Yam mɛ' la a yire
9
1 Yam mɛ' la a yire, dekɛ kuga mɛ' zɛnya ayopɔe. 2 Ko a dunhe, maahom a daam, maahom dia zan'an. 3 Ge nya tom a pɔsɔɔrɔ, a zom teŋa la kuŋkune zuo yi'ira yeti, 4 Yamam sɛba n de geto wa, ŋmɛregɛ ya ka'lam na. Yamam sɛba n ka tare yam wa, 5 Wa'an ya na di ge nyu' mam daam wa te en maahom wa. 6 Bahɛ ya bini, ge nyɛ vom, ge kena la bɔkerɛ,7 Se'em woo n pa'alɛ nɛre kɛhera, ne to'e la toorɛ, te hom se'em n tanhɛ potɔya ne to'e la pogoleŋɔ. 8 Ho han tanhɛ nɛre kɛha, a ne yaɛ ho mɛ, ge ho han tanhɛ yamdaana, a ne nɔŋɛ ho mɛ. 9 Pa'alɛ yamdaana la mɛ, te a malom nyɛ yam pa'ahɛ, pa'alɛ tontɔɔdoma te ba nyɛ zamehegɔ pa'ahegɔ. 10 Na'ayenɛ zɔɔlom n de yam pɔhega, ho se'em n mi' fa'a Daana wa n tare potɛn'ɛrɛ. 11 Ho han dɔla mam ayam, ho dabeha wan yuue, te ho vom yuuma wɔgɛ pa'ahɛ. 12 Ho han tara yam, ho tare bo la ho mɛŋa, ho han kɛhera yam, la lebere la ho mɛŋa zuo na.
13 Pɔgɔ gɔɔŋɔ nɔɔrɛ ku'e mɛ, ka ka tare yam, ka ka mi' sɛsɛla. 14 Ka ne yehe mɛ na zin'an ka yire zanɔɔren, teŋa la poan, ta zin'an zen'an te ba wan nyɛta en. 15 nya yi'ira sɛba n dole tɔla la, sɛba n kɔ'ɔn tɔ yɛ'ɛha ba ye'ehego zen'an la yeti, 16 Hom se'em n de gɔɔŋɔ ŋmɛregɛ ka'lam na. Ge yɛta sɛba n ka tare yam la yeti, 17 Ko'zuunrumo zan'anhom mɛ, te di zunruga te ba sogore dita tare la nyagehom. 18 Ba ka mi' te sɛba n ye' kɛn'ɛra ka zen'an la wan ki, te sɛba yire pon bɔna la yɔɔen.