Israeldoma boraahe la pɔhɛ gan'an la Moabdoma pɔgɔhe la
25
1 Israeldoma n wa kɛn'ɛre Sitim teŋa poan la, te Israeldoma boraahe la pɔhɛ gan'an la Moabdoma pɔgɔhe la. 2 Pɔgɔhe la ne yi boraahe la mɛ ba baga kaanbegɔ saŋa, te ba ne keŋɛ ta di ge pɔnta na'ma bɔ'ɔra ba baga la. 3 Israeldoma n lagom kɛn' Baal Peor bagarɛ kaanbegɔ se'em n bala, te Na'ayenɛ sunsunyiim taɛ bahɛ ba zuo na. 4 Te Na'ayenɛ yele Moses yeti, Nyɔkɛ nɛrebana wa nɛhedoma la na ko ba biŋe wontɛɛŋan Na'ayenɛ nɛŋan, bala te Na'ayenɛ wan foe a sunsunyiim Israeldoma poan. 5 Te Moses yele Israeldoma yelegankereba la yeti, Ko ya nɛresɛba woo n boe ya yizuto la poan ge lagom kaanbera Baal Peor bagarɛ la. 6 Te Israel boraa kayema doohe la Midian pɔka wa'an a yiren na, Moses ninin, se'em ma'an te Israeldoma la lagahɛ zɛ'a Sogorɛ la nɔɔrɛn kɛla la. 7 Te Aron se'em n de malema nɛŋadaana la dayɔa Eleazar dayɔa Pinehas n nyɛ bala la, a yehe lagaŋɔ la poan mɛ keŋɛ ta dekɛ kanɛ na, 8 dɔla Israel boraa la ta kɛn' sogorɛ la poan, dekɛ kanɛ la lo' boraa la ta' la pɔka la. Te too seko n boe Israeldoma zuo la bahɛ. 9 Ge sɛba n ki too la poan la kaanlɛ dela nɛreba tuha pihiyi' la tuha anaahe (24,000).10 Te Na'ayenɛ yele Moses yeti, 11 Aron dayɔa Eleazar dayɔa Pinehas wa n gu' mam sunsunyiim sebo ye' ne Israeldoma wa zuo na la bahɛ. Se'ere n sɔe la, a suunre ba' kɛn' mɛ la mam yu'urɛ na'ahegɔ nɛreba wa teŋasoka wo mam mɛŋa suunre n ba' kɛn' la n yu'urɛ na'ahegɔ nɛreba wa teŋasoka se'em la, bala te mam n pon tɛn'ɛhe ne te n sagom ba se'em la, n kan le ta'an sagom ba le yɛ'ɛha. 12 Bala la, yele ba te mam biŋere la sunma'ahom nɔɔrɛ la en zina wa. 13 Enŋa la a yaahe wan dɛna malemadoma wuuha. Se'ere n sɔe la, a suunre n ba' kɛn' la a Yenɛ yu'urɛ na'ahegɔ la zuo, te a duuhe be'em bo Israeldoma. 14 Israel boraa sɛka te ba ko ka la Midian pɔka la yu'urɛ dela Zimri se'em n de Salu n de Simeon yizuo la nɛŋadaana la dayɔa. 15 Midian pɔka la te ba ko la yu'urɛ dela Kozbi, te ka sɔ yu'urɛ dɛna Zur, dɛna Midian naba ayema. 16 Te Na'ayenɛ yele Moses yeti, 17 Enŋɛ Midiandoma wa ho diŋdoma la ho ko ba. 18 Se'ere n sɔe la, ba dekɛ ya enŋɛ la ba diŋdoma, doohe la ban pan'ahɛ ya te ya kaanbɛ bo Peor bagarɛ, la ba tanya Kozbi la, se'em sɔ n de Midian naba ayema, te ba ko ka se'em ma'an te too sige ya zuo na yan kaanbɛ Peor bagarɛ la.