Magaha 7

Tara mam nɔɔrɛ te ho vɔe

1 N bia, tɛnra n yelehom wa, ge tara mam bo ho nɔse'ere wa ho vom poan. 2 Tara mam nɔɔrɛ te ho vɔe la n pa'alegɔ wa wo hom tare ho ninbeeliho se'em la. 3 Dekɛ ba pire wo nu'toa la, ge golehɛ ba eŋɛ ho suunre poan. 4 Dekɛ yam te a dɛna ho tanya, ge dekɛ yɛla bɔkerɛ te a dɛna ho zɔ paɛ paɛ, 5 ge bama n wan gu' ho yiyɛa zen'an, ge gu' ho satema nɔmalehom la zen'an.

6 Mam boe la n yire ge veehe takole poan behɛ yeŋa na, 7 nyɛ bonbilipaalehe en lagahe ze', te ayema gerege, 8 dɔla sore zuo ŋmɛregera pɔgɔyalema yire sakpekɔ kɛn'ɛra bini, 9 bala ma'an te yentule ye' lua, te a dɔla ki'ina te la nyolena. 10 Te pɔka n bala to'ohɛ en, yɛ ka lɔgɔrɔ yiyɛɛnɛ, la a potɛn'ɛrɛ. 11 Ka dela pɔgɔ'ɛɛrega n nɔŋɛ voole, te ka fehega ka zin'ita yire, 12 tɔpi sore zuo, tɔpi nɛreba zen'an.

13 Te ka gin' boraa wa, kɔkɛ ka, ge la'ara mɔgɛ mɔgɛ te valom ka tara en, te a yɛta boraa wa, 14 yeti, Mam dugɛ la dia, te nɛnɔ la gan'an yoo te a wa'ana di ge de'em, 15 bala te mam yehe na te n mɔ'ɛ nini ɛ hɔ, n mɛ nyɛ ho. 16 Mam pon maahom gɔrɔgɔ mɛ, pin' ko la Mizraim teŋa fugɔbehe la n ane pɔnra pɔnra la. 17 Mam pon dekɛ la dɔɔzun'uhe nyɔ' n bɔ'ɔ poan te la tara nyuŋo soŋɔ. 18 Wa'ana te to kule ta ma'ɛn to kɔnrehe la taaba gura beere bolika. 19 N sera ka boe yire, a keŋɛ la sowoko. 20 A dekɛ la ligiri la tapɔɔ me'en keŋɛ, han dagana ŋmarega, a kan kule na.

21 Pɔka wa dekɛ la yetɔgɔbɔna wa pan'ahɛ boraa ta nyaŋɛ bɛlegera en la nɔmalehom wa. 22 Te boraa wa seren taɛ ka poore dɔla wo lɔlega te ba lo' yɛ'a kɔrɔgerɛ la, bii duŋa yɛhe bɛnregɔ poan, 23 te pɛɛnhɔ ta lo a suunre, wo niiŋa en yɛhe bɛnregɔ poan la. Bala a ka mi te a yɛhe la kum poan.

24 N kɔma wa, nya kelehe ya, be'e ya toba wom mam yeti ya se'em wa. 25 Da sakɛ ya te ya suunre ŋmɛregɛ lebe pɔgɔkana bɔba, da bu' lebe ka bɔba, 26 se'ere zuo, kan sigehe sɛba zo'e mɛ, kaŋa n ko sɛba ka tare kanlɛ. 27 Ka yire dela kum sore tara ho yɛ'a yɔɔen.