Balaam ihege bagɛ a boŋa, te enŋa la Moab nɛŋadoma la doohe taaba
22
1 Te Israeldoma keŋɛ ta sige Moab teŋa paberɛ poan, tiihom Yordan Kolaa nɔgbenɛ, te Yeriko bɔna yakenɛ deyema la ha. 2 Bala ma'an te Zipor dayɔa Balak la n pon nyɛ Israeldoma n enŋɛ Amoridoma la se'em la, 3 te dabeem kɛn' Moabdoma la. Se'ere n sɔe la, Israeldoma la ba' zo'e mɛ, te Moabdoma la pabegɛ la Israeldoma la zuo.4 Te Moabdoma la yele Midian keendoma la yeti, Nɛre bɔbɔgɔ kona wa yeti ko fi'ihi sɛla woo n lɛm to mɛ wo lɔlega n fi'ihi yaama bɔn'ɔn poan se'em la. Te Zipor dayɔa Balak n de Moabdoma naba saŋkaŋa poan la 5 ge te a tom nɛreba Beor dayɔa Balaam n yehe Petor teŋa n lɛm la kolaa la zen'an te ba yele en yeti, Behɛ, nɛreba n ze'ele Mizraimdoma poan yehe na, kɔ'ɔn saregɛ zen'an woo, ba me wa'ana zin'ire lɛm mɛ la mam. 6 Bala, wa'ana pɔ' bahɛ ba zuo. Se'ere n sɔe la ba ba' kpe'em gaŋɛ mam mɛ. Ge daanse'ere ho han wa'ana enŋɛ bala, n wan nyaŋɛ ba, ge sa'ɛ ba te ba yehe n teŋa wa poan. Se'ere n sɔe la, mam mi' te hom kan' bo se'em, bala en dole en, hom pɔ' bo se'em bala en dole en.
7 Te Moab la Midian keendoma la keŋɛ te ba ta ɛ behɛ, ge tara ba boka lɔkɔ. Te ba ta paɛ Balaam zen'an yele en Balak n yele se'em. 8 Te Balaam yele ba yeti, Gan'arɛ ya, ge te n ɛ behɛ, la n tare lebehegɔ seko te Na'ayenɛ wan dekɛ bo mam la na. Bala te Moabdoma keendoma la yee gan'arɛ. 9 Te Yenɛ wa'an Balaam zen'an na soke en yeti, Nɛrebana wa dela bane bɔna la ho wa? 10 Te Balaam lebehe yeti, Zipor dayɔa Balak n de Moab naba la n tom ba la sɔɔleŋa na yeti, 11 behɛ, nɛreba ba sɛba n ze'ele Mizraim teŋa poan yehe na, kɔ'ɔn saregɛ zen'an woo. Bala, wa'ana pɔ' bahɛ ba zuo bo mam, ge daanse'ere n wan nyaŋɛ ba, la en sa'ɛ ba te ba yehe. 12 Ge Yenɛ yele Balaam yeti, Da doohe la nɛreba la lebe. Da pɔ' bahɛ nɛreba la zuo. Se'ere n sɔe la, kan'somɔ n pon deŋɛ bɔna ba zuo. 13 Yiimbeere bolika, te Balaam ihege yele Balakdoma la yeti, Lebe ya, ge Na'ayenɛ ka sakɛ te n doohe ya keŋɛ. 14 Bala te Moabdoma keendoma wa lebe Balak zen'an ta yeti, Balaam ka sakɛ te a doohe to wa'ana.
15 Te Balak le tom nɛŋadoma ba sɛba n zo'e, ge dɛna nɛrezura gana yia keendoma la. 16 Te ba wa'an Balaam zen'an na yeti, Zipor dayɔa Balak yeti, da bahɛ te sɛla gu'ura ho enŋa zen'an kenɛ na. 17 Se'ere n sɔe la, n wan bo ho yɔɔrɛ kantɛ, ge enŋɛ hom yele sɛla woo. Hom yeen wa'ana pɔ' bahɛ nɛreba wa zuo bo mam. 18 Ge Balaam lebehe ba yeti, Balak han pon dekɛ a yire la te de perɛ la sanlenpeelega, la sanlema bɔ'ɔra mam, mam kan ta'an enŋɛ sɛla fiin bii keko, la n pɔ'ɛ Na'ayenɛ n de n Yenɛ la nɔɔrɛ la te a bo mam la. 19 Ya enŋɛ sugure ge gan'arɛ ya kalam, ge te n ɛ behɛ Na'ayenɛ n wan yele mam se'em. 20 Yu'uŋɔ koŋɔ mea poan te Na'ayenɛ wa'an Balaam zen'an na yele en yeti, Nɛreba wa n deŋɛ wa'ana yi ho wa, yeen doohe ba keŋɛ, ge ta eta sɛla te mam wan yele ho la ma'an. 21 Yiimbeere bolika te Balaam ihege bagɛ a boŋa, te enŋa la Moab nɛŋadoma la doohe taaba lebe.
