Mam suunre sagom la mam n eŋɛ Saul te a dɛna naba wa
15
1 Te Samuel yele Saul yeti, Na'ayenɛ n tom mam na te n wa'ana sɔ' hɔ te ho dɛna a nɛreba Israeldoma wa naba. Bala kɛleha Na'ayenɛ yelehom wa. 2 Pɛɛntɛɛnreba Na'ayenɛ la yeti, N wan namehɛ Amalekdoma wa, la bama n yuun eŋɛ Israeldoma se'em ban yuun ze'ele Mizraim teŋa yehe keŋɛ na paɛ ba teŋa la na la, te ba yuun zabɛ ba mɛ. 3 Nananawa, ihege keŋɛ ta zabɛ la Amalekdoma wa. Sagom ba sɛla woo bahɛ. Da bahɛ ba sɛsɛla. Ko ba pɔgɔhe la boraahe la bonbibihe la bilɛɛhe la nii la piihe la yogoma la bonhe zan'an.4 Te Saul lagahɛ pɛɛntɛɛnreba la keŋɛ ta tiihom Telaim teŋa te a kaanlɛ pɛɛntɛɛnreba la, te pɛɛntɛɛnreba sɛba n kene teŋa dɛna tuha kɔbehe seyi' te Yuda teŋa me tara tuha pia. 5 Saul la a nɛreba wa wa'an Amalek teŋa la poan na gan'an ba bɔn'ɔn poan pigira ba. 6 Saul nya yele Kendoma la yeti, Yehe ya Amalekdoma teŋa wa poan keŋɛ. Han dagana bala, n wan lagom sagom ya zan'an. Israeldoma yuun yehe Mizraim teŋa poan keŋɛ na paɛ ya te ya yuun eŋɛ ba soŋa la. Te Kendoma wa seren yehe Amalekdoma teŋa wa poan. 7 Saul nya zabɛ nyaŋɛ Amalekdoma wa, pɔhɛ Havila teŋa tara tara la Sur teŋa lebehe Mizraim teŋa dapɔya bɔba la ha. 8 Saul nyɔkɛ Amalek naba Agag voto, ge ko a nɛreba la zan'an. 9 Ge Saul la a pɛɛntɛɛnreba la bahɛ naba Agag mɛ la ka sagom a teŋa piihe la nii la nagabibihe kanra la pebibihe kanra la lɔgɔseto n ane soŋa woo. Ge sɛla woo n ka tare toonɛ te ba ka bɔta la, bama te ba sagom zan'an.
10 Te Na'ayenɛ tɔgɛ bo Samuel yeti, 11 Mam suunre sagom la mam n eŋɛ Saul te a dɛna naba wa. Se'ere n sɔe a bire la a poore bahɛ mam, ka tom mam n bo en nɔɔrɛ te a tom se'em la. Samuel sunsunya nyie, te a kaahɛ bo Na'ayenɛ yu'uŋkoŋɔ poan zan'an. 12 Yiimbeere bolika Samuel ihege kalam te a ta nyɛ Saul. Ge ba yele en yeti, Saul keŋɛ la Karmel teŋa. Bilam te a mɛ la kaanbegɔ zen'an bilam bo a mɛŋa, te a yɛ'a lɛbera, doohe sige Gilgal teŋa. 13 Samuel n wa'ana paɛ Saul, te Saul yele en yeti, Na'ayenɛ som bɔna la hɔ. Mam tom Na'ayenɛ n bo mam nɔse'ere woo la. 14 Ge Samuel lebehe soke en yeti, Ge piihe la nii kaahega wa te n toba wona wa? 15 Saul yeti, Pɛɛntɛɛnreba tare ba la Amalekdoma la zen'an na. Ba ganhɛ la pesoma la niisoma la ma'an te ba tare na kaanbɛ bo Na'ayenɛ ho Yenɛ la. Ge to sagom sɛla woo n gee la la zan'an zan'an bahɛ.
