Kure bonsɛla, dekɛ yagelɛ dɔɔ zuo
21
1 Arad n boe Negev teŋa la naba n de Kanaandoma n ta wom te Israeldoma la dole la sose'ere n ye' Atarim teŋa na la, a zabɛ la ba, ge nyɔkɛ ba basɛba.2 Te Israeldoma biŋe nɔɔrɛ la Na'ayenɛ yeti, Ho han dekɛ nɛrebana wa enŋɛ to nu'uhen, tomam wan sagom ba teŋhe wa zan'an. 3 Te Na'ayenɛ wom Israeldoma sohoga la dekɛ Kanaandoma la enŋɛ ba nu'uhen. Te ba sagom ba la ba teŋhe la ge segɛ zen'an la yu'urɛ Horma.
4 Ba ze'ele la Hor Zoore la, dɔla sore se'ere n dole yɛ'a Mɔgɔ Mɔlega la poan la, te ba belɛ Edom teŋa la. Te nɛreba la ta ŋmibe koŋe sore la zuo, 5 Ge te ba nyɔna Yenɛ la Moses yeti, Bene te ho tare tɔ ze'ele Mizraim teŋa yehe na te to ki pɔgɔtia wa poan? Dia ka boe, ko'om me ka boe. To me ka bote diyaalega wa. 6 Te Na'ayenɛ tom kanpɛɛnhe bahɛ ba poan na, te se duna Israeldoma, te ba zo'e zo'e ki. 7 Te nɛreba la, lagahɛ Moses zen'an na yele en yeti, Tomam tom la be'em Na'ayenɛ nɛŋan, la tomam tɔgɛ sɛla n ka ane soŋa bo ho la. Sohɛ Na'ayenɛ te yehe kanpɛɛnhe wa to zen'an ge bahɛ tɔ. Te Moses sohɛ bo ba. 8 Te Na'ayenɛ yele Moses yeti, Kure bonsɛla, dekɛ yagelɛ dɔɔ zuo, te se'em woo te kanpɛn'a dum en, han gorege behɛ ka, a kan ki'. 9 Bala te Moses kure nyɔgom bonsɛla, dekɛ yagelɛ dɔɔ zuo. Te kanpɛn'a n dum se'em, te a gorege behɛ nyɔgom bonsɛla la, a ne vo'e mɛ.
10 Te Israeldoma la keŋɛ ta paɛ Obot, tiihom bilam. 11 Te ba ze'ele Obot keŋɛ ta paɛ Iye Abarim, le tiihom bilam, tɔ la pɔgɔtia la n tu'uhere Moab teŋa, kɔ'ɔn tɔ la sɔɔnrom yɛhega zen'an na la. 12 Te ba le ze'ele bilam keŋɛ ta paɛ Zered Bɔn'ɔn la poan tiihom bilam. 13 Te ba ze'ele bilam ta tiihom Arnon kolaa kenkɛleŋa, zen'an n boe pɔgɔtia la n tɛnregɛ yɛ'a Amoridoma teŋa poan la. Arnon kolaa wa dela Moabdoma teŋa beene, gan'an Moab la Amoridoma teŋasoka. 14 Bala te yoonɛ bɔna Na'ayenɛ Zaba Yɛla Gɔŋɔ la poan porɛ Waheb teŋa la ka bɔgɔhe la n boe Supa la, ge me porɛ Arnon kolaa la, 15 la ka paba la n gan' dɔla Moab beene tɛnregera yɛ'a Ar teŋa poan la.
16 Te ba ze'ele bilam keŋɛ ta paɛ Beer bulega poan, te Na'ayenɛ yele Moses yeti, Lagahɛ nɛreba wa na te n bo ba ko'om te ba nyu'. 17 Bala te Israeldoma nya yoon yoonɛ yeti, Bulega en bo to ko'om. 18 Yoon ya bulesɛka te nabiihe tun' la yele, bulesɛka te nɛŋadoma dekɛ ba na'am kpe'eŋo tun' la yele. Te ba nya ze'ele pɔgɔtia la poan ta paɛ Matana, 19 ze'ele Matana ta paɛ Nahaliel, ze'ele Nahaliel ta paɛ Bamot, 20 ze'ele Bamot ta paɛ paberɛ n boe Moab teŋa, zen'sɛka te Pisga Zoore beha pɔgɔtia la.
