔ. 25 Saŋsɛka te ba kɛ' yaama bahɛ dunhe te mɔpɔɔlɔ puhe la, te saŋsɛka te ba kɛ' mɔseko n boe zoore zuo la bahɛ la, 26 Ya ta'an maale futo me la ya piihe konberɔ, ge da' teŋa la ya boohe ligiri. 27 Ya boohe iilom la wan dɛna yiredoma la dia, la ya pɔgɔsɔɔrɔ la mɛ.