Nananawa mam han daam Pilistidoma wa se'em kan zɛrɛgɛ mam
15
1 Dɛna wa pooren, ki ke'a saŋa poan te Samson tare bobila keŋɛ ta behɛ a pɔga, ge nya yeti, Mam wan kɛn' a pɔga bɔ'ɔn. Ge te ka sɔ ka sakɛ te a kɛn'. 2 Ka sɔ yele en yeti, Mam tɛn'ɛhɛ te ho kɔ'ɔn zagahɛ ka mɛ n sɔe te mam dekɛ bo ho taaba la. Ka yebega wa pon ka ana soŋa gana ka mea? Bahɛ te n tee dekɛ ka yebega la bo ho. 3 Te Samson yele ba yeti, Nananawa mam han daam Pilistidoma wa se'em kan zɛrɛgɛ mam. 4 Samson nya keŋɛ ta nyɔkɛ piini kɔbehe setan' eŋɛ siinro buuɛ ba zoa, ge dekɛ ba zoa la lu labele taaba bayi' bayi'. 5 A eŋɛ la bugum laŋɛ piini la zoa la ge dekɛ ba bahɛ te ba zɔ kɛn' Pilistidoma vatɔ la poan te bugum taɛ di sɛla wo te Pilistidoma la bore la. 6 Pilistidoma wa sokɛ yeti, Ane n tom ton dɛna wa? Te ba yele ba yeti, Samson se'em n de Timnadoma dɛɛma la. Se'ere n sɔe la dekɛ a pɔga tee elehe a tadaana. Te Pilistidoma la wa'ana nyɔ' pugula la la ka sɔ la. 7 Samson yele ba yeti, Yamam deŋɛ tom ton se'ere wa, mam wan seren lerege ya mɛ, n kan ba'ahɛ te n tee zan'en. 8 A ko Pilistidoma la mɛ te la ka tana eta, ge keŋɛ ta, kɛn'ɛra taŋa yoko n boe Etam teŋa la poan.9 Te Pilistidoma wa keŋɛ Lehi teŋhe la n boe Yuda poan la ta tin' ba sogora maahom gan'an ge gura. 10 Te Yudadoma sokɛ ba yeti, Bene n sɔe te ya wa'ana te ya zabɛ la tɔ? Te ba lebehe ba yeti, Tomam wa'ana te tɔ lo' la Samson tare keŋɛ ta eŋɛ wo en wa'ana wa eŋɛ to se'em la. 11 Te Yuda boraahe tuha atan' n keŋɛ Samson zen'en taŋa la yoko la n boe Etam teŋai la, ta yele en yeti, Ho ka mi te Pilistidoma wa n sɔ tɔ behera? Bene n sɔe te ho tom tɔ bala? Te a lebehe ba yeti, Bama n tom mam toonse'ere la. Bala n sɔe, te mam tom ba bala la. 12 Ba yele en yeti, Tomam wa'ana te to lu ho ta dekɛ ho eŋɛ Pilistidoma la nu'uhen. Te Samson lebehe ba yeti, Pɔ ya te ya mɛhe kan ko mam. 13 Te ba lebehe en yeti, Ɛɛn, to wan yee lo' la ho nu'uhen tare ho paɛ eŋɛ ba nu'uhen ge tomam kan ko hɔ. Te ba lo' en la min'paalehe seyi' tare en yehe taŋa la poan na.
14 Ban tare en paɛ Lehi teŋa te Pilistidoma la to'oha ba ge wɔɔla. Te Yenɛ Sea paŋa sige Samson zuo te la ka tana eta, te min'se'ehe te ba dekɛ lo' a kpenka'ahe la, kɔ' mɛ zɔngɛ wo bugum n tan'ɛ di se la. 15 Te a laalɛ dekɛ boŋa kareyɛ'a konbere ko' nɛreba tuhure deyema.
16 Samson nya yeti, Boŋa kareyɛ'a te n duu'ɛ kugurɔ, boŋa kareyɛ'a te n dekɛ ko' nɛreba tuhure. 17 En tɔgɛ wana ba'ahɛ la, a dekɛ konbere la lobe bahɛ mɛ ge segɛ zen'en la yu'urɛ te Aramat Lehi.a
18 Te ko'nyuuro nya tare en te la ka tana eta, te a yi' Na'ayenɛ ge yeti, Ho dekɛ la ho yameŋa wa nu'o bo mam faanrɛ n gane zan'an, te ho yeti n ki' me baga kaanbereba wa nu'uhen la ko'nyuuro yoi? 19 Te Yenɛ bahɛ te Lehi teŋa la zen'an kayema tanhɛ te ko'om ye'ehera na. En nyu ko'om la ba'ahɛ la, te a paŋa la lebena. Bala, te a segɛ zen'an la yu'urɛ te En Hakore,b te de bɔna Lehi teŋa la ta paɛ zina. 20 Te Samson behɛ Israeldoma yuum pihiyi' Pilistidoma la dabeha la poan.