Ɛ pɔgɔsɛka n behere bo mam
28
1 Saŋsɛka Pilistidoma wa ta lagahɛ te ba zabɛ la Israeldoma. Akis yele David yeti, Ho mi' te hom la ho nɛreba la wan doohe mam pɛɛntɛɛnreba la keŋɛ zaberɛ la. 2 David yele en yeti, La ane soŋa. La wan bahɛ te ho baŋɛ ho yameŋa wa n wan ta'an eŋɛ sɛla, la en kan ta'an eŋɛ sɛla. Naba Akis yeti, La ane soŋa. Yehe zina yɛ'ɛha, hom n wan wan gura mam.3 Bala ma'an te Samuel pon ki mɛ, te Israel zan'an daa lagahɛ kele en ge pin' en a mɛŋa teŋa Aramah poan. Te Saul doohe sa'ahɛ behereba la bakolo bogoreba zan'an teŋa la poan bahɛ.a 4 Pilistidoma wa lagahɛ ba mɛŋa wa'ana tiihom Sunem teŋa, te Saul me lagahɛ Israel zan'an, te ba ta tiihom Gilboa teŋa. 5 Saul n ta nyɛ Pilistia teŋa pɛɛntɛɛnreba la, dabeem n kɛn' en te a sunsunya fɔlɔgera. 6 Te a soke Na'ayenɛ te a baŋɛ ge Na'ayenɛ ka lebehe en doohe zaanheŋɔ bii Urimb bii nɔtɔgɔha se'em poan. 7 Saul nya yele a yamehe la yeti, Ɛ pɔgɔsɛka n behere bo mam te n keŋɛ ka zen'an ta soke baŋɛ. Te ba yele en yeti, Pɔka kayema boe Endor teŋa behera.
8 Te Saul yɛɛhɛ a lɔgɔrɔ biŋe ge tee lɔgɔyooro yɛ', te enŋa la boraahe seyi' keŋɛ. Ba wa'ana paɛ pɔka la zen'an la yu'uŋɔ, te Saul yele pɔka la yeti, Yi' se'emdaana te n yeti n yi' wa sea bɔ'a na. 9 Ge pɔka la yele en yeti, Ho mi' Saul n eŋɛ se'em. A doohe sa'ahɛ behereba la bakolo bogoreba la zan'an teŋa wa poan bahɛ mɛ. Ge te wane te ho bɛnta mam te ho ko wa? 10 Te Saul pɔ' Na'ayenɛ yu'urɛ yeti, N pɔ' Na'ayenɛ yu'urɛ wa, te ho han nyaŋɛ eŋɛ yele wa bo mam, se'em ka boe wan namehɛ hɔ. 11 Te pɔka la soke en yeti, Ane te ho bɔta te n yi' na? Te a yeti, Samuel. 12 Pɔka la n ta nyɛta Samuel la, a bo la tagurega ge soke Saul yeti, Bene te ho pan'aha mam? Ho dela Saul. 13 Te naba Saul yele en yeti, Da bahɛ te dabeem tara hɔ. Bene te ho nyɛ? Te pɔka la yele en yeti, Mam nyɛ la nɛra sea n ze'ele teŋa wa poan yɛhera na. 14 A soke pɔka la yeti, A ane la wane? Te pɔka la yeti, A dela boraa yan'aŋa, yɛ fuwoko. Bala te Saul baŋɛ te a dela Samuel nya suunre a mɛŋa teŋa na'ahɛ en.
15 Samuel soke Saul yeti, Bene te ho yi'ira n sea, tara daaŋɔ bɔ'ɔra mam bala? Te Saul yele en yeti, Mam boe la sunsagaŋɔ poan. Pilistidoma n zaberɛ la mam, te mam soke Na'ayenɛ, te Na'ayenɛ ka kelehe mam doohe nɔtɔgɔha bii zaanheŋɔ poan lebehe mam sokere en sɛla la. Bala te mam yi' ho na te ho pa'alɛ mam wan eŋɛ se'em. 16 Te Samuel yeti, Na'ayenɛ han zagahɛ hɔ ge dɛna ho diŋdaana, hom yi'ire mam te mam eŋɛ la wane? 17 Na'ayenɛ eŋɛ ho la mam n daa vɔe a te doohe mam poan yele ho te la wan eŋɛ hɔ se'em la. A to'e teŋa la ho zen'an mɛ n bala dekɛ ka bo ho sɔɔn David. 18 Se'ere n sɔe la, ho ka nam Na'ayenɛ nɔɔrɛ la. Ho ka tom en bote ho dekɛ sunsunyiim tom Amalekdoma la se'em la. Bala n sɔe te Na'ayenɛ eŋɛ ho wana zina wa. 19 Na'ayenɛ wan dekɛ hom la Israel nɛreba la zan'an eŋɛ Pilistidoma la nu'uhen. Beere hom la ho dayɔɔhe la wan wa'ana paɛ mam kalam. Na'ayenɛ wan me dekɛ Israel pɛɛntɛɛnreba la zan'an eŋɛ Pilistidoma wa nu'uhen.
20 Bilam bilam te Saul lu aliko la dabeem doohe la Samuel n tɔgɛ se'em la. Te a iŋa zan'an ki. Se'ere n sɔe la, a ka di sɛla bolika ha tara tara la yu'uŋɔ la. 21 Te pɔka la n keŋɛ paɛ Saul zen'en behɛ te Saul pabegɛ mɛ, ta yele en yeti, Behɛ, mam ho yameŋa wa kelehe hom yele mam se'em la pɔnhɛ n vom ge tom hom soke mam sɛla la. 22 Bala, hom me kelehe mam me n yeti n yele ho se'em la. Bahɛ te n bo ho dia fiin wa te ho di nyɛ paŋa lebe. 23 Saul zagahɛ te enŋa kan di. Te a yamehe la la pɔka la lagom belom en tara tara te a ta sakɛ nya vaɛ ihege teŋa la zin'ire koka zuo. 24 Te pɔka la nagapole boe, te ka kanbelɛ kalam ta kɔrɔgɛ nahɔ la tɔnbegɛ zom nɔm bɔ, maalɛ boroboro se'ere te mi'ihom ka bɔna de poan, 25 tare dia la na ze'ele Saul la a yamehe la te ba zan'an lagom di ge ihege yu'uŋɔ la lebe.