De daarɛ la, Israel pɛɛntɛɛnreba vibera
14
1 Daarɛ deyema te Saul dayɔa Yonatan yele boraa sɛka n ziire a zaba lɔgɔrɔ la yeti, Wa'ana te to yakɛ paɛ Pilistia pɛɛntɛɛnreba basɛba wa n boe yakenɛ deyema ha wa zen'an. Ge a ka yele a sɔ.2 Bala ma'an te Saul la a nɛreba tiihom la Gibea teŋa la yeŋa, *pomegranate tia n boe Migron teŋa poan la tilin. Te pɛɛntɛɛnreba sɛba n boe la en la kanlɛ dɛna wo boraa kɔbehe seyoobe. 3 Te Ahiya, se'em sɔ n de Ahitub n de Ikabod sɔɔn la sɔ n de Pinehas, se'em sɔ n de Eli n tabele dɛna Na'ayenɛ malemadaana Silo teŋa poan la. Te Ahiya wa lagom pa'ahɛ sɛba n dole Saul wa poan ziira toolom fugiriga la. Te nɛreba la ka baŋɛ te Yonatan keŋɛ zen'an. 4 Sɛge se'ehe poan te Yonatan wan doohe yakɛ paɛ Pilistia pɛɛntɛɛnreba wa zen'an la, taŋa n ane wo zoore la n ze' ke', te kayema me ana bala me zɛ'a ke. Kayema yu'urɛ dɛna Bozez, te kayema me yu'urɛ dɛna Sene. 5 Te taŋa zɔya kayema zɛ'a zuɔ nu'o bɔba Mikmas teŋa nɛŋan na, te deyema me zɛ'a gɔbega nu'o bɔba Geba teŋa nɛŋan na.
6 Te Yonatan yele boraa sɛka n ziire a zaba lɔgɔrɔ wa yeti, Wa'ana te to yakɛ paɛ Pilistidoma pɛɛntɛɛnreba wa. Daanse'ere Na'ayenɛ wan tom bo to. Na'ayenɛ han bɔta te a doohe nɛreba fiin wa bii nɛreba kekeko poan fan' bahɛ, sɛla ka boe wan gu'. 7 Te se'em n ziire a zaba lɔgɔrɔ la yele en yeti, Eŋɛ ho suunre n bote se'ere woo. Mam boe mɛ la hɔ. Ho suunre la n bote sɛla la, mam me bote la bala. 8 Te Yonatan yeti, Behɛ, to wan yakɛ paɛ ba te ba nyɛ tɔ. 9 Ba han ta nyɛ to yeti, ze' ya bilam te to keŋɛ paɛ ya na, to wan zɛ'a, to kan yakɛ paɛ ba. 10 Ge ba han yele to yeti, paɛ ya na, bala to wan zom paɛ ba. Sɛla n wan dɛna danlehom bo to te Na'ayenɛ n dekɛ ba eŋɛ to nu'uhen n bala.
11 Ba bayi' la n ta lilige ba mɛhe te Pilistia pɛɛntɛɛnreba la nyɛ ba la, te ba yeti, Behɛ ya, Hebrudoma la n wana zɛ'ɛta ban sogɛ yogo seto poan la nya yɛhera na la. 12 Te Pilistia pɛɛntɛɛnreba wa nya wɔɔla Yonatan la se'em n ziire a zaba lɔgɔrɔ la gee yɛta ba yeti, Paɛ ya to na, to wan pa'alɛ ya sɛla. Te Yonatan yele se'em n ziire a zaba lɔgɔrɔ la yeti, Dɔla mam na. Na'ayenɛ n dekɛ ba eŋɛ Israel nu'uhen. 13 Te Yonatan ban'ara taŋa la, la a nu'uhe la a na'ma, te se'em n ziire a zaba lɔgɔrɔ la dɔla en. Te Yonatan lɔbera Pilistidoma wa, te se'em n ziire zaba lɔgɔrɔ la dɔla poore koora ba. 14 Ban to'ohɛ sɛba yia la, Yonatan la se'em n ziire a zaba lɔgɔrɔ la ko la nɛreba wo pihiyi'. Zen'an te ze'ele zabɛ la yaleŋa zone mɛ la sɔlega. 15 Te dabeem kɛn' nɛresɛba woo n boe tiiheŋɔ la poan la samanain la, la pɛɛntɛɛnreba la zan'an, la sɛba n gure teŋa la sɛba n zabere la. Te ba zan'an gbe'era, ge te teŋa la miim. La dela Yenɛ n eŋɛ dena wa.
