Xua tsicarucatsi peyajiwitaenucanë, pijajiwi pecapanepaenexa
33
Jehová nejumaitsi xanëjawaberena mapacueniaje: 2 «Ezequiel, xamë jiwiyajuwënënëmë, ponaename Xanë tawënëta, netsipaebinexa tacayapëtaeya-exanaeliwaisi nijamonaewijawabelia. Jumaitsimë tsane: ‘Jehová raja nejumatisi mapacueniaje’: Pacujinae Xanë tocopatajë itsanacuapijwi pijawajabitsaë petsimaxëponaenexatsi, itsawënëtane petsimaxëpatsijawanexatsi, bajarapanacuapijiwi nato-itapetabiaba peyajiwitaenucaenënexatsi. 3 Nexata bajarapayajiwitaenucaenë itsa tane pijawajabitsaë imoxoyo petsimaxënajetarubenaejawatsi, pijatrompeta be-obaxuaba, peyapëtaeya-exanaenexa pijanacuapijiwi. 4 Pajiwi jumetae-ata trompeta penajumetsijawa, itsiata itsa namuxujemata, nexata pijawajabitsaë itsa beyaxuabatsi espadata, pijacuata nacopata penabeyaxuabia-exanaenexa. 5 Jumetane picani pe-obijawa trompeta, itsiata penamuxujematsixae, pijacuata nacopata penabeyaxuabia-exanaenexa. Itsiata, itsa jumecowënëtsipa, wecuapanepaejitsipa pebeyaxuabijawatsi. 6 Itsiata baitsi jane, peyajiwitaenucaenëtsi itsa apo-obi tsipae pijatrompeta, peyapëtaeya-exanaenexa pijanacuapijiwi, tae-ata pijawajabitsaë petsimaxënajetarubenaejawatsi, nexata pijanacuapijiwi pijawajabitsaë itsa beyejebatsi espadata, bajaraponë naneconitsipa pijanacuapijiwijawabelia, petëpaejawa yabara», jamë tsane nijamonaejawabelia.7 »Xamë, jiwiyajuwënënëmë, cayapëtaeya-exanatsi mapacueniaje: ‘Xanë canutatsi israelitawi neyajiwitaenucaenënexa. Nexata, tacayapëtaeya-exanaecujinae paliwaisi jitsipajë nepaebijawa, caecuenia bepaebame bajarapamonaejawabelia, penacuenexanetsinexa, tananeconitsia-exanaewajënaeya tacayapëtaeya-exanaecuenia. 8 Nexata, itsa ca-itorobatsi neyapëtaeya-exanaenexa pibisiacuene pexanaejiwijawabelia, rowialia tsipaebianame tatocaëjëtsijawa petëpaejawanexa pijaneconijamatabëcuene. Itsiata, itsa apoyapëtaeya-exanaemë tsipae bajarapajiwijawabelia, penajamatabëcuenepënëyorotsinexa pibisiacuene pexanaejawawecua, pijaneconijamatabëcuene itsa yajawatëpaejitsipa, nexata xamë naneconitsipame xanëjawaberena, bajarapajiwi petëpaejamatabëcuene. 9 Itsiata baitsi jane, yapëtaeya-exanae-atamë petëpaejawanexa, itsa aponacuenexanetsi tsipae pecanamuxujematsixae, nexata xanëjawaberena aponaneconitsimë tsipae, bajarapajiwi petëpaejamatabëcuene’», nejai Jehová.