Arakel n ki se'em n bala
35
1 Te Yenɛ yele Yakob yeti, Ihege nananawa keŋɛ Betel teŋa ta bɔna bilam. Ta mɛ' bimbine bilam bo mam Yenɛ n daa nɛɛ n mɛŋa bo ho se'em ma'an te ho daa le'eha ho keema Esau zɔta la. 2 Bala te Yakob yele a yiredoma zan'an, la nɛresɛba woo n boe la en la yeti, dekɛ ya baga la woo te ya tara la lobe bahɛ, ge pee ya mɛhe ya dɛngerɔ la poan ge tee lɔrɔgɔ yɛ' 3 te to keŋɛ zom Betel teŋan te n ta mɛ' bimbine bo Yenɛ se'ere te n ne yi' bo en sunsagaŋɔ saŋa te de ne kelehe mam la. Yenɛ se'ere n ne bɔna la mam zen'an woo te n yɛ'a la.4 Te nɛreba la seren tare ba baga se'a woo n boe ba zen'an la la ba nu'toohe la ba tobekayulehe zan'an na bo Yakob, te a kan'ahɛ ba pin' tikantɛ n ze' lɛm Sekem teŋa tilin, 5 ge te ba pɔhɛ kenɛ. Te Yenɛ bahɛ te dabeem kɛn' teŋse'ehe woo te ba dɔla se poan tɔla la, te nɛnɛra ka daam ba.
6 Te Yakob la a nɛresɛba woo n dole en la wa'ana paɛ Luz n boe Kanaan teŋa poan, Betel teŋa n bala, 7 nya mɛ' bimbine bilam bo Yenɛ, ge segɛ zen'an la yu'urɛ El Betel. Se'ere n sɔe la bilam te Yenɛ tabelɛ nɛɛ a mɛŋa bo en, saŋsɛka te a wa le'eha a keema Esau zɔta la. 8 Bala ma'an te Debora se'em n yuun de Yakob ma Arebeka yɔɔla la n ki, te ba pin' en Betel teŋa teŋanɔɔren bɔba ha lɛm la tikantɛ n de beene tia te ba yi'ira nintam tia.
9 Yakob n ze'ele Padan Aram teŋa lebe na la, Yenɛ nɛɛ a mɛŋa pa'alɛ en mɛ ge kan' som bahɛ a zuo. 10 Yenɛ yele en yeti, Ho yu'urɛ dela Yakob ge ba kan le yi' ho Yakob. Ho yu'urɛ nya wan dɛna la Israel. Bala te Yenɛ segɛ en Israel. 11 Te Yenɛ nya yele en yeti, Mam n de Gaŋɛ Zan'an Yenɛ. Wi'ɛ mɛ. Ho wan wi'ɛ buuri te ba lebege teŋkanra. Nadoma wan ze'ele ho poan na. 12 Teŋsɛka te n dekɛ bo Abraham la Isaak la, kaŋa mea te n dekera bɔ'ɔra ho wa. N wan dekɛ teŋa wa bo ho yaahe se'ehe n wan wa'an ho pooren na. 13 Te Yenɛ tɔgɛ ba'ahɛ ge ze'ele en ze' zen'an tɔgɔra bɔ'ɔra Yakob la zom saazuo. 14 Te Yakob dekɛ kugure sɛ' zen'an te Yenɛ ze'ele tɔgɛ bo en la, ge kaanbɛ daam bo'olom la kaam yeele kugure la. 15 Bala te Yakob segɛ zen'sɛka te Yenɛ tɔgɛ bo en la Betel.
16 Te ba ze'ele Betel teŋa kena yɛ'a. Ba ta kelom zaan mɛ la Eprat teŋa, ge te Arakel virige te a dɔgɛ, te la wuna en. 17 La ta ba' wuna en gaŋera ge te bia la nya yɛhera na. Te pɔgɔsɛka n dɔgɔhere en la yele en yeti, da bahɛ te la daana hɔ ge ho le dɔgɛ la bodibila. 18 Arakel ta kiiri mɛ ge porɛ bia la yu'urɛ Ben Oni ge Yakob segɛ ka Benyamin. 19 Arakel n ki se'em n bala, te ba pin' en ban dole sore se'ere yɛ'a Eprat teŋa la zuo, Betlehem teŋa n bala. 20 Te Yakob dekɛ kugure sɛ' Arakel yɔɔ la zuo, te de kelom zɛ'a bini la zina pa'alɛ te Arakel yɔɔ n bala.
21 Te Israel ze'ele la bilam keŋɛ ta gaŋɛ Migdal Eder dewoko bahɛ, ge tole ta tin' a sogorɛ kɛn'ɛra bilam. 22 Teŋkaŋa poan te Israel dayɔa Areuben ta nɛ' a sɔ Israel pɔgɔbɔ'ɔreŋa Bilha soŋen, te Israel baŋɛ. Israel tare la dayɔɔhe pia la seyi'.
23 A pɔga Lea bodibinto dela Areuben n de keema, tagala Simeon la Levi la Yuda la Isakar la Zebulun. 24 Arakel bodibinto dela Yosef la Benyamin. 25 Arakel pɔsɔɔ Bilha te a dekɛ bo a sera Yakob la bodibinto dela Dan la Naptali. 26 Lea pɔsɔɔ Zilpa te a dekɛ bo a sera Yakob la bodibinto dela Gad la Aser. Yakob dayɔɔhe pia la seyi' la n bala te a dɔgɛ Padan Aram teŋa poan la.
27 Te Yakob nya wa'ana paɛ a sɔ Isaak Mamre teŋa la n lɛm la Kiriat Arba teŋa la, zen'an te Abraham la Isaak yuum bɔna la poan. Hebron teŋa n bala. 28 Isaak vom yuuma teŋa wa zuo dela yuuma kɔbega la yuuma pihinii 29 ge te a ki. Te a nɛreba lagahɛ na kele en. A yuum korogɛ mɛ te a yuuma ka ta'an eta. Te a dayɔɔhe Esau la Yakob pin' en.