16 Te sɛba n boe Gibea Benyamin poan limihe bɔ'ɔra Saul la beha te nɛre bɔbɔgɔ la gbirigera lɛbera pooren la nɛŋa. 17 Te Saul yele pɛɛntɛɛnreba sɛba n boe la en la yeti, Yi' ya pɛɛntɛɛnreba wa zan'an lagahɛ na behɛ se'em n yehe to poan. Ban yi' yu'ura la, ba behɛ te Yonatan la se'em n ziire a zaba lɔgɔrɔ la ka boe ba poan. 18 Te Saul yele Ahiya yeti, Tare Yenɛ nɔbiŋere daka la na. Saŋkaŋa la te Yenɛ nɔbiŋere daka la boe la Israeldoma la nu'uhen. 19 Saŋsɛka te Saul bɔna bini tɔgɔra bɔ'ɔra malemadaana la, te gbirigere se'ere n boe Pilistidoma tiiheŋɔ la poan ha la malom pa'aha mɛ. Te Saul yele en yeti, Nan ana bala.
20 Te Saul la a nɛreba la maahom ba mɛŋa ta kɛn' zaberɛ la poan. Ba nyɛ te Pilistidoma wa tuluge mɛ lota taaba la ba so'ahe, tuuna zen'an woo. 21 Bilam te Hebrudoma sɛba n dekɛ ba mɛhe naɛ la Pilistidoma la lagom bɔna ba tiiheŋɔ la poan la foe ba mɛhe lebe na pa'ahɛ Israel pɛɛntɛɛnreba sɛba n dole Saul la Yonatan la poan. 22 Bala mea te Israel pɛɛntɛɛnreba sɛba n zɔ sogɛ Epraim zoore teŋa la zuo yogoro poan la n ta wom te Pilistidoma la zote mɛ la, te bama me ze'ele ba soka zen'enhe la poan yehe na yebera pɛɛnbɔn'ɔn la poan. 23 Na'ayenɛ n bo Israeldoma nyaŋerɛ se'em n bala. Te zaberɛ la zabɛ ta gaŋɛ Bet Aven teŋa.
24 De daarɛ la, Israeldoma la daa boe la muguhugo poan. Se'ere n sɔe la, Saul daa bahɛ te pɛɛntɛɛnreba la sakɛ mɛ biŋe nɔɔrɛ yeti, Sagaŋɔ bɔna se'emdaana n di dia ge te yenɛ ka lu zuo ge mam wan lerege n diŋdoma la. Te pɛɛntɛɛnreba la ka makɛ di dia de daarɛ.
25 Te nɛreba la zan'an keŋɛ ta kɛn' tiihe la poan ha te seerom gan'an teŋa. 26 Ba wa n wa'ana nyɛ seerom la, bo zɔngere mɛ. Ge ban zote nɔpɔtɛ la zuo, se'em ka dekɛ a nu'o kalom bɔ eŋɛ a nɔɔrɛn. 27 Ge Yonatan ka mi' te a sɔ la pɔ' la nɔɔrɛ biŋe pɛɛntɛɛnreba la, ge tɛɛn a doore te a zanla tuhe seerom la poan ha, foe na duuhe leele. Te a nɛŋa yelegɛ. 28 Te pɛɛntɛɛnreba la ayema yele en yeti, Ho sɔ pɔ' la nɔɔrɛ bo pɛɛntɛɛnreba la yeti, yele boe hom se'emdaana n di dia zina zuo! Bala n bahɛ te pɛɛntɛɛnreba wa vibera wa. 29 Te Yonatan yeti, N sɔ daam teŋa wa mɛ n bala. Behɛ mam n di seerom wa fiin wa, te n nɛŋa yelegɛ se'em. 30 A han bahɛ ne te pɛɛntɛɛnreba wa di ne ban fan' lɔgɔseto ba diŋdoma wa zen'an wa tegɛ ne, ba wan kɔrom ne Pilistidoma wa gaŋɛ wana.
31 Daanse'ere te ba ze'ele Mikmas ko' Pilistidoma wa ta paɛ Aiyalon teŋa poan la, kom n woŋɛ pɛɛntɛɛnreba la. 32 Te ba dige nyɔkɛ piihe la nii la nagabibihe se'ehe te ba fan' la, le'ehɛ kɔrom ba obe la ziim la bala.
33 Te la ta lu Saul toban te pɛɛntɛɛnreba la tone la be'em Na'ayenɛ nɛŋan la ban obere nɛnɔ te ziim bɔna to poan la. Te Saul yeti, Ya ka eŋɛ soŋa. Bilom ya kugukantɛ na biŋe ka'alam, 34 ge doohe ya yele pɛɛntɛɛnreba la zan'an te nɛra woo tare a lɔlega bii a pehego wa'an ka'lam na kɔrɔgɛ obe, ge da obere ya to la ziim ganlona Na'ayenɛ nɛŋan. Te pɛɛntɛɛnreba la woo tare ba lɔlehe yu'uŋkoŋɔ poan wa'ana kɔrom se bilam obe. 35 Te Saul mɛ kaanbegɔ zen'an bo Na'ayenɛ. Saul yia kaanbegɔ zen'an n bala te a mɛ bo Na'ayenɛ.
