Hezekia di Yuda na'am
18
1 Elah dayɔa Hoshea n di Israel na'am la a yuuma atan' te naba Ahaz dayɔa Hezekia di Yuda na'am. 2 Hezekia wa dɛna la yuuma pihiyi' la anuu ge di na'am la. A behɛ teŋa la la yuuma pihiyi' la awae' Yerusalem poan. A ma dela Zekaria pɔyɔa te ka yu'urɛ yi'ira Abiya. 3 Hezekia tooma tegɛ Na'ayenɛ nini wo a yaaba David la. 4 A doohe sagom kuŋkuma zuto kaanbegɔ zen'enhe la wɔnrɛ baga la ge ŋma Aserah bagarɛ dɔɔrɔ la te ba kaanbera la bahɛ. A me wɔnrɛ nyɔgom bonsɛla la te Moses yuun yagom la. Se'ere n sɔe la, Israeldoma nyɔ'anre la ko'ɛnka bɔ'ɔra ka segɛ ka yu'urɛ Nehustan. 5 Hezekia dekɛ a mɛŋa delom la Na'ayenɛ Israel Yenɛ la. Te naba ka bɔna Yuda la poan wa'an pooren na bii tabalɛ wa'ana ana wo en. 6 A gin' Na'ayenɛ mɛ ka malom bahera ge dɔla nɔse'ere te Na'ayenɛ doohe Moses poan bo na la. 7 Te Na'ayenɛ bɔna la en a kenɛ zen'an woo te a sɛla woo eta soŋa. A ta zagahɛ Asiria naba te a kan bɔna a nu'uhen. 8 Hezekia zabɛ mɛ la Pilistidoma ze'ela ka teŋbila woo la teŋkantɛ woo nyaŋɛ ba ta paɛ Gaza la ka sɔ'ɔlom zan'an.9 Saŋsɛka ha te naba Hezekia na'am gɔŋɔ zuo yuuma anaahe, n de Elah dayɔa Hoshea n de Israel naba la na'am dia yuuma ayopɔe poan, te Asiria naba Salmaneser wa'ana gilige Samaria teŋa zabera la ka. 10 Asiria zabɛ to'e Samaria yuuma atan' pa'ahegɔ poan. Te la dela Hezekia yuuma ayoobe poan, n de Israel naba Hoshea yuuma awae'. 11 Asiria naba wa vaɛ Israeldoma wa pɛnregɛ loŋe Asiria, te ba ta kɛn'ɛra Hala la Gozan n boe Habor mɔgɔrɛ nɔɔrɛn la teŋhe la Media teŋhe la poan. 12 Se'ere n sɔe la, Israeldoma wa ka nam Na'ayenɛ ba Yenɛ la yelehom la, ge tue a nɔbiŋere la sɛla woo te Na'ayenɛ yameŋa Moses yele ba la. Ba ka kelehe, bii ba nam.
13 Naba Hezekia na'am dia yuuma pia la anaahe poan, te Asiria naba Senakerib wa'ana zabɛ la Yuda teŋkanra la woo te dangoone mɛ kae se la nyaŋɛ se. 14 Te Yuda naba Hezekia tom nɔɔrɛ bo Asiria naba Lakis teŋa na yeti, Mam tue ya. Bahɛ hom maahom te ho eŋɛ mam sɛla woo la, ge n wan yɔ. Te Hezekia yɔ en sanlenpeelega bɔɔrehe kɔbehe setan' la sanlema bɔɔrehe pihitan'. 15 Hezekia vaɛ la sanlenpeelega la woo n boe Na'ayenɛ Yire la ligise'a woo n boe naba yire la poan la bo en. 16 Saŋkaŋa poan la, Yuda naba Hezekia doohe lagɛ la sanlema se'a n dekɛ golɛ Na'ayenɛ Yire la kolehe la zɛnya la te a daa takɛ a la sanlema la bo Asiria naba la.
17 Asiria naba wa tom Tartan la Arabsaris la Arabsake la pɛɛntɛɛnreba kekeko yehe Lakis teŋa, doohe ba keŋɛ Hezekia zen'an Yerusalem poan. Ban paɛ la, kpɛ'ɛndoma la ze' la Saazuo Bɔka la kuŋkune sɔrɔɔ la zuo Tama Peea Bɔn'en la. 18 Ba yi' naba Hezekia, te Hilkia dayɔa Eliakim n behera naba yire la Sebna n de gɔŋgoloha la Asap dayɔa Yoa n de yele goleha paɛ ba.
