2 Nadoma 19

1 Naba Hezekia n wom bala la, a aanhom la a futo, ge dekɛ sunsagaŋɔ fuo pin' a mɛŋa, kɛn' Na'ayenɛ Yire la poan. 2 A tom Eliakim n beha naba yire la Sebna n de gɔŋgoloha la malemadoma n de keendoma la, te ba yɛ sunsagaŋɔ futo yɛ'a Amoz dayɔa Isaiah n de nɔtɔgɔha la zen'an. 3 Ba yele en yeti, Hezekia yeti zina dela sunsagaŋɔ dabaherɛ, de dela tobedɔnlegerɛ dabaherɛ, ge dɛna nyanɛ dabaherɛ, la ane to mɛ wo pɔka n virige te bia tuhe zuo na, ge te pɔka la ka le tara paŋa wan unhe la. 4 Daanse'ere Na'ayenɛ ho Yenɛ la wom Arabsake la te a daana Asiria naba la tom en te a wa'ana kɛhɛ Yenɛ vɔa wa se'em la. Ge daanse'ere en wom bala, a wan namehɛ ba. Bala po'ohɛ bo tomam sɛba n gee fiin wa.

5 Naba Hezekia yamehe wa n wa'ana yele Isaiah bala la, 6 te Isaiah lebehe ba yeti, Yele ya daana la yeti, Na'ayenɛ yeti, da zɔta dabeem la Asiria naba yamehe la wa'ana to' mam se'em la. 7 Mam mɛŋa wan kɛn'ɛhe en dabeem, te a wom se'ere te dabeem kɛn' en te a tuluge lebe a teŋa. N wan bahɛ te ba ko' en a mɛŋa teŋa poan.

8 Te Arabsake la lebe ta paɛ wom te ba naba la bahɛ Lakis teŋa mɛ, ge tɛɛnra pɛɛma la Libna teŋa, te ba tole bilam. 9 Saŋkaŋa poan la, te Asisia naba la wom te Kus teŋa naba Tirhaka ye'ehe mɛ na te a zabɛ la en te a le tom nɛreba Hezekia zen'an yeti, 10 Ta yele ya Yuda naba Hezekia yeti, da sakɛ te hom dekɛ ho mɛŋa delom yenɛ se'ere la pan'ahɛ ho biŋera nɔɔrɛ la ho yeti Asiria naba kan nyaŋɛ to'e Yerusalem teŋa. 11 Behɛ, ho mɛŋa wom Asiria nadoma n eŋɛ teŋhe woo se'em sagom se bahɛ. Bala hom tɛn'ɛhere te hom wan peɛn? 12 Teŋhe wa yena wan nyaŋɛ fan' se mam sɔdoma nu'uhen bahɛ mɛ? Ba nyaŋɛ fan' Gozan la Haran la Arezep la Eden teŋa nɛreba n boe Tel Asar bahɛ mɛ? 13 Hamat teŋa naba bɛɛ? Arpad teŋa? Separvaim? Hena teŋa nadoma la bɛɛ? Bii Iva teŋa naba?

14 Hezekia to'e gɔŋɔ la naba la n tom sɛba na la nu'uhen kaanlɛ kɔ, ge keŋɛ kɛn' Na'ayenɛ Yire la poan, ta yerege gɔŋɔ la biŋe Na'ayenɛ nɛŋan. 15 Ge te Hezekia kaahɛ Na'ayenɛ nɛŋan yeti, Na'ayenɛ Israel Yenɛ zin'an kelompagehedoma teŋasoka wa. Hom ma'an n de Yenɛ sɔe teŋa wa woo zuo. Ho naam saazuo la teŋparɛ wa. 16 Na'ayenɛ, kelehe. Na'ayenɛ, sure behɛ na. Wom yelese'a te Senakerib tom na te a to' hom Yenɛ vɔa wa. 17 Na'ayenɛ, la de sera te Asiria nadoma wa seren saalom teŋhe mɛ la se sɔ'ɔlom, 18 ge gbɛ' ba baga lobe bahɛ bugum poan, ba dagɛ yena ge dela dɔɔrɔ la kuga te asaala maalɛ la zuo. 19 Bala nananawa, Na'ayenɛ to Yenɛ wa, mam sohore hom mɛ te ho fan' to a nu'uhen bahɛ, te teŋhe wa woo baŋɛ te hom Na'ayenɛ wa ma'an n de Yenɛ.

