David la a boraahe kɛn'ɛra Gat Naba Akis zen'an
27
1 Ge David yele a mɛŋa yeti, Dabaherɛ kene na te Saul wan gorɛ mam ko. Bala, sɛla ka boe te n wan eŋɛ gana n zɔ loŋe Pilistidoma teŋa wa poan. Bala te Saul wan bahɛ n dole Israel sɔ'ɔlom wa ɛɛra mam saŋa woo wa, te n peɛn a nu'uhen.2 Te David la a boraa kɔbehe seyoobe la n boe la en la ihege Pilistidoma teŋa la poan, keŋɛ Gat teŋa boraa Maok dayɔa naba Akis zen'an. 3 David la a boraahe kɛn'ɛra Gat Naba Akis zen'an la. Ba dela David la a boraa kɔbehe seyoobe la ba yiredoma la David pɔgɔba bayi' la, Ahinoam n de Yezreel teŋa la Abigail n yehe Karmel teŋa na te a sera dɛna Nabal ki ge bahɛ en la. 4 Saul n ta wom te David zɔ loŋe la Gat teŋa la, te a nya bahɛ David poore dɔlɔga. 5 David nya yele Akis yeti, Mam vom han seren tegɛ ho nini, bahɛ te ba bo mam zen'an ho teŋhe wa poan, te n keŋɛ ta bɔna bini. La ka nare te mam ho yameŋa wa lagom kɛn'ɛra la hɔ naba teŋa wa poan. 6 De daarɛ te Akis dekɛ Ziklag teŋa bo David. Bala te Ziklag teŋa wa dɛna Yudadoma nadoma teŋa na paɛ zina wa la. 7 David kɛn' Pilistidoma teŋa wa la yuunɛ la ŋmarehe senaahe.
8 Te David la a boraahe la kena gbirigera Gesur la Girzi la Amalek teŋhe doma. Buuri ana wa yuun bɔna Sur teŋa la Mizraim teŋa. 9 David n kena gbirigera teŋa la, a ko' ka poan nɛreba ka gee boraa bii pɔka voto ge pe'e ba piihe la nii la bonhe la yogoma, va ba futo pa'ahɛ tare lebe Akis zen'an na. 10 Akis ne soke en yeti, Hom keŋɛ ta zabɛ mɛ la ane zina? Te a ne yeti, Yuda teŋadoma sɛba n boe mɔɔ poan ha la, bii a yeti, Yerameel teŋadoma sɛba n boe mɔɔ poan ha la, bii a yeti, Ken teŋadoma sɛba n boe mɔɔ poan ha la. 11 Se'ere n sɔe te David ne ka tare nɛnɛra lebe Gat teŋa la dela, a ne tɛn'ɛhɛ yeti, N han tare nɛra wa'ana, a wan yele naba yeti, David eŋɛ la wana la wana. Saŋsɛka woo te a bɔna Pilistidoma teŋa la poan la, a toonɛ n bala. 12 Akis nam David mɛ tɛn'ɛhɛ bo a mɛŋa yeti, Israel nɛreba yaɛ David wa mɛ. A nya wan dɛna la mam yameŋa.