36 Te Saul nya yeti, Bahɛ ya te to ihege yu'uŋɔ wa doohe Pilistidoma wa poore, la to sagom ba ta paɛ bolika. Da bahɛ ya te to pon gee ba ayena me bahɛ. Te ba lebehe yele en yeti, Eŋɛ hom n behɛ te sɛla ane soŋa. Be malemadaana la yeti, Ton bahɛ ya te to soke Na'ayenɛ saŋkana wa. 37 Te Saul soke Na'ayenɛ yeti, N sige ta zabɛ la Pilistidoma wa? Ho wan dekɛ ba eŋɛ Israel nu'uhen? Te Na'ayenɛ ka bo en lebehegɔ de daarɛ.
38 Te Saul yeti, Yamam nɛŋadoma wa, lagahɛ na te to behɛ be'em sebo n boe to poan zina wa. 39 Mam pɔ' la Na'ayenɛ wa n fan' Israel bahɛ wa yeti, la han pon dɛna la mam mɛŋa dayɔa Yonatan n tom be'em, a wan ki. Ge en yele bala la, nɛra ka boe nɛreba la poan lerege en se'ere. 40 Te Saul yele Israel nɛreba la zan'an yeti, Yamam zɛ'a ke' ha, te mam la n dayɔa Yonatan me zɛ'a ke' ha. Te nɛreba la lebehe Saul yeti, To sakɛ ya. Eŋɛ hom n behɛ te sɛla ane soŋa. 41 Te Saul sohɛ Na'ayenɛ yeti, Yele mam yelemɛŋɛrɛ la. Te ba ŋmɛ' gbaŋa,a te la loe Yonatan la Saul ge bahɛ nɛreba la. 42 Saul yeti, Ŋmɛ' ya gbaŋa la bahɛ mam la n dayɔa Yonatan zuo. Te ba ŋmɛ' te la loe Yonatan.
43 Saul yele Yonatan yeti, Yele mam hom eŋɛ sɛla. Te Yonatan yele en yeti, Mam dekɛ la n doore tuhe seerom poan foe na kalom n leele. Denɛ n bala yeti de ko mam wa? 44 Saul yeti, Mam han ka ko ho, Yonatan, Yenɛ namehe mam soŋa soŋa. 45 Ge nɛreba la soke Saul yeti, Hom yeti ho ko Yonatan mɛ? Ane n tare nyaŋerɛ dena taaba na bo Israel wa? La kan tom. Tomam pɔ' la Na'ayenɛ wa te Yonatan zuo zoŋko la koyena me kan lu teŋa. Yenɛ dekɛ la enŋa tom zina wa. Nɛreba la n doohe se'em fan' Yonatan bahɛ te a ka ki n bala.
46 Saul nya bahɛ Pilistidoma wa dika, te Pilistidoma la me woo yeregɛ kule ba yiya. 47 Saul n wa'ana di Israel na'am la, a zabɛ la Israel diŋdoma n kae ba la woo mɛ. A zabɛ la Moabdoma la Ammondoma la Edomdoma la Zoba teŋa nadoma la Pilistidoma. N ne ŋmɛregɛ zen'an woo, a ne sagom ba mɛ. 48 Te a gbirige zabɛ kɔrom Amalekdoma, ge fan' Israeldoma nɛresɛba woo n daa faanra ba la nu'uhen bahɛ.
49 Saul dayɔɔhe dela Yonatan la Isvi la Malki Sua. Te a tara pɔyɔɔhe seyi'. Keema la yu'urɛ n de Merab te be'a la yu'urɛ dɛna Mikal. 50 Saul pɔga yu'urɛ dela Ahinoam, te ka sɔ yu'urɛ dɛna Ahimaaz. Saul zaba nɛŋadaana yu'urɛ dela Abner, te a sɔ yu'urɛ dɛna Ner se'em dɛna Saul sɔ be'a. 51 Saul sɔ Kis la Abner sɔ Ner dɛna Abiel dayɔa.
52 Saul saŋa la, zabɛ kanra n daa boe Pilistia la Israel teŋasoka. Te Saul ne han ta nyɛ bodibikansaŋka, a ne dekɛ ka pa'ahɛ la a pɛɛntɛɛnreba tooma poan.