Zɛnkɛ ho nu'o fan' tɔ, mam Yenɛ wa
10
1 Na'ayenɛ, bene n sɔe te ho ze'ele zaaɛ la mam? Bene n sɔe te ho sogɛ ho mɛa daaŋɔ saŋan? 2 Nɛrebe'ero pa'ala a mɛŋa ge digera taromdoma. A nyɔkɛ ba bɛnregɔ seko poan te a ga'ɛ biŋe la te ko nyɔkɛ ba.3 Nɛrebe'ero ŋmɛ'ɛre la a nyɔn'ɔn la n tone a mɛŋa suunre n bote se'em la. A kan' soŋɔ bo se'em n nyingire ge to' Na'ayenɛ. 4 Pa'alɛ a mɛa poan, potɔpa wa mɛŋa ka eere Na'ayenɛ. A tɛn'ɛhegɔ poan, fole ka boe bo Na'ayenɛ. 5 Sɛla woo te a eta kɔ'ɔn ana la soŋa bɔ'ɔra en. A ba' zɛnkɛ la a mɛŋa, te hom nɔbiŋ'a la zaan la en. A toore a diŋdoma me.
6 Nɛrebe'ero ne yele a mɛŋa yeti, sɛla ka boe wan kalom mam, popeelom ma'an n yeti bo bɔna la mam, sunsagaŋɔ kan malom wa'an mam zen'an na. 7 Nɛrebe'ero nɔɔrɛ perɛ mɛ la pɔtɛ, la ponpɔrɔŋɔ, la vuunhego ma'an daaŋɔ. Be'em ma'an yɛla n boe a zɛleŋa poan.
8 A dole la teŋbibihe wa, ne sogɛ gan'an koora nɛresɛba n ka tare taalɛ le ba. A sogɛ behera gura nɛresɛba la. 9 A ne pin' a mɛŋa me wo gbegenɛ n pin' a mɛŋa se'em gan'an gura sɛla te a nyɔkɛ la. A ne dekɛ la a yoka nyɔkɛ la taromdoma la nya vuura ba. 10 N ne nyɔkɛ sɛba woo la, a paŋa ne gana ba me, te a mɛlehe ba me te ba lu' a nu'uhen poan. 11 A ne yele a mɛŋa yeti, Yenɛ ka behere yele ana, a pin' a nɛŋa mɛ, a ka nyɛte yele ana.
12 Na'ayenɛ ihege saazuo! Zɛnkɛ ho nu'o fan' tɔ, mam Yenɛ wa. Da tamɛ taromdoma la yele. 13 Bene n sɔe te nɛrebe'ero wa to' Yenɛ? Bene n sɔe te a le yele a mɛŋa yeti, Yenɛ kan ta'an soke mam etegɔ yele la.
14 Ge hom Yenɛ nyɛ namehegɔ la sunsagaŋɔ. Ho tɛn'ɛhe ko zuo mɛ, ge maahom te ho tom. Taroma la dekɛ a mɛŋa delom la hom. Hom n de se'em n soŋorɛ keebehe. 15 Kɔ nɛrebe'ero nu'o la. Soke en a be'em la te nɛra ka nyɛ la.