Yosua 23

Yosua nya ta korogɛ te a yuuma zo'e

1 Na'ayenɛ n bo Israeldoma vo'ohogo ba diŋdoma la woo n kae ba bahɛ la ba'ahɛ la, te la yuue, Yosua nya ta korogɛ te a yuuma zo'e, 2 yi' Israel zan'an la ba keendoma la nɛŋadoma la yelegankereba la ba kpɛ'ɛndoma la zan'an lagahɛ na yele ba yeti, N korogɛ ya te en yuuma me zo'e gaŋɛ. 3 Ya mɛhe nini nyɛ sɛla woo te Na'ayenɛ ya Yenɛ la n eŋɛ teŋhe sena wa se'em yamam zuo. Na'ayenɛ ya Yenɛ la zabɛ zaberɛ la bo ya. 4 Tɛnre ya mam zabɛ to'e nɛreba wa teŋse'ehe n gee gan'an Yordan la ko'kantɛ la teŋasoka nɛŋa bɔba ha la tɔnrɛ ka zan'an se'em bo ya yizuto la woo te la dɛna ba sɔ'ɔlom la. 5 Na'ayenɛ ya Yenɛ la mɛŋa wan dige ba ya nɛŋan. A wan zan' ba te ba fɔnregɛ ya nɛŋan, ge te ya sɔe ba teŋa la sɔna wo Na'ayenɛ ya Yenɛ la n pon biŋe a nɔɔrɛ se'em la ya la. 6 Kpe'em ya kaŋkaŋe. Ge ma'ɛn ya mɛhe nana sɛla woo n golehɛ eŋɛ Moses Pa'alegɔ Gɔŋɔ la poan la. Da ŋmɛregɛ ya lebe zuɔ bii gɔbega. 7 Da dekɛ ya mɛhe lagona la teŋse'ehe woo nɛreba n gee bɔna la ya wa. Da yi'ire ya ba baga la yu'ura bii ya tara ba baga la pɔta ya nɔya. Da tone ya bɔ'ɔra ba bii ya na'aha ba. 8 Gin' ya Na'ayenɛ ya Yenɛ la kaŋkaŋɛ wo ya gin' en se'em tara tara la zina wa.

9 Na'ayenɛ pon dige teŋhe nɛreba n zo'e ge kpe'em mɛ te ya nyɛ. La zina me, se'em ka boe wan ta'an ze'ele ya nɛŋan. 10 Ya nɛra ayena koore la tuha. Se'ere n sɔe la, Na'ayenɛ ya Yenɛ la n zaberɛ bɔ'ɔra ya wo n pon biŋe a nɔɔrɛ se'em la ya la. 11 Bala ma'ɛn ya mɛhe te ya nɔŋɛ Na'ayenɛ ya Yenɛ la. 12 Ge ya han ŋmɛregɛ, dekɛ ya mɛhe lagom la teŋse'ehe poan te ya bɔna wa nɛresɛba n gee bɔna la ya wa la, dita ba pɔgɔba te bama me dita ya pɔgɔba, te ya dekɛ ya mɛhe lagom la ba, 13 ya mina soŋa te Na'ayenɛ ya Yenɛ la kan le dige teŋhe senhe nɛreba se poan bo ya. Ba wan lebege bɛnregɔ nyɔkɛ ya, lebege kpa'aha ŋmɛ'ɛra ya pɔya, ge lebege gɔn'ɔhe lota ya nini, tara tara te ya ta mɛlom teŋsoŋa sɛka poan te Na'ayenɛ ya Yenɛ la dekɛ bo ya la poan.

14 Nananawa, mam gee la n sige teŋa wa. Ya mɛhe sunya la ya sea mi' te yelesoma deyena te Na'ayenɛ ya Yenɛ bo ya gee ka tom. Yelese'a woo te Na'ayenɛ ya Yenɛ biŋe nɔɔrɛ te a tom bo ya la la deyena me ka gee ka tom. 15 Ge wo Na'ayenɛ ya Yenɛ la yelesoma la zan'an te a biŋe nɔɔrɛ te a tom, te yɛla la zan'an seren wa'ana tom la. Bala mea te Na'ayenɛ wan bahɛ te be'em sebo woo te a dekɛ vuunhe ya la sige ya zuo na tara tara ta sagom ya zan'an teŋsoŋa sɛka te a dekɛ bo ya wa poan ba'ahɛ. 16 Ya han zagahɛ Na'ayenɛ ya Yenɛ la n bo ya nɔse'ere la, ge ta kaanbera baga na'aha ba nɛŋan, Na'ayenɛ sunsunyiim wan taɛ bahɛ ya zuo na te ya mɛlom teŋsoŋa sɛka te a dekɛ bo ya wa poan.