5
1 Nya yi' nananawa behɛ, se'em boe wan lerege ho? Hom yeti, soŋora kane zen'an te ho wan keŋɛ? 2 Yelemɛŋɛrɛ, sunsunya wan ko gerego, te nini tɛnrega ko yaloma. 3 Mam nyɛ geto en n ba' nyɛga, ge la kan yuue la Yenɛ n bahɛ te zɛrɛgerɛ sige ba zuo, voen ba bahɛ. 4 Sɛla ka te'ele ba kɔma. Ba kɔma ka nyɛte boorɔ tɔgom poan. Se'em ka boe wan fan' ba. 5 Nɛre yooro te kom tara ba n kɛ'ɛre ba dia. Ba ne kɛ' ka mɛ ta paɛ zen'an te a beŋɛ la. Sɛba n nyigere en vaare ba lɔgɔrɔ. 6 Namehegɔ ka ze'ete puuhugo poan na, bii daaŋɔ buule teŋa wa yehe na. 7 Ba ne dɔgɛ nɛresaala bahɛ la daaŋɔ poan wo bugum panrehe n ɛngere yɛha na se'em la.8 Han dɛna mam, mam wan ɛ la Yenɛ. Mam wan dekɛ n yele wa zan'an bo la enŋa. 9 A tom yelekanra mɛ, la yelese'a te ho kan bɔkɛ. Yele nyalema en zo'e. 10 Enŋa n bo'ore teŋa wa saa, enŋa n bo'ora samana zuo ko'om. 11 Enŋa n zɛnkere taromdoma saazuo, ge bahera te sɛba n kele bɔna fai. 12 Enŋa n bahɛ te la wona sɛba n nyanlene, te ba nu'uhen n tona sɛla ka eta soŋa. 13 A ne bahɛ mɛ te yamdoma la yam la tuluge nyɔkɛ ba mɛhe, ge ne gu' nyaleŋɔ doma tooma la kalam bahɛ.a 14 La han pon dɛna wontɛɛŋa, bama boe la lika poan ŋmɛ'ɛra na'ma wontɛɛŋa wo la dela yu'uŋɔ la. 15 Enŋa n gu'ure taromdoma potɔpa so'ahe nɔyan, ge faanra ba panhedoma nu'uhen baha. 16 Bala, taroma tare potɛn'ɛrɛ mɛ, ge se'em n ete sɛla n ka nare ka tare nɔɔrɛ ya'ara.
17 Se'em te Yenɛ tanhe la, a popeelom ka tare makerɛ. Bala Gaŋɛ Zan'an Yenɛ wa han dɔnlegɛ ho toberɛ, da zagahɛ. 18 Se'ere n sɔe la, a wan pɔgɔlom ho, ge a wan le tebɛ ho. A ŋmɛ' ho mɛ' ge a wan le pan'ahɛ ho. 19 A wan yehe ho daaŋɔ toyoobe poan. Ho wan lu daaŋɔ toyopɔe poan ge te sɛla kan kalom ho. 20 Kom saŋa, a wan gu' ho te ho kan ki. Zaba poan, a wan gu' ho te so'a kan ko ho. 21 A wam sogɛ ho te zɛleŋa kan to' ho. Sagaŋɔ han kana na, dabeem ka tere ho. 22 Sagaŋɔ, la kom saŋa, hom la'are mɛ. Ho ka zote mɔen dunhe la. 23 Hom la samanɛ zuo kuga wan dɛna zɔtɔ, te mɔen dunhe bɔna la ho la sunma'ahom. 24 Ho mɛŋa la wan mina te daaŋɔ ka boe ho sogorɛ la. Duŋa kan ki ho dunhe poan. 25 Ho buuri wan zo'e. Ho buuri wan wi'ɛ mɛ wo mɔɔ la. 26 Ho wan sige ho yɔɔ poan mɛ la zupeelego. Ho zuo wan ta pelege wo naara n bi'e pelege seke kɛ'a la. 27 Behɛ, te nyɛ de mɛ, de dele yelemɛŋɛrɛ, kelehe de, la ho baŋɛ bo ho mɛŋa.