22 Ge Yenɛ suunre nyie mɛ la en dole ba yɛ'a la, te Na'ayenɛ soŋora keŋɛ ta zɛ'a sore la zuo te a gu' en. Balaam ban' la a boŋa, te a yamehe seyi' dɔla en. 23 Boŋa la n nyɛ Na'ayenɛ soŋora la te a foe so'woko zɛ'a sore la zuo la, ka bahɛ sore la mɛ, ge bɔregɛ kɛn' mɔɔ poan. Te Balaam ŋmɛ'ɛra boŋa la te ka lebe doohe sore la poan. 24 Te Na'ayenɛ soŋora la, keŋɛ ta ze'ele zen'an te sore la dɔla tiihe va'am boyi' teŋasoka, te dangɔɔma ayi' beŋe ke, ge beŋe ke. 25 Boŋa la n nyɛ te soŋora la ze la, ka dekɛ la ka mɛŋa ta duue dangoone la, te Balaam na'arɛ duue dangoone la. Te la paɛ en te a le ŋmɛ' boŋa la. 26 Te Na'ayenɛ soŋora la keŋɛ ta ze'ele tɔlega zen'an la, lɔkerɛ zen'an kan bɔna lɛbera zuɔ bii gɔbega. 27 Boŋa la n nyɛ te soŋora la zɛ'a la, ka kpee gan'arɛ mɛ, te Balaam yaga, te la nyie Balaam, te a zɛnkɛ a dose'ere te a zanla la ŋmɛ' ka.
28 Te Na'ayenɛ ya'ɛ boŋa la nɔɔrɛ, te ka tɔgɛ bo Balaam yeti, N enŋɛ ho la wane te ho ŋmɛ' mam sugumnɔɔren botan' wa? 29 Te Balaam yeti, Ho zeem mam mɛ n han tare ne so'a n nu'en wa, n wan kɔrɔgɛ ne hɔ nananawa. 30 Te boŋa la yele Balaam yeti, Dagɛ mam n bala te ho ban'ara daarɛ woo tara tara la zina wa? Ho tabelɛ nyɛ te n eta ho wana? Te a yeti, Aai. 31 Te Na'ayenɛ pekɛ Balaam nini te a nya nyɛ te Na'ayenɛ soŋora la ze' sore la zuo la so'woko. Te a pɔnrɛ na'ma, kɔ'ɔn gan'arɛ aliko. 32 Te Na'ayenɛ soŋora la nya soke en yeti, Bene te ho ŋmɛ' ho boŋa wa sugumnɔɔren botan' wa? Mam wa'an na te n gu' ho mɛ. Se'ere n sɔe la, hom ye' sose'ere la ka nɛ nini bo mam. 33 Boŋa la nyɛ mam mɛ, ne ŋmɛregɛ sugumnɔɔren botan' wa zan'an. Ka han ka ŋmɛregɛ ne, wana ma'an mam ko ne hɔ ge bahɛ ka. 34 Te Balaam yele Na'ayenɛ soŋora la yeti, Mam tuue ya. Mam ka baŋɛ te ho ze' la sore wa zuo te ho gu' mam. Bala n kenɛ wa han ka pee ho poorɛ, n wan lebe. 35 Te Na'ayenɛ soŋora la yele Balaam yeti, Doohe boraahe la keŋɛ, ge ta tɔgɛ mam wan yele ho se'ere la ma'an. Bala te Balaam doohe la Balak keendoma wa keŋɛ.
36 Balak n ta wom te Balaam kene na la, te a ihege te a to'ohɛ en Moab teŋa kayema lɛm Arnon kolaa, a teŋa la beene zuo. 37 Te Balak yele Balaam yeti, Mam ka tom te ba wa'ana yi' ho la ninmɔ'ɔrɛ? Wane te ho ka wa'ana? Mam kan ta'an yɔ hɔ me yoi? 38 Te Balaam lebehe en yeti, N ye wa'an me na wa. Ge n wan kɔ'ɔn ta'an tɔgɛ la mam n bote se'em yoi? Yenɛ n dekɛ sɛla enŋɛ n nɔɔrɛn la ma'an te n wan tɔgɛ. 39 Te Balaam doohe Balak te ba keŋɛ Kiriat Huzot. 40 Te Balak ta kaanbɛ lɔlehe, la piihe, tɔnrɛ Balaam, la keendoma sɛba woo n boe zen'an la poan la. 41 Yiimbeere bolika te Balak tare Balaam keŋɛ Bamot Baal, bilam te Balaam te nyɛ Israeldoma wa ba sɛba ha.