Mam bote ka me, di ya ka bo mam
14
1 Te Samson keŋɛ sige Timna teŋa la poan, ta nyɛ Pilistidoma pɔka kayema. 2 Te a lebe kule ta yele a sɔ la a ma yeti, Mam nyɛ la Pilistidoma pɔka n kɛn'ɛre Timna teŋa la poan. Mam bote ka me, di ya ka bo mam. 3 Te a sɔ la a ma lebehe sokɛ en yeti, Pugunto wa n boe te yizuo wa poan bii to mɛhe nɛreba wa poan wa. Hon ka nyɛ pɔka bini, ge ho bote te ho di la Pilistidoma wa n de baga kaanbereba wa pɔyɔa? Te Samson zagahɛ ge yele a sɔ la yeti, Ka ane soŋa bo mam. Di ya ka bo mam. 4 A sɔ la a ma la ka mi te la ze'ele Na'ayenɛ zen'en, a eere la sɔrɔɔ seko te a wan zabɛ la Pilistidoma la. Sɛla n sɔe la, saŋkaŋa poan la Pilistidoma la yuun behere Israeldoma.5 Samson doohɛ la a sɔ la a ma' te ba keŋɛ Timna teŋa la poan. Te a wa'an tiihe wɔla vatɔ la n boe Timna teŋa la poan, bilam a nyɛ te gbegenɛ paalega wuna to'oha en. 6 Te Yenɛ Sea paŋa la sige a zuo, te a gin' gbegenɛ wa la nu'beela aanhom dɛ wo bobila, ge ka bahɛ te a sɔ bii a ma la baŋɛ te a ko' sɛla.
7 A nya keŋɛ ta tɔgɛ pa'alɛ pɔka la, te ka me ana soŋa bo Samson. 8 N daa ta lɛbɛra te a tare a pɔga kule la, a keŋɛ ta paɛ la zen'en te a ko' gbegenɛ la, gilige behɛ te siim lɔ seerom gbegenɛ kɛ'ɛŋa la poan. 9 A eŋɛ seerom la me eŋɛ a nu'uhen kena ge dita, N keŋɛ na paɛ a sɔ la a ma la, eŋɛ bo ba mɛ te ba di, ge a ka yele ba te a nyɛ seerom la gbegenɛ kɛ'ɛŋa la poan.a
10 Te a sɔ la keŋɛ sige pɔka la zen'en, te Samson bahɛ te ba dogɛ dia ge de'em de'eŋɔ bini. La dela ba bodibinpaalehe malema n bala te a tom la. 11 Ba daa ta nyɛ bala la ba tare la nɛreba pihitan' na te ba kɔlege en. 12 Te Samson yele ba yeti, Mam tare la n makere te n makɛ, te ya han nyaŋɛ bukɛ dɛ pɔgɔdire de'eŋɔ wa dabeha ayopɔe wa poan, n wan bo ya futo sonɔ n nyagere bon pihitan' ge le pa'ahɛ ya futo pihitan'. 13 Ge ya me han ka ta'an bokɛ dɛ, ya mam me wan bo mam me futo sonɔ n nyagere pihitan' la futo pihitan' la. Te ba lebehe en yeti, Bahɛ te to wom makere la. 14 Te a yele ba yeti, Diha n tare sɛla yehena te di, te paŋadaana tare sɛla n ane nyɛlom yehena. Ba ka taan bokɛ makere la dabeha atan' daarɛ.
15 Dabeha anaahe daarɛ, te ba yele Samson pɔga yeti, Pan'ahe hɔ sera la te a pa'alɛ to makere la vɔnrɛ, ge le han dagana bala, to wan nyɔ' hom la hɔ sɔ yiredoma. Ya ka yi to me na te ya fan' to? La dagɛ la bala? 16 Samson pɔga kele a nɛŋan ge yele en yeti, Ho dini mɛ la mam, ge ho ka nɔŋɛ mam. Ho makɛ la makere bo mam sɔɔnrɔ wa ge ka yele mam se'ere. Te a lebehe yele a pɔga la yeti, Kelehe na, mam pon ka yele n sɔ bii n ma, ge ton yeta hon yoi? 17 Te ka kɛle bala dabeha ayopɔe ta paɛ pɔgɔdire de'eŋɔ la ba'ahegɔ daarɛ. Dabeha ayopɔe daarɛ la te a pa'alɛ ka makere la vɔnrɛ. Se'ere n sɔe la, ka ba pɛnrege en ta gaŋɛ mɛ. Te ka yele ka sɔɔnrɔ la makere la vɔnrɛ. 18 Dabeha ayopɔe la daarɛ, zanɔɔrɛ, te teŋa la boraahe la sokɛ en yeti, Bene n boe ana nyɛlom gana seerom? Bene n boe tare paŋa gana gbegenɛ? Te a lebehe yele ba yeti, Ya han ka dekɛ ne mam nahɔ wa kɔ' ne, ya ka ta'an bokɛ ne mam makere wa.