16 Samuel yeti, Go'e! Bahɛ te n yele ho zam yu'uŋɔ te Na'ayenɛ zam yele mam se'ere. Te Saul yeti, Tɔgɔra na. 17 Samuel yeti, La hom n pon behɛ ho mɛŋa te ho pɔ'ɛ mɛ wa, dagɛ hom n de Israel buuri wa zuodaana? Na'ayenɛ sɔ' hɔ la kaam te ho dɛna Israel naba. 18 Te Na'ayenɛ dena wa tom hɔ te ho ta eŋɛ sɛla, ge pa'alɛ hɔ yeti, keŋɛ ta sagom Amalekdoma wa n de be'emdoma la. Kɔ'ɔn zabɛ la ba tara tara ta ba'ahɛ ba zan'an. 19 Bene zuo te ho ka doohe Na'ayenɛ la nɔɔrɛ la? Bene zuo te hom fan' ba lɔgɔrɔ la tara, nya tom be'em bona Na'ayenɛ nɛŋan wa?
20 Ge Saul yele Samuel yeti, Mam doohe Na'ayenɛ nɔɔrɛ la woo mɛ. Mam keŋɛ ta tom enŋa n yeti n keŋɛ ta tom sɛla la, sagom Amalekdoma sɛba woo n gee la zan'an ge nyɔkɛ Amalek naba Agag voto wa'ana. 21 Han dɛna ba lɔgɔrɔ la me, pɛɛntɛɛnreba la ganhɛ la pesoma la niisoma la lɔgɔsonɔ seto woo n de ne to nyɔ' la tare wa'an Gilgal na te ba kaanbɛ bo Na'ayenɛ ho Yenɛ la. 22 Ge Samuel yeti, Na'ayenɛ ton bɔta la nyɔ'an bo'olom kaanbegɔ gana ba nana a yelehom yoi? Yelemɛŋɛrɛ, hom n nane nyane kaanbegɔ, te kelehego nyana piihe kanra. 23 Pobirega dela sɔɔntooma, te ganrega dɛna ganleŋɔ la baga kaanbegɔ. Hom n zagahɛ Na'ayenɛ yelehom la zuo, Na'ayenɛ me zagahɛ ho mɛ.
24 Te Saul yele Samuel yeti, Mam tom la be'em, la mam n ganlom Na'ayenɛ n bo mam a nɔɔrɛ se'em la, la hom mɛŋa n yele mam se'em la. Mam zote ne la nɛreba la n sɔe te mam kelehe bama n bote se'em la. 25 Bala n sohore mɛ te ho zɔ n be'em wa ninbɔn'ɔn ge doohe la mam lebe te n ta kaanbɛ Na'ayenɛ. 26 Ge Samuel yele Saul yeti, Mam kan doohe la hɔ lebe. Ho zagahɛ Na'ayenɛ nɔɔrɛ la mɛ, te Na'ayenɛ me zagahɛ hɔ. Ho le dagana Israel teŋa naba. 27 Samuel n ŋmɛregɛ te a keŋɛ, te Saul gin' Samuel fuo teŋa bɔba na, te fuo la aanhegɛ. 28 Samuel yele en yeti, Na'ayenɛ aan Israel teŋa wa mɛ ho zen'an zina dekɛ ka bo ho sɔɔn seko n nyane hom wa. 29 Na'ayenɛ n de Israel kpe'eŋo la kan tee a potɛn'ɛren. Se'ere n sɔe la, Yenɛ dagɛ nɛresaala tɛɛra potɛn'ɛrɛ. 30 Saul le yele Samuel yeti, Mam tom la be'em, ge yeen na'ahɛ mam n nɛreba wa kema wa la Israel nɛreba wa zan'an nɛŋan doohe la mam lebe te n ta kaanbɛ Na'ayenɛ ho Yenɛ la. 31 Te Samuel ŋmɛregɛ doohe Saul lebe te a ta kaanbɛ Na'ayenɛ.
32 Te Samuel yele Saul yeti, tare Amalek naba Agag la na. Te Agag paara a nɛŋan ge gbe'era yeti la de sera te kum dela nɔyalegere. 33 Ge Samuel lebehe en yeti, Wo ho so'a la n ne bahɛ te pɔgɔhe koŋɛ ba kɔma se'em la, bala mea te ho ma me wan koŋɛ a bia pɔgɔhe poan. Te Samuel ze'ele Na'ayenɛ nɛŋan Gilgal teŋan kɛ' Agag zɔnra zɔnra.