19 Arabsake yele ba yeti, Yele ya Hezekia te Nakantɛ la, Asiria naba la yeti, Ho dele la bene ba' nam ho mɛŋa wana wa? 20 Ho tɔgɛ ya te hom maahom mɛ te ho zabɛ ge ho tɔgom la dela yoo. Ho dele la ane ge zagahɛ mam la? 21 Ho ka dele la Mizraim teŋa n ane wo mɔɔ n ku'e zɛ'a, te se'em woo nu'o n gorɛ en a sanregɛ en la? Mizraim naba Faro n ane se'em bala bo se'em woo n delom en. 22 Ge ho han le yele mam te ho dele la Na'ayenɛ te Yenɛ la, dagɛ Yenɛ denɛ kaanbegɔ zen'enhe la de bimbina te Hezekia wɔnrɛ bahɛ ge yele Yuda la Yerusalemdoma yeti kaanbera kaanbegɔ daka kana wo zuo Yerusalem teŋa wa poan la? 23 Wa'ana, makɛ mam daana Asiria naba wa behɛ. N wan bo ho zaba yiri tuha ayi' behɛ nya ho wan nyɛ yiri ban'areba te ba ban'! 24 Hom ze' gura Mizraim teŋa te ba bo ho yiri toroto la yiri ban'areba wa, ge hom wan eŋɛ la wane nyaŋɛ zabɛ la mam daana wa pɛɛntɛɛnra ayena ma'an? 25 N le soke ho behɛ, Na'ayenɛ la ka bo nɔɔrɛ te mam wa'ana zabɛ la ho teŋa wa sagom ka la? Na'ayenɛ mɛŋa la n yele mam yeti, keŋɛ ta zabɛ la teŋa wa sagom ka.
26 Hilkia dayɔa Eliakim la Sebna la Yoa nya yele Arabsake la yeti, To belone ho mɛ, tɔgɛ Aramaik yetɔgom bo ho yamehe wa ge tomam wone. Da tɔgɔra Hebru yetɔgom te nɛreba wa n yage dangoone wa zuo wa wona. 27 Ge Arabsake wa lebehe soke ba yeti, Mam daana la tom mam na te to wa'ana tɔgɛ yele ana wa bo la ya daana la yamam ma'an, ge nɛresɛba n yaga dangoone wa zuo te la yɛ'a ba zuo na te ba dita ba bino ge nyuura ba dundu'urom la la yamam la ka pa'ahɛ?
28 Te Arabsake la nya nyabera paŋa Hebru yetɔgom poan yeti, Kelehe ya nakantɛ la Asiria naba la n yele se'em! 29 Naba la yeti, da bahɛ ya te Hezekia pan'ahɛ ya. Se'ere n sɔe la a kan ta'an fan' ya mam nu'uhen bahɛ. 30 Da sakɛ te Hezekia pan'ahɛ ya te ya dele Na'ayenɛ yele ya yeti, Na'ayenɛ wan fan' to, a kan dekɛ teŋa wa eŋɛ Asiria naba nu'uhen. 31 Da kelehe ya Hezekia! Se'ere n sɔe la Asiria naba yeti ya eŋɛ ya sunma'ahom nɔɔrɛ la enŋa, yehe wa'an eŋɛ zen'an na. Bala te ya woo wan sɔna ya mɛhe va'am tiihe dita, ge sɔna ya mɛhe kenkanhe, ge sɔna ya mɛhe loohe ko'om nyuura, 32 gura te n ta wa'ana vaɛ ya keŋɛ teŋsɛka n ane wo ya mɛŋa teŋa wa la, teŋsɛka te dia la daam bɔna, teŋsɛka n tare boom la tiihe wɔla vatɔ, teŋsɛka n tare kaam tiihe la seerom te ya ta bɔna nyana yan ki! Da kelehe ya Hezekia te a pan'aha ya yeti, Na'ayenɛ wa fan' tɔ. 33 Teŋhe wa yenɛ denɛ n boe tabelɛ fan' de nɛreba Asiria teŋa naba wa nu'uhen? 34 Hamat la Arpad teŋhe yena la bɛɛ? Separdoma la Hena la Iva teŋhe yena la bɛɛ? Yena la nyaŋɛ fan' Samaria teŋa mam nu'uhen mɛ? 35 Teŋkane n boe teŋhe wa woo poan te ka yena tabelɛ fan' ka mam nu'uhen? Te Na'ayenɛ wan fan' Yerusalem mam nu'uhen? 36 Te nɛreba la sina baanlam ka lebehe se'ere se'ere. Se'ere n sɔe la, ba naba la bo ba la nɔɔrɛ te se'em da lebehe se'ere.
37 Te Hilkia dayɔa Eliakim n behera naba yire la Sebna n de gɔŋgoloha la Asap dayɔa Yoa n de yele goleha aanhom ba futo lebe Hezekia zen'an na yele en Arabsake la n tɔgɛ se'em la woo.