20 Amoz dayɔa Isaiah nya tom sɔɔleŋa bo Hezekia yeti, Na'ayenɛ Israel Yenɛ la yeti, n wom ho sohoga la te ho sohɛ doohe Asiria naba Senakerib etegɔ la. 21 Na'ayenɛ n tɔgɛ a yele se'em n wana. Zion pɔgɔsa'arɛ wa ka behɛ nyɛ hɔ, a kɛhere ho mɛ. Yerusalem pɔyɔa wa dole la ho poore la'ara hɔ. 22 Ane te hom ɛnregera ge toora wa? Ane te hom tanhera ge firigira nini la en wa? Israel fa'a daana la n bala! 23 Hom tom la ho nɛreba na te ba wa'ana to' Daana la ge yele bo ho mɛŋa yeti hom dekɛ la ho mɛŋa zaba yiri toroto zom zɔya wa zuto, Lebanon zɔya wa zuto ha. Mam mɛŋa paŋa n zabɛ kɛn' a mɔɔ la poan ha ta ŋmata a mɔlɔsomɔ tiihe la a peelesomɔ tiihe la bahɛ. 24 Ho yeti hom tun' la bulehe saama teŋhe poan nyuura, ge nɛ ko'om bɔgɔhe woo la ho na'ma te se ko'om keenhɛ. 25 Hom ka wom? Mam eŋɛ n potɛn'ɛra la wonse'eren ha? Mam pon maahom dɛ la yuuman yuuman ha. Nananawa n bahɛ te ho ta'an gbi teŋkanra te se lebege daboto. 26 Be teŋhe nɛreba lebege la taromdoma te ba sunya sagom te ba potɛn'ɛra bɔregɛ. Ba ana wo mɔpuuro bii mɔɔ n yehe yire zuo te la ne tulugɛ te ko ki se'em kalam la. 27 Ge mam mi' ho ihegere la zin'irego saŋa mɛ, ho yɛhega la ho lebega saŋa. Mam mi' ho suunre n nyiin la mam se'em. 28 Ho suunre n nyiin la mam se'em la zuo, la mam n wune ho toonwuruba la yele se'em la zuo, n wan dekɛ n baŋa tun ho nyɔrɛ poan ge dekɛ gariŋenɛ lɛ' ho nɔɔrɛn. N wan ve'e ho te ho lebe doohe hom n doohe zen'an na la lebe.

29 Hezekia, danlehom sebo te n wan bo ho n wana. Yuunɛ dena wa poan ho teŋa nɛreba kan borɛ. Ba wan kɛ' la diyɛɛhe n wan yehe na. Yuunɛ se'ere n tagale la dela bala mea. Yuunɛ se'ere n pa'ahere atan' la te ya nya wan borɛ kɛ'. Ya wan borɛ tiihe va'am, di a wɔla. 30 Yuda nɛresɛba n gee fiin wa la wan le ba' nyɛga vo'e na wom dia. 31 Se'ere n sɔe la, nɛreba wan kelom gee fiin bɔna Yerusalem poan. Nɛreba wan kelom gee fiin wa Zion Zoore la zuo yehe na. Pɛɛntɛɛnreba Na'ayenɛ mɛŋa suunre n tom dena wa. 32 Bala, Na'ayenɛ n yele Asiria naba wa yele se'em n wana. A kan kɛn' teŋa wa poan na, a kan tɛn' pɛɛnɛ ka poan. A kan zi zaba tɛ'ɛlega kɛn' ka poan na bii a wa'ana gbi'ira ka dangoone te a nyɛ fole kɛn'na. 33 N yeti a doohe sɔrɔɔ seko wa'ana la, sɔrɔɔ koŋɔ poan te a wan doohe lebe. A kan kɛn' teŋa wa poan na. Na'ayenɛ yele se'em n bala. 34 Mam Na'ayenɛ wan gu' teŋkana wa n mɛŋa yu'urɛ la zuo, la n yameŋa David zuo.

35 Yu'uŋɔ koŋɔ mea poan te Na'ayenɛ soŋora sige Asiria pɛɛntɛɛnreba tiiheŋɔ zen'an la poan, ko pɛɛntɛɛnreba tuha kɔbega la tuha pihinii la tuha anuu. Beere n ta yelegɛ la, ba zan'an kɔ'ɔn ki mɛ gan'an. 36 Te Asiria naba Senakerib yare zɔ lebe kule. Ta bɔna Nineveh teŋa. 37 A ta bɔna la a bagarɛ Nisrok deo poan kaanberɛ dɛ, te a dayɔɔhe Adramelek la Sarezer ko' en la so'a ge zɔ keŋɛ Ararat teŋa. Te a dayɔa Esarhadon sɔe a na'arɛ dɛna naba.