21 Te Israeldoma tom nɛreba Amoridoma naba Sihon zen'an yeti, 22 Bahɛ te to doohe ho teŋa wa poan tole. To kan ŋmɛregɛ kɛn' va'am, bii saaɛ ho tiihe wɔla se'a en dite va'am, bii to nyu' ho teŋa la bulehe ko'om. To wan kɔ'ɔn nɛ la la naba sɔrɔɔ la bala te yehe. 23 Ge naba Sihon ka sakɛ te Israeldoma la doohe a teŋa la poan tole, ge lagahɛ a a pɛɛntɛɛnreba, kɛn' pɔgɔtia la poan te ba zabɛ la Israeldoma. Ta paɛ ba Yahaz teŋa zabɛ la ba. 24 Ge Israeldoma nyaŋɛ en mɛ, fan' a teŋa la ze'ele Arnon kolaa la ta paɛ Yabok kolaa la wa'ana teke Ammondoma beene. Se'ere n sɔe la, bama mɛ ba teŋa la mum mɛ. 25 Israeldoma fan' Amoridoma teŋkanra la woo mɛ sɔna, ta ta' la Hesbon teŋa, la ka teŋbibihe zan'an. 26 Hesbon teŋa wa dela Amori naba Sihon teŋkantɛ, se'em n wa zabɛ la Moab naba se'em yuun pon bɔna la, ge fan' a teŋa zan'an ta paɛ Arnon kolaa la. 27 Bala n sɔe te makerɛ bɔna yeti, Wa'an Hesbon na le mɛ ka, malom mɛ Naba Sihon teŋkantɛ la. 28 Bugum n ze'ele Hesbon na, bugum peelom n ze'ele Naba Sihon teŋa na, bo di Ar teŋa n bo Moab mɛ, bo dite nɛresɛba n kɛn'ɛre Arnon zuin zuin ha la mɛ. 29 Yele boe hom Moabdoma wa zuo. Kemosdoma wa, ya sagom ba'ahɛ. A dayɔɔhe lebege la zaŋkɔn'ɔma, te a pɔyɔɔhe dɛna Amori naba Sihon da'aba. 30 Ge tomam nyaŋɛ ba mɛ, to sagom Hesbon mɛ ta paɛ Dibon. To saalom ba mɛ ta paɛ Nopa, teŋsɛka n tɛnregɛ ta paɛ Medeba la.
31 Te Israeldoma n daa zin'ire Amori teŋa la poan se'em n bala. 32 Moses n ta tom vɛɛhereba te ba keŋɛ ta kae teŋsɛka n mɛ mum la, te Israeldoma zabɛ la nyaŋɛ teŋse'ehe n boe ka kenkɛlehe la, ge sa'ɛ Amoridoma la n boe bini la. 33 Te ba nya ŋmɛregɛ sose'ere n ye' tɔɔra Basan la, te Basan naba Og la a pɛɛntɛɛnreba yehe na to'ohɛ ba Edrei teŋa poan te ba zabɛ. 34 Te Na'ayenɛ yele Moses yeti, Da zɔta dabeem la en, mam dekɛ en enŋɛ la ho nu'uhen, enŋa la a pɛɛntɛɛnreba, la a teŋa la. Enŋɛ en wo hon enŋɛ Amori naba Sihon se'em daa zin' a na'am gɔŋɔ zuo Hesbon teŋa poan se'em la. 35 Bala te ba ko' enŋa la a kɔma la a pɛɛntɛɛnreba la zan'an, ka gee la nɛre yenɛ mɛ, ge nya soe a teŋa la sɔna.